急!擔心伴侶懷孕

摘要

啱啱同伴侶纏綿,纏綿期間我未有勃起同射精,但摸摸內褲時有液體,手指透過內褲接觸到液體,其後未有抹手,但應該有接觸其他身體部位及衣物,之後再有用手指插入伴侶陰部及陰道,伴侶下體亦有分泌物,擔心伴侶會因此懷孕,想問問意見

Hello 你好~

內褲上面嘅液體係尿道球腺液(pre-cum)嚟,係唔需要勃起或者射精都有機會分泌出嚟的~ 佢有機會含有少量精子,不過冇插入式性行為嘅話,啲精子好難到達到子宮,亦都好難造成懷孕嘅,所以可以放心:)

精子嘅存活率好低,只要暴露於空氣,或者遇到水,精子就會加速死亡。因為精子需要精液提供養份先可以生存到,精液同時亦輔助係精子移動嘅媒介。所以如果冇咗精液嘅保護,精子都難以生存同移動。

例如喺衣物/被鋪上面,呢啲物件會吸收大量嘅精液,而精子唔能夠穿透衣物纖維。所以精液一旦接觸到呢啲物件,其實不足幾秒鐘至幾分鐘就會死亡,精子死亡後亦無法復活:)

同埋有多樣嘢可以注意,即使冇勃起/進行陰道交,都建議使用安全措施,因為安全措施唔止係為咗避孕,亦都係為咗防止性病或者其他病菌/病毒透過皮膚或體液傳播,減低感染嘅機會:)

希望呢個回答幫到你!

咁即係如果隔住內褲用手指掂到液體,未必乾曬咁指交(有入陰道),都唔需要擔心?懷孕機會非常微?

其實無用安全措施嘅情況下,無論點都會有一定懷孕風險嘅,不過呢個情況機會係好微的~
如果有憂慮嘅話,可以喺11日後進行驗孕,咁就最安心啦~

明白,如果無論點都唔想懷孕,想問問呢個情況建議食事後丸嗎

同埋佢係今個月7號嚟月事,12號完,咁樣的話,算唔算係危險期入面?會唔會因為個生理期而個風險有變?

Hello~因為你呢個情況懷孕機率係好低嘅,所以唔建議食事後丸。因為事後丸對女性嘅副作用係非常大嘅。事關事後丸係高劑量嘅荷爾蒙藥物,好大機會會導致頭痛、腹痛、內分泌失調、經期混亂等副作用。而且事後丸係一個月經周期裏面只可以服用一次,如果食得頻密嘅話,有機會導致不育。所以除非冇使用安全措施,而又有插入式性行為,或者安全措施失敗(例如安全套穿咗),我哋先會建議服用事後丸。

不過當然,如果你想連少少可能性都冇嘅話,咁可以考慮服用事後丸。不過係呢件事情上面都要尊重返伴侶嘅意願,等佢衡量清楚食同唔食嘅利弊,再作決定🫶🏻

另外,見到你話你嘅伴侶7號嚟月經,12號完,如果按正常月經周期嘅計算方法嘅話,應該唔算係危險期入面嘅。不過都需要提一提你,用安全期避孕係好唔準確嘅。因為女性每個月嘅周期都唔一樣,而月經係受好多因素影響,除非是用排卵棒,如果唔係我哋係好難知道幾時係安全期,幾時係危險期。有時甚至乎月經嚟嘅日子會同排卵期重疊,所以「衝紅燈」(喺女生嚟月經嘅時候無套插入)都唔一定安全。

最好嘅方法都係做好安全措施,咁就唔使就住就住,而做完又擔驚受怕啦!

想問問咁即係如果隔住內褲用手指掂到液體,未必乾曬咁指交(有入陰道),都唔需要擔心?懷孕機會非常微?
因為伴侶今日已經第28日,但係都未嚟m

或者可能手指有精液殘留未必乾曬咁指交(有入陰道),算唔算插入式性交?

Hello~因為內褲可以令精子加速死亡,好似上面同事咁講

個懷孕機率好低好低,唔洗擔心。

通常情況下,只要有嘢插入陰道/肛門就算係插入式性行為,包括玩具,物件,手指,舌頭等。如果手指有精液殘留未必乾曬咁指交(有入陰道)咁個懷孕機率會高過隔住內褲嘅,但係總括嚟講個風險唔算高。

另外,其實女性嘅月經周期係好唔準確嘅,唔係第28日就會嚟m (除非食緊事前避孕藥),早/遲7日都係好正常嘅。如果想準確啲去推算月經周期,可以用app紀錄每個月嚟m嘅日子同血量,加埋分泌物嘅情況,先會有個可靠啲嘅參考。不過,月經延遲嘅原因有好多,體重過輕,壓力大,生活唔規律…都會導致月經遲嚟。除非月經比起平時遲咗三個星期以上都未嚟,先至需要睇醫生,等醫生考慮會唔會處方荷爾蒙藥物畀你伴侶去催經。現階段可以再等下先,唔洗咁緊張🫶🏻