上上次嚟M係6月17，上個月7月1號食事後丸，7月25日嚟m，之後有性行為到8月26日尚未有月經所以就驗過一次孕，會唔會有咗好驚
Hello～多謝你嘅發問！
睇翻你嘅問題先，事後丸因為入面含有高質量嘅人造荷爾蒙，所以食完之後有機會會令到之後經期提早或者延遲，除左事後丸之外，平時嘅飲食，作息時間，情緒波動同生病等都有可能會令經期有變動。都睇得出你好擔心自己會有懷孕，但因為未知道7月25日之後嘅性行為你有冇使用安全措施，所以我哋都未能初步判斷你有冇意外懷孕嘅機會。
有關於驗孕，因為驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。所以如果你喺最後一次性行為後11日進行驗孕，而且正確使用驗孕棒嘅話，結果會非常準確。
(Intern同學 tommy)
全部性行為都有安全措施
最後一次性行為係喺8月23有戴安全套
Hello～多謝你嘅發問！
如果你所有嘅性行為都有採取安全措施，而且安全套冇穿亦都冇漏嘅話，其實你懷孕嘅風險係好低嘅。
如果你比較擔心8月23日發生性行為會有懷孕風險嘅話，你可以考慮喺呢次性行為後嘅7日（8月30號）進行一次驗孕，可以有一個初步嘅結果；亦都可以喺第11（9月3日）進行驗孕，咁樣就可以得到一個準確嘅驗孕結果。
現時多數驗孕棒都有好高靈敏度（sensitivity）同埋特異性（specificity），驗孕棒出嚟嘅結果都會有好高嘅準確性，所以你可以放心相信驗孕棒嘅結果！
另外都想喺呢度同你解釋一下，其實有好多原因都會影響月經周期，例如：荷爾蒙失調、生活作息、飲食習慣、服用藥物、情緒壓力等，都會影響咗我哋嚟月經嘅時間，每人每次月經週期都可能會唔同。加上，你有服用過事後丸，都有機會令到你最近1-2個月經周期受到影響。
希望以上嘅資料幫到你～
(Intern同學 Nicole)