我28/9至3/10嚟咗m之後琴日feel到排卵痛 同埋有類似蛋清嘅分泌物 而我呢三個月經期 排卵期都會出現排卵痛嘅症狀 同埋有蛋清分泌物
然後我琴日都feel到下體有少少痛 好似嚟M嗰種痛咁 今日仲更加痛 唔知咩事 會唔會係尿道炎或者其他病？
或者會唔會關我24/9嘅性行為事？果次嘅性行為係全程使用避孕套加體外射 唔知會唔會係懷孕徵狀？
有啲驚
再加上近排喺護墊都發現有黃色嘅分泌物 仲有都好水狀 唔知係咪感染到細菌 自從嚟完m之後都冇有過性行為 同埋同男朋友每次性行為都會帶套 男朋友都係唯一嘅性對象 所以真係唔知發生咩事
仲有我護墊都唔係經常更換 會唔會都影響到
同埋我清洗陰部嘅時候都會用body wash去洗 會唔會咁樣都影響到？
Hello～多謝你嘅提問～留意到你話24號係最後一次性行為，並且全程都有用安全套同埋體外射精，咁樣懷孕嘅機率其實係好低嘅。加上你28號已經嚟咗月經，咁基本上可以完全排除懷孕嘅可能性。至於你話有黃色蛋清狀嘅分泌物，加上下體會痛，咁好大機會係發炎嘅症狀，有可能係念珠菌引起嘅尿道炎或者陰道炎，要盡快睇醫生
而發炎嘅原因好有可能係因為你冇經常更換護墊，因為香港嘅天氣都比較潮濕，如果噏住成日嘅話，會令到念珠菌大量繁殖，造成感染
所以你記住之後每隔最多三個小時就要換一次護墊，如果分泌物多嘅話就要再換得頻密啲
另外，因為女性嘅陰道係弱酸性嘅，而大部份嘅body wash都係鹼性嘅，所以其實唔適合用嚟清潔下體。反而你可以直接用清水，溫柔咁擦拭外陰，因為陰道裏面其實有自我清潔功能，唔需要灌水入陰道，亦都唔需要伸手指入去清潔。我哋主要清潔嘅位置其實係喺陰道出面大小陰唇之間嘅地方，而呢個地方係唔需要用梘液清潔嘅。
另外，都想問一問你進行性行為之前同之後，有冇妥善清潔性器官？同埋你嘅伴侶有冇清潔性器官嘅習慣？因為呢兩樣嘢都係好重要嘅，如果冇做好清潔嘅話都會導致陰道發炎。特別如果你嘅伴侶會幫你進行指交，咁一定要提醒佢剪指甲同埋洗手太長嘅指甲除咗容易藏污納垢之外，仲容易刮傷陰道內側，導致陰道出血，如果再加上冇正確咁清潔嘅話，就容易發炎，令到下體又痕又痛🥲
依家嚟講，喺你睇完醫生，完成晒成個療程之前，都記住唔好進行性行為住，避免乒乓波形式嘅交叉感染，令到發炎嘅症狀斷唔到尾，不斷覆發
不過你可以放心，通常尿道炎或者陰道炎，食大約五日抗生素同塞藥，就已經可以痊愈，唔會有任何副作用或者後遺症。之後記住注重清潔就可以啦🫶🏻
係咪去普通科睇都可以架
因為女性尿道炎同埋陰道炎都係好常見嘅疾病，所以你睇普通科嘅門診係可以嘅，當然睇婦科專科醫生最好，因為佢會更加明白你所描述嘅症狀。
另外，因為醫生有機會叫你除褲瞓上床做檢查，搵返女醫生可能會舒服啲，冇咁尷尬。不過就算係男醫生都好，法例規定男醫生幫女病人做檢查嘅時候，要有女護士在場監督同埋協助。同埋成個過程係好快嘅，唔使擔心🫶🏻
我想問吓，如果要睇醫生嘅話 佢會唔會問你之前有冇做過性行為？
如果醫生認為有需要，會問你有冇發生過性行為。你如實回答都可以幫助醫生盡快搵到病因，對症下藥。
你有提及下體痛有嚴重咗，都希望你盡快去睇醫生，避免延誤。
之前痛嗰陣 我有用一隻女性專用陰部清洗陰部清洗液然後用咗一排就冇痛 之後琴日有自慰 同埋唔記得咗用 我唔知係咪咁樣影響咗之後今日就痛🥲
如果你用嘅嗰枝清洗液入面有會令你皮膚敏感嘅成分，或者其他會影響陰道健康嘅成分，可以反而會令情況惡化。
