又驚有BB

自從第一次之後就冇發生過性行為
直至到八月六
咁嗰陣時我就嚟緊m
結果就同嗰個人衝紅燈:woman_facepalming:t2:
結果下個星期八月13都有做
但係嗰陣時望過日曆係安全期
然之後再下星期八月20
咁我自己大意 以為係安全期
結果做完之後先發現原來唔係
咁但係我哋要做足安全措施
有帶避孕套
亦有check過冇穿
但係之後同個男仔kiss嗰陣時
佢有分泌啲前列腺
因為佢同我差唔多高
好驚佢hi到我下面
但最後好似冇

咁然之後但係今日4/9未開始嚟M
但係其實應該都會遲一兩日 正常今日都係依家未嚟M
因為星期一先係
但係我好擔心冇嚟M
跟住又咁啱唔知係唔係我好大壓力
我個人就好唔舒服
個肚好漲
不過有可能係因為今日太大壓力係咁食嘢
食到個人想嘔
但係我就唔知關唔關事
因為最近啲一個一個肚都好漲
個人又好燥底
希望係就嚟M
我有諗住用驗孕棒
但係屋企成日都有人
又會咁啱中咗新冠
用唔知有冇影響
所以就好驚

Hello! 多謝你嘅發問~

首先,都想了解返你睇到「衝紅燈」嗰一日有冇佩戴到安全套?如果冇佩戴安全套嘅話,會有小小嘅懷孕風險。即使喺排卵期或來月經期間,進行冇套性行為都未必一定係安全,所以建議你喺進行任何性行為嘅時候全程都一定要佩戴好安全套,除咗可以避免懷孕之外,亦可以同時避免傳染/感染性病。

你喺男方射精之後再掂到嘅液體有機會係殘餘嘅精液,亦有可能係尿道球腺液。前列腺液係精液嘅一部份,係唔會單獨存在。尿道球腺液會喺陰莖受到刺激嘅時候,分泌出嚟嘅透明黏性分泌物,當中有機會含有少量精子;而精液係男方性高潮嘅時候釋放出嚟嘅液體。但精子只要接觸到空氣、其他物質(e.g.衣物)或者有溫度改變好快就會死亡。所以導致你懷孕你懷孕嘅機率都好微。

都見到你有嘗試用安全期去估計自己懷孕嘅風險,但其實用計算安全期去避孕並唔係一個可靠嘅方法,因為每個女仔嘅月經周期唔一樣,而且月經好易受外在因素影響(例如荷爾蒙水平、飲食、壓力等等),週期亦會隨之而改變,變相亦較難準確推算出一個絕對安全的日期。

另外都補充下,「安全期」係想避開「排卵期」(所謂嘅「危險期」),不過排卵其實係要等月經出現之後先可以推算返排卵日係幾時,除非每日都用排卵試紙去測試,否則我地可能準確咁知道究竟邊一日會排卵。而「安全期」期間都係需要使用安全措施嘅,因為排卵會受好多因素影響,如果冇使用安全措施發生咗性行為,而喺所謂嘅「安全期」有排卵嘅話,就會有懷孕風險。所以唔建議使用「安全期」作為避孕方法。

建議你同伴侶每次發生性行為嘅時候都使用安全套,,亦可以考慮即使唔發生插入式嘅性行為都使用安全套,避免精液/尿道球腺液意外接觸到陰道/陰道口造成懷孕風險。或者如果你擔心射精後除咗套陰莖同陰道口接觸到會有風險,可以考慮你哋兩個都著返底褲先,有阻隔。

你可以參考以下呢個IG post,睇吓正確使用安全套嘅方法:
https://www.instagram.com/p/B4EX0FVFLUf/?igshid=YmMyMTA2M2Y=

或者你亦可以根據需要使用避孕藥/避孕針/子宮環呢啲安全措施,喺正確使用嘅情況下有好高嘅避孕成功率。可以去家計會診所/母嬰健康院/部分私家診所睇醫生檢查身體,然後選用適合你嘅避孕措施。

另外,都想同你解釋翻,月經係由幾個繁複嘅身體系統互相配合而形成,所以好容易受到唔同身體因素影響,例如荷爾蒙分泌、飲食習慣、作息、壓力、藥物、生病等等。所以其實每人每次月經嘅情況(例如月經週期長度、流血量、流血日數、經血顏色/質地、經痛程度、經前不適情況等等)都有可能唔同,但唔代表係懷孕。而新冠肺炎對身體嘅影響都比較大,所以都有機會因為咁樣而影響咗你嘅月經。例如你喺感染期間,免疫系統感受到壓力,令身體其他系統都受到影響,當中有機會包括你嘅月經情況。甚至係感染期間影響咗你嘅食慾/情緒,都會影響咗你嘅月經周期。

最後,驗孕棒係透過檢測尿液內嘅hCG(人絨毛膜促性腺激素)水平去判斷有無懷孕,呢種激素會係成功受精著床後開始分泌。而感染新冠病毒並唔會影響對hCG嘅分泌,所以你都可以放心相信驗孕出嚟嘅結果。一般受精著床嘅過程需要6-9日,所以建議你係性行為發生至少7日後先驗孕,會得到初步結果,而係性行為發生11日後會更加準確。

保重身體啊!
希望以上嘅答覆可以幫到你~

(Intern同學 Nicole)

我對上一次係20/8 之後亦冇進行過任何形式嘅性行為

但係我到而家都仲未黎m

啱啱用驗孕棒check咗都冇事

咁係唔係真係Safe

Hello~多謝你嘅發問!
首先,見到你話你20號之後都冇再進行過任何形式嘅性行為,而距離你最後一次性行為已經過咗超過14日,其實只要係最後一次性行為11日之後,已經相對係準確,所以如果你驗孕嘅結果係冇懷孕嘅話,都唔需要擔心🫂,因為懷孕嘅機率吾高,希望我以上嘅資料可以幫到你,如果你再有其他疑問嘅話都可以繼續留言:relaxed:

(Intern 同學 Yee)