避孕藥同月經問題

我自己一直有食開一個牌子嘅避孕藥都有幾個月,上個月因為配唔切藥關係就臨急喺出面買咗另一隻牌子嚟食,今個月再食返原本嗰隻。但而家停藥咗幾日都仲未嚟月經,會唔會係藥物影響或者有懷孕風險?(十三日前有進行性行為,今日無用晨尿check但顯示無懷孕)如果到day8仍然未有月經,應唔應該開新一排嚟食?

Hello
如果你一直都有食避孕藥,冇嘔吐或者嚴重腹瀉,咁懷孕風險係好低微嘅,可以放鬆下先~ :wink:

解釋返少少避孕藥嘅原理俾你知先,避孕藥係通過人造荷爾蒙去抑制排卵、增加子宮頸分泌物粘稠度、同埋改變子宮內膜環境,從而達致避孕功效。正確使用嘅情況下避孕成功率有99%。而食緊避孕藥嗰陣出現嘅「月經」其實係「撤退性出血」,因為藥物控制,身體荷爾蒙水平下降(即係食緊藥/食緊含有荷爾蒙成份嘅活性藥丸嘅時候,身體有穩定嘅荷爾蒙水平,而停藥期/食緊非活性藥丸嘅時候,體內荷爾蒙水平就會變化),所以子宮內膜脫落,出現好似「月經」咁嘅現象。

不過每款避孕藥含有嘅人造荷爾蒙成份同劑量都唔同,有時轉藥可能令到身體需要重新適應過啲藥物入邊嘅荷爾蒙,所以可能出現你所講嘅冇「月經」出現嘅情況。而如果食緊低劑量/極低劑量荷爾蒙成份嘅避孕藥一段時間,都有機會出現經血量減少甚至冇月經出現嘅情況。

另外驗孕方面,通常性行為7日後驗孕會有初步結果,而11日後驗孕就會有相對準確嘅結果。如果你性行為13日之後,有正確咁使用驗孕棒,咁個陰性結果會係準確可靠嘅。 :blush:

即使月經未嚟,你都可以繼續食返原本食開嘅嗰隻避孕藥,如果你真係好擔心嘅,都可以諮詢下醫護人員嘅意見,可以預約家計會診所/母嬰健康院/部分私家診所見下醫生。 :woman_health_worker:t2: :man_health_worker:t2:

最後建議你可以買定一定量嘅避孕藥,或者開到最後一排藥嘅時候就要買定新嘅,避免買唔切藥;而且有幾盒後備喺屋企,就算食緊嗰排唔見咗,都可以唔使驚即日買唔到藥食。 :grimacing: