安全套甩左

星期六同男朋友有帶套做左 但中途個套甩左 即刻停左拎翻出黎 搵到個套陰道裏面 最近5個月都有用月經app track住啲經期 suppose 下星期五就黎 而個情況下仲需唔需要食事後丸? thank you

Hello~多謝你嘅發問!

首先,欣賞你喺進行性行為嘅時候有使用到安全措施。都想問番清楚安全套甩咗嘅時候,係射精前定係射精後?如果係射精前嘅話,有機會有透明嘅黏性分泌物叫尿道球腺液(有機會含有少量精子)流入陰道,都有一定嘅懷孕嘅風險;如果係射精後嘅話,精液連同精子流入陰道,咁樣嘅話懷孕嘅機率就會相對比較高。

另外都見你提到想根據月經去判斷自己有冇懷孕,都想喺呢度同你解釋一下,其實有好多原因都會影響月經周期,例如:荷爾蒙失調、生活作息、飲食習慣、服用藥物、情緒壓力等,都會影響咗我哋嚟月經嘅時間,每人每次月經週期都可能會唔同。所以用一啲app去預計幾時嚟m未必準確,因為app只係基於你之前嘅月經週期數據,唔會考慮你其他嘅身體因素。無論月經週期嘅邊一日,只要陰道/陰道口同精液/尿道球腺液有接觸,咁就會有一定嘅風險。

你可以因應你嘅情況考慮服用事後丸。事後丸係香港係需要醫生處方嘅藥物,而且有分性行為後72小時或者120小時內服用兩種。你可以選擇盡快去家計會診所、母嬰健康院、普通私家門診或者婦科診所,等醫生判斷適合你嘅緊急避孕方法。

如果你衡量完風險決定唔進行緊急避孕,而比較擔心自己會懷孕嘅話,都建議你可以考慮驗孕。驗孕棒係透過檢測尿液中嘅HCG(人絨毛膜促性腺激素)含量嚟判斷有無懷孕,因為只有受精卵成功著床嘅女性身體先會會開始分泌HCG,通常卵子受精著床時間就會係6-9日,咁通常性行為7日後(9月3號)就會有初步嘅結果,11日後(9月7號)就會有相對準確嘅結果。

