月經遲左10幾日冇來

大概2星期前同男友互摸,男友手上有些前列腺液可能碰到我的下面,沒有太深入。
之後過了一星期半,出現噁心和反胃,第二天更出現睡不飽的問題,睡了幾次也不飽,之後第三天噁心減弱了,但「波」脹了,按下去有點痛,第四天一樣,但是頭暈所以反胃,沒有噁心感,下午睡了一會之後起來就正常了,但第五天又好像十分累了。
上次時間為27號,平時大概在26-30天來,最遲先31天,現在39天了,還沒有來,十分害怕懷孕了,有人清楚我身體可能發生了甚麼事?

Hello! 多謝你嘅發問~

前列腺液係精液嘅一部份,係唔會單獨存在;而你提到嘅分泌物應該係尿道球腺液,係喺陰莖受到刺激嘅時候,分泌嘅透明黏性分泌物,當中有機會含有少量精子。但精子只要接觸到空氣、其他物質(e.g.衣物)或者有溫度改變好快就會死亡。如果男朋友接觸到分泌物再掂到你嘅陰道/陰道口之間有段時間,精子喺你男朋友嘅手上停留過,再觸碰到你下體,過程中精子已經死亡,所以你懷孕嘅機會都好微。但如果係直接接觸到尿道/陰道口,咁都有一定嘅懷孕風險。所以你可以諗返當日嘅接觸係點,建議你都可以考慮驗孕去排除懷孕。

你可以用驗孕棒進行一次驗孕。驗孕棒係透過檢測尿液內嘅hCG(人絨毛膜促性腺激素)水平去判斷有無懷孕,呢種激素會係成功受精著床後開始分泌。而一般受精著床嘅過程需要6-9日,所以會建議係性行為發生至少7日後先驗孕,會得到初步結果,而係性行為發生11日後會更加準確。見你距離性行為都過咗兩個星期,咁係呢段時間驗孕得出嚟嘅結果到會好準確。排除咗懷孕,你就可以耐心等月經出現。

而你都提到身體有啲不適,例如:嘔心、反胃、頭暈、睡眠不足、胸脹等,有機會因為來經前、荷爾蒙嘅轉變、排卵期嘅徵狀所導致,未必係因為懷孕而出現。你都可以留意吓會唔會係因為最近壓力太大,所以出現呢啲情況。如果呢啲唔舒服嘅症狀持續或者加劇左嘅話,都可以考慮向醫護人員諮詢一下,因為單憑你嘅文字,我哋唔能夠好清楚咁了解你身體發生咩事。

另外,都想同你解釋一下,月經係由幾個繁複嘅身體系統互相配合而形成,所以好容易受到唔同身體因素影響,例如荷爾蒙分泌、飲食習慣、作息、壓力、藥物、生病等等。所以其實每人每次月經嘅情況(例如月經週期長度、流血量、流血日數、經血顏色/質地、經痛程度、經前不適情況等等)都有可能唔同,但唔代表係懷孕先會延遲嚟月經。見你都有提到最近好大壓力同埋有啲唔舒服,都有可能係因為咁樣而導致你嘅月經延遲。

最後,都建議你下次同伴侶接觸性器官之前要清潔雙手,可以考慮即使唔發生插入式嘅性行為都使用安全套,避免精液/尿道球腺液意外接觸到陰道/陰道口造成懷孕風險。

你可以參考以下呢個IG post,睇吓正確使用安全套嘅方法:
https://www.instagram.com/p/B4EX0FVFLUf/?igshid=YmMyMTA2M2Y=

希望以上嘅資訊可以幫到你~

(Intern同學 Nicole)

好的謝謝,還有一個問題,今天除了起床比較累之外,基本沒事了,但月經還是沒來,症狀的減緩是不是有可能代表月經快到了?

目前已經驗了,是negative,症狀也消失得七七八八,基本沒事了,但我還沒來月經,症狀的消失是不是代表月經快來?我想知道~謝謝了

Hello! 多謝你嘅再次發問~

咁我哋上一個回覆都提到其實月經唔穩定其實都好常見,導致月經遲嚟嘅原因有好多,排除左懷孕嘅原因,你可以留意吓會唔會係上面睇到嘅原因而影響咗月經。除此之外,有時可能有啲細微嘅情緒轉變/壓力你冇輕易察覺到,都有機會導致月經延遲,所以你都唔需要太擔心住。

另外,你提到嘅嗰啲症狀有機會代表月經就嚟到,但都重申一次,因為我哋並唔係專業嘅醫護人士,唔可以好準確咁判斷到你嘅情況係因為就嚟嚟月經定係因為其他因素。

見你都比較擔心自己嘅身體狀況,喺度都建議你可以去婦科睇一睇,醫生都會幫你檢查同視乎情況睇下需唔需要開啲催經嘅藥俾你,亦都有機會會幫你做啲婦科檢查,例如:腹部超聲波、子宮內膜活檢、抽血化驗等,呢啲都係比較常見嘅婦科檢查。有需要可以預約家計會診所/母嬰健康院/私家醫療機構等睇醫生了解下自己嘅身體情況。

希望以上嘅資訊可以幫到你~

(Intern同學 Nicole)

非常感謝呀~現在出現嚴重偏頭痛,希望多等幾天月經就來,非常感謝你的解答啊~ o((^▽^))o