我而家喺外國讀書 但係聖誕同埋暑假都會返香港
之前因為經期唔準去睇醫生 醫生開咗兩個月避孕藥俾我 而家食緊 本來想一直食用嚟調經同埋返香港同男朋友sex就唔使戴套 因為我哋都唔鍾意戴
之前未開始食藥嘅時候都會唔戴套 嗰陣我經期唔准 所以都好驚會有bb 諗住而家有藥食 就可以安心唔洗戴
我覺得食避孕藥之後經期準左 皮膚好咗 但係我發現到自己最近容易咗唔開心 即係會容易諗啲負面嘅嘢 唔知呢個係咪避孕藥嘅副作用
所以我就想問下如果我淨係返香港嘅時候先食藥 喺外國嘅時候就唔食 咁樣食幾個月 之後又停幾個月 會唔會令到經期好亂或者有咩副作用
Thank you so much
Hello~多謝你嘅提問
首先，見到你話醫生開俾你嘅藥原本係用嚟調經嘅。雖然調經藥同避孕藥成份都係高劑量嘅荷爾蒙，但因為作用係調經，所以未必同避孕藥一樣有九成以上避孕效果（喺冇漏食嘅情況下），唔建議當作唯一嘅避孕措施。
另外，無論係調經藥定避孕藥，服用初期都可能會有噁心、頭暈、頭痛、乳房脹痛、水腫及情緒轉變等情況出現，但一般會喺數星期內消失。你話自己容易咗唔開心有機會係因為副作用，但日常生活嘅壓力都有機會係原因。
至於你話想喺香港嘅時候食藥，喺外國嘅時候就唔食，理論上唔係唔得，但我哋唔建議你咁做。因為間歇性服用同停食避孕藥會令佢嘅避孕效果差咗，而每次停食藥都有機會導致經期混亂，反而會對你本身經期就唔準嘅情況不利。
最後呢度都提一提你，如果你最後決定長期服用避孕藥，都應該經醫護人員評估之後，根據個別情況，再揀最合適自己嘅避孕丸。因為唔同牌子嘅避孕丸，配方入面嘅人造荷爾蒙成分都會有唔同，所以千祈唔好隨便買嚟食。至於每次服用避孕藥，都需要喺月經嘅頭五日內開始服食，每日一粒。如果喺月經來潮嘅第六日或以後先開始服用避孕丸，就要喺頭一個內加用外用避孕方法，如避孕套。
希望以上嘅資料幫到你🫶🏻
多謝你嘅回覆
醫生開俾我嗰隻係避孕藥嚟 我再考慮一下要唔要長食 主要係因為唔知食耐咗啲副作用係咪真係會消失同埋始終係藥唔想食咁多 所以都諗緊長食好唔好 目前來講都覺得避孕藥係最好嘅避孕方法 但如果最後決定唔長食 淨係返香港嗰陣先食 會唔會有方法可以減輕經期亂嘅情況
同埋想問下可唔可以用避孕藥延遲經期 我食緊21日嘅Yasmin 而家係停藥期嘅第五日(12/10) 本身應該第七日(14/10)就要開第二盒 請問係咪延遲開第二盒嘅時間就可以延遲經期 因為我12月返香港 1月頭就返英國 計咗日子 應該係返英國上機嗰陣會係嚟m最好嘅日子 所以想延遲三日 咁搭長途機就冇咁辛苦
想問一下如果我延遲開第二盒藥嘅時間係咪就可以延遲經期 thank you!
Hello～首先答咗你第一條問題先，因為避孕藥係高劑量嘅荷爾蒙藥，所以你停食嘅時候係一定會造成荷爾蒙嘅波動嘅，不過會唔會搞亂經期就好睇個人嘅體質。有啲女性停食避孕藥之後係冇呢個副作用嘅，不過大多數都會恢復返食避孕藥之前嘅月經周期，咁就唔會有一個確實嚟經嘅日子可以計算到，可能會早或者遲嚟1-7日。
至於你話可唔可以用避孕藥嚟延遲經期，答案係可以嘅，但係避孕藥連續兩日冇食（即係斷開咗），係有機會令到避孕效果失效嘅。所以去到你開咗新一排，並且食咗兩個星期之前，如果進行性行為嘅話都要配合外用嘅避孕方法，例如安全套，先至可以確保避孕成功。
雖然你話唔想食咁多避孕藥，但係長遠來講，食避孕藥對於女性嚟講都有唔少好處嘅，例如可以減少經痛，少啲生暗瘡等等。停食之後，身體亦都可以更快備孕。你可以考慮清楚再決定
Okok我呢兩日自己都有上網睇 話如果停咗避孕藥再食返會好傷身 請問啱唔啱 所以我都考慮緊要唔要長期食直至到我唔需要避孕 唔該曬你咁用心回覆～
Hello~因為避孕丸藥效好短，需要每天服用，幾日之內就會因為新陳代謝排出體外，唔會累積體內或者影響生育能力，所以冇間中停藥的需要。相反，間中停藥再食番會比一直長期服用有更大嘅機會出現副作用，亦更容易喺停藥期間意外懷孕。加上你本身經期已經唔準，所以唔建議你停下食下
Okok thank you so much!!!