男朋友同佢前度緊密聯絡

同男朋友一齊左一年,一直都知佢有個拍左好多年嘅Ex,佢地散左幾個月之後 (佢Ex 提出分手嘅) 我地就一齊左。本身我都唔介意佢地繼續做朋友,間唔中聯絡下,但係之後先比我發現佢地聯絡得好密,唔係每日都隔幾日就互send msg

有同男朋友提過可唔可以唔好傾咁密,但係佢好堅持佢地只係朋友,咁的確我見佢地傾嘅野都係一般朋友會傾嘅話題,但係個interaction 令我覺得好唔舒服 :disappointed_relieved: 加上佢朋友唔多,佢覺得點解我要干涉佢交友圈… 我就覺得點解佢為左呢個前度而唔care 我感受,係咪佢重要過我… 我都唔知係咪一係分手,一係就接受,無其他方法 :disappointed_relieved:

你好呀 @Nam

都好欣賞你會顧及男朋友嘅感受,唔想限制佢嘅社交自由,但係我諗你覺得唔舒服嘅位,都有你嘅原因。雖然你知道佢哋只係傾吓啲朋友嘅話題,但係我諗你背後擔心嘅,係喺佢哋不斷交流嘅過程中,總少不免提及過去同回憶,而你同男朋友所經歷嘅一定唔會比佢哋多,因此你都會怕佢哋舊情復熾,變成你哋分手嘅導火線。 :pleading_face:

我相信你都有試過向男朋友表達咁樣嘅情況會令你唔舒服,所以你先至會話男朋友為咗個前度而唔顧你嘅感受。再加埋你好顧及佢嘅社交自由,但係對方連你嘅感受都冇關注到,呢種不對等令你更加覺得難受。 :face_with_thermometer:

我諗你同男朋友啱啱開始嘅時候,都係建立緊一個安全感嘅階段,一開始你嘅安全感好高,所以就算你男朋友同前度聯絡你都覺得OK,但係唔知點解有啲嘢轉變咗,導致你好擔心會失去呢段關係。可能係男朋友對你嘅態度?可能係男朋友同你分享嘅話題?可能係男朋友對你表達愛意嘅方式?

你可以嘗試問吓自己以下呢幾個問題:

  1. 男朋友同前度嘅聯絡係咪必須?

  2. 男朋友同前度嘅對話係咪必須要同對方分享?

  3. 雖然男朋友嘅社交圈子比較窄,但係佢所講嘅說話係咪剩係得前度可以明白?

如果全部都係「是」嘅話,咁男朋友可能真係有必要同前度聯絡嘅,但係如果有其中一樣係「否」,咁就可以檢視返男朋友嘅社交滿足感係咪淨係可以從前度身上獲得。

建議好好理清思緒,諗吓自己係呢件事上面嘅感受。如果唔太識表達情緒,可以試吓喺以下呢個表度睇吓邊啲情緒你有出現過:

出處:電影-腦筋急轉彎 Inside Out 背後的思考。 @ 心理學知識特快-首頁 :: 痞客邦 ::

同佢真誠咁樣表達返你所經歷嘅嘢,例如你覺得佢同前度嘅聯絡令你好不安,你覺得好擔心會失去佢等等。

同時亦可以試吓同男朋友去協商,睇吓會唔會可以停止同前度聯絡一段時間,邀請佢將會同前度分享嘅事同你分享。至於交友圈比較窄,如果你願意可以介紹你自己嘅朋友俾佢認識,同佢一齊去經歷同感受,或者同佢去參加一啲團體嘅活動,一齊去擴闊圈子。 :innocent:

希望可以幫到你啦~ :smiley:

我又唔係擔心佢地會翻撻,只係學你咁講,我覺得佢無顧及我感受,因為我並唔係要求佢完全斷聯,只係希望減少聯絡。點知男朋友嘅態度非常強硬,佢話佢分得好清楚條界線,知道講嘅野係正常朋友會講嘅話題就得,唔關頻率事。佢話點解要去分係咪前度,點解唔可以當係一個異性朋友?我就話因為嗰個係前度,你地曾經有好親密嘅關係,當然唔能夠相提並論。佢就話即係我唔信佢,仲話一段關係一係完全相信,如果有少少懷疑根本無意思。所以當下我選擇妥協,呢一年不斷同自己講佢地只係朋友,唔好咁小氣,但見到佢個chatbox 頭一兩個一定係佢個Ex,真係覺得好難頂…

發生呢件事之前,男朋友一直對我嘅態度都無變,一路都好有交帶,例如佢地大學同學聚會,當中有Ex,佢都會問過我比唔比去先去,所以一路以黎我都好放心。係有次我不經意問佢同Ex 大概幾耐聯絡下,佢話間唔中,我以為係以星期 or 月計,但之後先發現原來係幾日就contact 一次,我就覺得點解大家個標準差咁遠,係咪佢有心隱瞞 :disappointed_relieved:

而呢件事之後,我知佢做左好多野去試圖建立返我嘅安全感。例如之前佢唔會post 自己嘅另一半出黎,呢一年佢都會keep 住post 我上social media,所以佢成個圈子都知我係佢女朋友;然後佢亦邀請左我上佢屋企食飯,正式介紹我比佢家人認識。但係咁樣並唔代表Ex 嘅問題已經處理左,有時我都會諗係咪自己太執著?

至於你問嘅三個問題,似乎個答案都係「是」… 男朋友係一個比較內向嘅人,我知佢除左有個同事group (但係嗰幾個同事都已經轉左另一間公司做),對落真係交到心嘅都應該真係得返佢個Ex… 我都有試過代入過佢嘅狀態,佢本身都已經少朋友,如果我仲要連佢唯一一個傾到心事嘅朋友都無埋,佢好似又好慘… 所以我係咪都應該相信佢地,由佢地繼續聯絡?但係同一時間我又覺得好焦慮,同埋好憎佢個Ex 明明佢自己都已經有另一半,點解仲要繼續纏住我男朋友?