另外,都見到你有提到喺過程中安全套甩咗出嚟,咁好有可能係你伴侶使用嘅安全套尺寸唔太適合,建議可以度下同揀返適合自己嘅尺寸;合適嘅避孕套應該貼緊陰莖唔會有鬆嘅感覺。不過都可能係唔同剪裁嘅分別,如果而家自己用緊嗰隻係啱size嘅話,可以試吓其他牌子睇吓情況有冇好啲。糖不甩 Sticky Rice Love on Instagram: "上一個post分享咗10個容易令安全套失效嘅原因,而用咗唔啱尺寸嘅安全套係其中一個好常見嘅原因🥺,所以今次就同大家分享買安全套之前要點樣量度同揀合適自己嘅尺寸~ 同揀衫一樣,揀安全套都要由量度將要使用安全套嘅物件(例如陰莖或者性玩具)嘅闊度同長度開始📏。要留意返大部份安全套嘅量度單位係毫米(mm),所以使用軟尺量度嘅時候要記住轉換返個單位。  💫 【闊度/寛度 Norminal Width】量度陰莖/物件最粗嘅位置(通常根部)嘅圓周,再除以2(可以想像將安全套㩒偏橫向嘅長度) 👉例子:軟尺上量度嘅圓周係10cm,首先將數字乘以10,10 X 10 =100 (mm)。100 除以二,100/2 = 50mm,就可以得出安全套嘅闊度。  💫 【直徑 Diameter】量度陰莖/物件最粗嘅位置(通常根部)嘅圓周,再除以3.14。 👉例子:軟尺上量度嘅圓周係10cm,首先將數字乘以10,10 X 10 =100 (mm)。100除以3.14,100/3.14 = 31.8,就可以得出安全套嘅直俓。  💫 【長度】由陰莖/物件嘅根部量度到頂點 👉例子:軟尺上量度嘅數字係12cm,就要將數字乘以10,12 X 10 = 120 (mm)。 不過大部份安全套都有足夠嘅延展性,所以好少會有唔夠長嘅情況出現(大家可能都見過有人用安全套嚟吹波,證明係可以包覆到有一定嘅長度嘅)。同一時間,亦唔少安全套牌子係無喺包裝上特別列明長度嘅數字架。  另外安全套所屬嘅品牌國家唔一樣,都會有唔一樣嘅尺寸參考~歐美同香港品牌通常都會標示【寛度】,而日本品牌就通常會標示【直徑】。有時亦會見到個數字後面寫住「± 2mm」「± 5mm」等等,例如:「寛度58±2mm」,就代表呢個安全套可以被量度為56~60mm嘅物件使用。  💫 購買小貼士 1️⃣ 尺寸要預先量度先至會知😏,所以都建議大家係屋企預先度過尺寸至去唔同生活用品鋪頭又或者sex toy shop購買~  2️⃣ 另外都明白大家情到濃時,可能會好突然或者即興要買安全套,又或者啱啱好用完手頭上嘅安全套,想嘗試下唔同新嘅牌子同款式。係呢啲情況下買嘅時候,都建議唔好買太大數量嘅包裝,因為都唔知道自己又或者對方適唔適應😟。而且即使標明係同一個尺寸,唔同牌子或者唔同材質所造嘅安全套係佩戴之後都可能有唔一樣嘅體感🚨。所以都建議買返1~3片裝試一試先,啱用再大手購入~  3️⃣使用安全套嘅時候,佩戴後嘅感覺應該係唔鬆唔緊,啱啱好貼住至係合適🧣~ 如果因為尺寸太大或者太細,就有可能令安全套係過程中破損💥。詳情可以睇返我地上一篇文:10個令安全套失效嘅原因!  4️⃣ 依家有越來越多嘅安全套牌子,有啲未必會係包裝上標明尺寸,例如闊度、直徑、長度... 但好多成人用品商店都會係佢地網站列出呢啲資料,係購買之前都可以自己搜集下資料了解下先,或者直接去門市向向店員查詢🙋🏻。  希望呢個post 可以幫到大家了解量度尺寸都有唔同要留意嘅地方,減低係用安全套嘅時候出現突發嘅意外啦🦺~  TEXT: CLAIRE ——————————————— 糖不甩|性教育|網上性健康平台💛 對性/性別/關係...有疑問?想搵人傾下? 糖不甩討論區隨時ready答你問題!識揀,一定揀糖不甩! Discuss.stickyricelove.com   #stickyricelove #糖不甩 #sexeducationhk #性 #性教育 #gender #relationships #sex #hksex #hklove #hkboys #hkgirls #安全套 #condom #套套 #安全套爛咗 #安全套爆咗 #安全套尺寸 #大碼套套 #SlimFit套套 #SRL安全套"
你可以參考吓呢一個IG post,幫助你同伴侶搵到一個適合你哋用嘅安全套。或者可能佩戴安全套嘅時候冇戴落陰莖嘅底部,咁安全套就可能喺性行為期間脫落。安全套嘅正確佩戴方法可以參考:
糖不甩 Sticky Rice Love on Instagram: "《Stickypedia系列-安全性行為:第一寶》 講起安全套,大家都會直接聯想到「男用安全套」,呢樣產品方便易用,可以避孕又可以預防性病傳播,如果100%正確使用佢嘅避孕率可以高達92%[1]。但世事係無咁完美嘅,男用安全套有大概13%失敗率[2],而最常導致安全套「唔安全」嘅原因包括 🤭掉轉正反面 🤭無將儲精囊內嘅空氣擠出 🤭無戴到最底 🤭唔係整個性交過程都戴住 🤭潤滑度不足 🤭用咗唔啱嘅尺寸 嗯...驟眼睇大部份意外都係戴嘅期間出咗事,所以今次Stickypedia小百科想同大家詳細講下到底點樣「正確使用安全套」。除咗留意圖2同圖3嘅教學,向左滑最後仲有短片(圖4)示範架~ 雖然佢叫做「男用」,但其實唔係只係男性可以用於陰莖上架。安全套可以係指交,探肛,自慰時使用,亦可以用於唔同嘅性玩具。不同形式嘅性接觸都有機會傳播性病,所以係不論性別/性傾向/性行為取向都可以使用安全套去保護自己同他人,仲可以減低刮傷脆弱黏膜造成傷口嘅機會。 潤滑度嘅問題,我哋會係「第二寶-潤滑劑」再同大家詳細介紹同解釋。知道大家都會好好奇咁點先可以揀到最適合自己嘅套套,唔駛擔心,下一期嘅Stickypedia就會圍繞安全套嘅五大要點,仲會講下「女用安全套」呢樣神秘嘅產品~ 📚 [1] Trussell, J., & Guthrie, K. A. (2007). Choosing a contraceptive: efficacy, safety, and personal considerations. Hatcher RA, Trussell J, Nelson AL, Cates W, Stewart FH, Kowal D. Contraceptive technology. 19th revised ed. New York (NY): Ardent Media, Inc, 19-47. [2] Trussell, J., Aiken, A. R. A., Micks, E., & Guthrie, K. A. (2018). Efficacy, safety, and personal considerations. Contraceptive technology. 21st ed. New York, NY: Ayer Company Publishers, Inc. ——————————————— Come talk to us! 糖不甩討論區有性治療師同義工答你問題!識揀,一定揀糖不甩! Discuss.stickyricelove.com #stickypedia #stickyricelove #糖不甩 #stickypediasafersex #stickypedia安全性行為 #condom #安全套 #五大寶品 #缺一不可 #sexeducationhk #性 #性教育 #gender #relationships #sex #hksex #hklove #hkboys #hkgirls"

希望以上嘅答覆可以幫到你~

(Intern同學 Nicole)