我同條仔三個禮拜冇扑嘢
之前扑嘢都係有戴套+就算戴咗都唔會射喺裏面係掹咗出嚟先射
我上個月中嚟M
而家已經30號仲未嚟…
驗過三次都冇中
但係我見話驗孕棒會受藥物影響
我其中一次打完針食咗止痛藥再驗
我真係好驚有咗
我想問我有幾多機會有咗？？？
因為保險套有可能本身有損毁
另外驗孕棒都唔係100%準確
Hello～多謝你嘅發問！
首先，都好欣賞你去進行性行為嘅時候有採取到安全措施！係呢度都想同你解釋一下，其實月經嘅出現並冇一個特定嘅時間，因為月經本身就可以比好多唔同因素影響到，例如：荷爾蒙水平、生活習慣、飲食習慣、情緒波動、生病、服用藥物等，甚至有時一啲我哋冇留意到嘅事件，都有機會係影響到月經出現變化嘅原因，所以仲未嚟M唔代表係懷孕。甚至你提及有打針食止痛藥呢啲嘢，都可能會影響經期。另外都想了解下你所講嘅打針係咩針？如果係疫苗嘅話，都有機會因為免疫系統負荷而影響咗月經。
驗孕棒嘅結果的確有機會受到藥物嘅影響，睇返其實你只係有1次嘅驗孕係有機會受藥物嘅影響，而其餘兩次都係正常嘅情況下驗，而結果都係陰性，顯示你冇懷孕。但係，你都可以睇返你最近3次嘅驗孕時間係幾時，如果喺11日之後有進行驗孕，而且有跟住說明書嘅指示去做，而出嚟嘅結果係陰性，顯示你冇懷孕嘅話，你都可以相信驗孕棒出嚟嘅結果。因為現時市面上嘅驗孕棒都有好高嘅靈敏度同特異性，出嚟嘅結果都有好高嘅準確度。所以如果你三次嘅驗孕結果都係陰性，咁其實你懷孕嘅機會真係好微。一般來講，止痛藥同埋日常藥物係唔會影響到驗孕結果，你可以唔使咁擔心。
另外，見你都有提到避孕套本身可能有損毁。如果擔心呢樣嘢嘅話，你可以選擇喺進行性行為前睇吓安全套有冇過期或者漏氣。完事之後，都可以往安全套入面注水，睇吓會唔會漏水，或者攞紙巾抹下睇吓會唔會滲水。
詳細使用安全套嘅做法你都可以參考吓呢條link：
https://www.instagram.com/p/B4EX0FVFLUf/?igshid=YmMyMTA2M2Y=
希望以上嘅資訊幫到你！
(Intern同學 Nicole)