唔好意思,我知道我呢度打左好多字,因為我自己嘅思緒都好混亂,辛苦你地睇晒 :bowing_woman:t2::bowing_woman:t2:

Hello~多謝你嘅發問!

睇翻你嘅問題先,其實都明白你話覺得男朋友同ex一直keep住有contact,即使你唔係會怕佢哋有機會舊情復燃,始終內心都會有啲唔好受,因為佢寧願同自己個ex講都唔同自己講(即使嗰啲唔係一啲好重要嘅事),不過我覺得如果你同你男朋友曾經溝通過,但係都冇一個好嘅處理辦法,但係由於呢件事呢都會令到你有焦慮同埋都困擾左你一段長嘅時間,雖然係之前你哋處理嘅時候你選擇咗妥協,但係學你話齋有啲事情逃避左唔代表解決咗,所以呢就應該要正視呢個問題,否則佢會一直困擾住你,不過就要小心啲處理。我想問一下你你之前同男朋友溝通嘅時候係點樣溝通呢?你係點樣問你男朋友問咗啲咩問題?男朋友俾咗啲咩回覆你?你話男朋友都有隱瞞你佢哋嘅溝通間距,咁你係透過男朋友自己講出嚟吖定係你睇佢手機嘅時候發現呢?佢係主動俾電話你睇定係你自己私底下發現?呢兩個都有唔同嘅分別,如果係男朋友主動俾你睇嘅話呢表示佢都覺得自己係冇乜嘢唔怕俾你睇,咁但係如果係你私底下睇嘅話呢佢可能會覺得你唔尊重佢,我亦都覺得如果你再想同你男朋友溝通呢個問題嘅時候,你哋都可以界定一下你哋覺得朋友同男女朋友之間嘅界線,佢會唔會覺得其實只要係異性朋友都可以keep住一個長嘅contact,唔係因為佢係ex所以先要keep住contact?可能你哋兩個喺呢啲界線上面會有唔同嘅認知,咁你哋可能需要溝通之後再作出磨合。你不妨可以問吓佢佢覺得嘅冇信任係指發生相同情況下你唔應該有任何介意呀定係點樣呢?試吓同佢講如果佢係當事人嘅話(亦即係你嘅立場),咁如果佢遇到呢個情形佢會有啲咩反應呢?咁樣佢可能會更加設身處地咁喺你嘅角度明白你嘅諗法。

而你話男朋友對你嘅態度因為呢件事而有改變呢,有機會係因為佢唔希望你因為知道佢個ex喺現場,令到你內心又會有不安全嘅感覺,所以可能就選擇唔同你講:see_no_evil:咁當然啦佢唔一定係因為有啲咩所以特登隱瞞你嘅,有機會係唔想你哋再因為呢啲事而有爭執,再者你講關於佢哋溝通嘅頻率問題,見到你下面都有講返,你男朋友嘅朋友圈都比較細,而佢哋都有啲共同嘅朋友圈,佢哋溝通頻密有機會係可能你男朋友同佢個ex因為有共同嘅朋友圈,所以就有啲公司又或者佢哋共同知道嘅事去呻下,講到有共鳴嘅時候就變得頻密左,同埋我覺得你男朋友其實都有將你放喺一定重要嘅位置,因為如果佢真係同佢以前嘅ex仲有一啲情愫嘅話,我相信佢都應該唔會特登post你上Social Media,而且佢都有主動去邀請你去佢屋企食飯介紹屋企人俾你識:thinking:,不過你講咁樣都唔代表ex嘅問題處理咗,其實都係嘅,因為佢喺某啲方面比你嘅安全感,唔等同於將之前嘅事情抵消晒,其實會唔會係你所需要嘅love language吾只係佢會post相上social media呢?一件事還一件事,你需要同男朋友講返你覺得係呢件事上你覺得唔受尊重嘅地方喺邊,比佢知道你既感受,需要正視問題,唔係話要完全唔好同任何異性有聯繫,而係需要喺某程度上避嫌。其實以上你都好在乎你男朋友嘅感受,唔想局限左佢嘅私人空間,但係好多時候你都冇諗過自己嘅感受,所以你可以嘗試係中間取得平衡。

不過調返轉頭你會唔會都有啲比較好傾啲嘅異性朋友?其實我覺得又唔可以話你係因為太執着所以咁樣,應該係話你係戀愛關係裏面太在乎一個人,所以你會將一啲人哋覺得小既事情可能會比較放大左,導致你覺得自己有時會好似好小氣,又或者會憎你男朋友個ex,你應該要正面去面對自己嘅感受,其實你有呢一種感受係好正常,相反咁樣會比你更加了解自己嘅需要。其次,喺愛情入邊每個人期望得到同付出既野都吾同,所以都需要多作溝通平衡翻雙方既意見,你哋係有任何事情發生嘅時候都應該正面溝通,你都應該要同男朋友坦誠去講自己嘅感受,嘗試解決件事,而且都見到你提及你依家好焦慮,我覺得你都可以開拓自己嘅朋友圈,又或者一啲興趣去令自己分散吓呢個問題嘅注意力,因為如果佢哋冇啲乜嘢嘅話你自己一直都唔開心咁其實都好影響到你嘅生活,亦或者佢哋係真係有啲乜嘢嘅話其實你唔開心都解決唔到件事情㗎嘛,希望我上面嘅建議可以幫到你,如果你仲有問題嘅話亦都可以喺下邊繼續留言🫂

(Intern同學 Yee)