我同佢算係咩關係?

話說同呢個男仔識左超過一年,上一個月去佢屋企同佢煲劇,佢無啦啦瞓係我大脾上面仲拖埋我隻手,但係當日出到街又好似無事發生咁。
直到上星期,同佢去睇展覽,佢全程都攬住/拖住/疊住我膊頭,仲間中十指緊扣我,第二日仲同佢一齊去camp,兩個人瞓埋一齊,佢都會攬住我瞓,出街都係會拖住我,但係最大問題係,佢無表明我地係咩關係,過左個週未,幾日都唔搵我傾計:woman_shrugging:t3:,做咩事?

Hello~聽到你喺呢段關係裏面有啲迷惘同矛盾:disappointed:,可能係因為對方有啲嘅舉動僭越左你對於朋友嘅界線,有啲過分親密左。但係又因為你哋之間冇確認關係,所以唔肯定同佢之間係朋友定情侶關係。

其實唔同人嘅個人界線都唔同,有人覺得只要係朋友就可以拖手,但亦有人覺得要情侶先至可以拖手:face_with_monocle:。所以喺知道對方嘅諗法同個人界線之前,我哋係好難去判斷兩個人之間嘅關係嘅。當然,喺大部份人嘅眼中,你所講嘅行為,例如瞓喺大髀上面,一齊瞓覺等,都係要情侶先至可以做嘅。但係唔排除對方唔係咁諗,可能喺佢嘅眼中,喺朋友就做得,咁就有機會造成誤會:tired_face:

呢度都有幾條問題想你諗下:

  1. 你對於佢以上嘅舉動有冇反感?內心有冇抗拒?
  2. 對於你來講,呢啲舉動要係咩關係先至可以做?你希望同佢發展一段咩關係?
  3. 佢對其他朋友嘅態度同埋舉動係咪同對你嘅一樣?

首先,如果佢做嘅舉動係令你唔舒服嘅話,咁你應該明確咁拒絕佢。要坦白咁同佢講你嘅感受,同埋要推開佢,俾佢知道你唔鍾意佢咁樣做:persevere:。如果佢嘅說話/行為/舉止含有性意味,而喺未確認你嘅意願下就講出嚟/做咗,咁有機會構成性暴力/性騷擾。如果溝通後,對方仍然唔配合,繼續做出以上嘅舉動,可以向專業人士求助/報警處理。

呢度我哋都會建議你主動同佢講你嘅諗法同感受,比對方知道佢嘅呢啲行為會令你產生疑慮。如果對方無意同你發展落去,咁就要請佢唔好再做出令你誤會嘅行為。喺任何一段關係裏面,清晰嘅個人界線都好重要,對於唔同人我哋嘅界線可能有唔同,而正正因為我哋好重視呢段關係,所以對於一啲越界嘅行為,我哋可能會選擇視而不見/忍耐接受。但係咁樣對於一段關係係唔健康嘅:face_with_head_bandage:,坦白嘅溝通好重要。如果你同佢想發展嘅關係唔一樣,咁就需要溝通,取得共識,唔應該一退再退。

如果你唔未有勇氣直接問佢,都可以先觀察一下佢同其他朋友嘅相處模式,或者問下共同嘅朋友,有冇類似嘅相處經歷。你亦都可以先關心佢嘅近況,再問佢做出以上舉動嘅原因係咩,然後先講自己嘅感受:relieved:

喺一段親密關係裏面,最緊要係要有坦誠嘅溝通,只有將諗法同感受確切地表達出嚟,對方先可以完全地明白同理解,從而避免產生誤會。

希望以上嘅資訊可以幫到你啦🫶🏻:heartpulse:

我對呢啲接觸唔反感,因為我唔係好夠膽直接問佢,所以好苦惱。又驚自己表錯情,無理由係公眾地方都咁自然拖住我,唔怕俾人睇到,而我知佢應該無其他異性朋友,唉

咁你可以試吓旁敲側擊咁問下佢對於愛情嘅睇法~例如理想型係點,對戀愛有咩期望,最近有冇拍拖嘅計劃或者在意嘅人等等。同時你都可以借呢個機會分享自己嘅諗法,同埋俾啲暗示對方:face_with_hand_over_mouth:見到你話之前去過佢屋企煲劇,利用電視劇裏面嘅人物關係去開展戀愛話題都係一個唔錯嘅選擇~