避孕藥食多左點算?

食咗避孕藥兩年左右
今日發現食完1pack 24粒之後又繼續食咗4日
即刻本身食到13號就要停4日,點知我計錯左食到琴日(17號)
想請問我而家係咪應該停4日,然後開新1pack,定係黎m第一日就開始食?會唔會影響避孕效果?thanks :bowing_woman:t2::bowing_woman:t2:

Hello
如果你一直都有食藥,如果呢排冇嘔吐或者嚴重腹瀉,其實身體應該一直都有穩定嘅避孕功效嘅。

講少少避孕藥嘅原理俾你知先:避孕藥係用人造荷爾蒙去抑制排卵、增加子宮頸分泌物粘稠度、同埋改變子宮內膜環境,從而達致避孕功效。而食緊避孕藥嘅時候出現嘅「月經」其實係「撤退性出血」,即係食藥嘅24日身體有穩定嘅荷爾蒙水平,而停藥期間因為體內荷爾蒙水平下降,所以子宮內膜脫落出現好似月經咁嘅出血現象。

你而家已經食咗新一包藥嘅4日藥,你可以考慮繼續食藥,直至食完24粒先停藥,而咁樣係會導致冇「撤退性出血」發生,即係今個月本應有「月經」嘅日子唔會出現,原則上對身體冇乜影響嘅;或者你都可以停藥4日,然後4日後開一包新嘅藥重新開始食。呢兩種方法都會令到你嘅月經週期發生變化。 :blush: 如果你依然擔心嘅,都可以去諮詢醫護人員嘅意見。

另外,見你話都食咗藥2年,想提提你,食避孕藥每年都建議去睇下醫生,了解下自己嘅身體仲適唔適合食返呢隻藥。如果有需要,可以去家計會診所/母嬰健康院/部分私家診所預約睇醫生。 :woman_health_worker:t2: :man_health_worker:t2:

最後,建議你可以考慮用一啲專門提醒同記錄服藥情況嘅APP,咁就可以減少記錯食藥日期嘅機會啦。 :wink: