後入疼痛一事

你好糖不甩!我有少少身體上既問題想問下你地!我最近做左柏氏抹片+盆腔超聲波~ 但琴晚同男朋友做愛時,佢後入我既體位我到深處有點痛~ 我之前好耐4年前試過盆腔炎,但我做左呢d test 照計應該無發炎,唔知點解會痛。
想知我仲有冇咩檢查做到去睇睇身體情況,或者想知點解會痛,其他體位係無事無痛~
我下體係無出現異常分泌物~

Hello~多謝你嘅提問:heartpulse:見到你話琴晚同男朋友做愛時,佢後入你到深處有點痛。正常情況下,被插入嘅一方係需要以跪姿勢趴係床上面,身體儘量貼近床上,屁股儘量抬起。插入嘅一方同樣需要跪係床上面,而抽插嘅時候就需要注意角度同埋腰嘅擺動,啱啱開始用後入嘅時候,千祈唔好想上頂,而係要水平咁抽插,如果唔係嘅話,插入嘅一方可能會覺得一直都好似插唔入去咁,而被插入嘅一方就有可能會受傷,令到你有啲痛嘅感覺。

其實每個人性器官嘅角度都唔一樣,都唔一定係所有體位都適合每一個人,如果你哋試過幾次都係唔得都唔需要勉強:relaxed: 而無論用咩姿勢都好,啱啱開始嘅時候,記住係過程中要用潤滑劑,咁就會減少咗係試新姿勢嘅時候唔小心整痛嘅風險架啦。同埋一定要記住用安全套呀,呢個係唯一一個可以預防性病嘅避孕方法嚟架。

建議你哋做多D前戲,令你下身嘅肌肉放鬆D先。又或者可以試下一開始嘗試做左其他體位先,等到下體分泌物充足(或者配合埋潤滑劑),而陰道亦已經適應陰莖插入嘅時候,先再嘗試後入式,咁就冇咁容易整痛。

另外,你可以搵番之前幫你做盆腔檢查嗰位醫生check下,對比你而家同之前盆腔嘅恢復情況。因為唔清楚你嘅身體狀況,如果真係有懷疑嘅,做多次詳細嘅檢查就最清楚啦:smiling_face_with_three_hearts: