女朋友本身有食開事前避孕丸
應該有三個月多
但是28/8跟她無套sex
29/8她跟我說尿炎
她去了藥房買一些中成藥
想問一下這些中成藥
會不會影響避孕丸的作用？
和我女朋友8/9，因為周期停藥
9/9如要sex需要帶套嗎？
補充
29/8-30/8
尿道炎藥
吃咗兩次藥就停了
Hello～多謝你嘅發問！
關於避孕藥方面，的確有啲藥物有機會影響避孕藥嘅藥效，例如某啲抗生素、消炎藥、抗抑鬱藥、治療失眠嘅藥物、貫葉連翹（St John’s wort）等，如果女朋友食嘅藥唔係抗生素嘅話，理論上係唔會影響避孕藥嘅功效嘅。不過可以養成習慣，食緊避孕藥嘅時候，如果有需要食其他藥，食藥之前可以諮詢下醫生意見，睇下隻藥對避孕功效有冇影響，需唔需要使用埋安全套，或者錯開食藥時間。
不過就住尿道炎呢樣嘢都有啲嘢想你哋知道，我哋建議如果有尿道炎可以去睇下醫生，檢查下係咩原因，如果有需要，醫生亦都可以俾抗生素或者有針對性嘅藥去進行治療。如果自己買藥食，可能隻藥唔啱食，反而對身體有影響；甚至會導致尿道炎反覆返發。而且如果女朋友係性行為之後尿道炎出現，我哋建議你都去做下檢查，有時可能陰莖有感染但係冇任何病徵，性行為嘅時候就會傳俾性伴侶令對方感染。同時，如果喺係女朋友出現尿道炎之後發生性行為，有機會有細菌依附喺陰莖上，甚至透過陰莖口感染到細菌。簡單來講，係女朋友未完全好返之前，同佢發生性行為都有機會受到感染。建議你哋都盡快去家計會診所／母嬰健康院／部分私家診所做下檢查。同埋性行為前後做好清潔，考慮使用安全套避免尿道炎或者其他感染。同埋建議尿道炎未完全康復之前，都唔好進行性行為住。
如果女朋友食嘅嗰款避孕藥中間係需要停藥嘅，如果佢每日有準時食藥、中間冇漏食、冇嘔吐或者嚴重腹瀉，咁停藥期間佢嘅身體依然有避孕功效。
希望以上嘅答覆幫到你～
(Intern同學 Nicole)
多謝解答
但是如果我不清楚這隻藥是不是抗生素
最保險的方法是不是七天後才可以無套sex?
明白你都好有需要，但係真係建議等女朋友尿道炎康復返先進行性行為，因為如果未康復又有性行為，係會有再次感染同互相感染嘅風險，無論對你或者女朋友都係一件唔太好嘅事。
至於果啲中成藥物係咪有抗生素，建議你俾醫生睇下先，因為之前都有講到，除咗抗生素之外，消炎藥、抗抑鬱藥、治療失眠嘅藥物、貫葉連翹（St John’s wort）等，都會影響避孕藥嘅功效嘅。
同埋都建議你同女朋友一齊去做檢查，好似上面咁講，「有時可能陰莖有感染但係冇任何病徵，性行為嘅時候就會傳俾性伴侶令對方感染。同時，如果喺係女朋友出現尿道炎之後發生性行為，有機會有細菌依附喺陰莖上，甚至透過陰莖口感染到細菌。」
如果真係好迫切要發生性行為，呢段時間都建議你戴安全套，去避免細菌感染嘅情況，同時亦都可以防止懷孕架。
多謝詳盡嘅解答
一定係身體有事我明白,我只不過上網看到很多關於這些，所謂的醫生言論想求個明白
一定是女朋友身體優先
因為香港這方面知識真係很少
而女朋友都很擔心
麻煩管理員了謝謝
1個讚