事情都過去半個月，你有反覆出現痛嘅情況，希望你盡快去睇醫生，尋求專業嘅醫療幫助，對你自己嘅身體同健康負責任。
你有提到自慰之後痛，可能係因為指甲刮損有傷。
呢個情況更加要做好護理清潔，唔好刺激到，或者令傷口發炎。
唔好意思 想再問多一樣野 雖然我聽日去睇醫生但係啱啱去廁所嗰抹pat pat發覺有粉紅色 啲分泌物有血絲 上網搵到可能係子宮頸炎 好驚
Hello~有好多唔同嘅原因都會導致出現粉紅色分泌物嘅，我哋上面所講嘅念珠菌發炎或者陰道出血都係其中一啲可能嘅原因，唔一定等於子宮頸炎。如果你真係好擔心嘅話，可以等聽日睇醫生嘅時候，要求醫生幫你做子宮頸抹片檢查。現階段可以放鬆啲，唔使擔心咁多。因為分泌物係好受體內嘅荷爾蒙所影響嘅，如果你keep住壓力好大嘅話，都有機會令到荷爾蒙分泌失調，影響成個經期
知道！
原來我係聽日先睇醫生 我想問多一樣野 唔好意思 我想問下 念珠菌係咪懷孕先會有？ 我好驚因為聽日係同媽咪爹啲一齊去睇婦科醫生 但係我最上一次性行為係喺24/9 然後我28/9嚟咗m 之後我15/10用咗manning牌驗孕棒驗係陰性 所以我係咪冇懷孕？我諗住一陣再買多支唔同牌子嘅驗孕棒聽朝驗 再confirm下🥲
補充：每次有性行為都有全程帶套同埋有check有冇穿或漏
hello 你好啊！念珠菌唔一定懷孕先有嘅，亦都無直接嘅關係，念珠菌可以由唔同原因引致，正如cherry講咁，
不過醫生都可能會問你有無發生性行為，所以需要如實回答，可以幫助醫生盡快搵到病因。
另外， 見到你係性行為後都有月經，加上性行為後嘅11日後驗孕，結果已經好準確㗎喇！咁基本上可以完全排除懷孕嘅可能性。
真係唔好意思 我都明白成日問同一個問題好煩 但係我真係好驚 我已經流啡流咗六日 我上網見到係初期懷孕徵兆 我真係好驚 我見過醫生但係我冇同佢講話我有過性行為 因為我媽咪同我一齊睇 佢話我有乜大問題 但係我唔知而家可以點算 我係咪應該睇家計會 我會唔會真係有咗 我好驚…
如果我地重複答完你都係重複問返同樣嘅問題，可能你都要認真思考下問我地問題究竟係咪可以幫到你？你究竟期望得到啲咩？我地每次都俾返同樣或者類似嘅答案而你每次都質疑或者唔相信，你係咪應該考慮搵其他你會信任嘅人求助？或者諗下你應該點樣面對你得到嘅資訊？
你喺醫生問診嘅時候冇如實回答或者講清楚自己嘅身體情況，我地都唔能夠單憑你嘅文字去判斷你究竟有冇子宮或者卵巢問題，建議你盡快搵醫生檢查清楚。如果你覺得父母在場會令人覺得擔心嘅，你當然可以自己去睇醫生，同醫生如實講清楚自己嘅身體情況，問清楚你嘅擔憂。甚至你可以睇兩位唔同嘅醫生，得到多方面嘅診斷。
最後想再次重申：
希望你對自己嘅身體健康負責任。
同埋如果你嘅身心狀況都未準備好，每次性行為之後都不斷擔心懷孕，即使有正確驗孕而且有月經出現你都依然擔心會懷孕，希望你真係唔好發生任何形式嘅性接觸住，直到你身心同情緒狀況都覺得可以，先再考慮要唔要進行性接觸。
而懷孕初期嘅「著床性出血」通常血量較少，流血日數較短，通常1~2日就完、而血量係一塊護墊可以裝載嘅量。
如果你真係懷孕初期而持續流啡幾日，更加係好需要求醫。
而見你話下體不適、非經期流啡都出現咗一段時間，建議你與其自己擔憂，不如真係搵醫生好好檢查清楚。你唔係醫護人員，不如盡快去搵有呢方面專業知識嘅人士幫助你。唔建議你拖延落去，可以令情況惡化。