你好，我10月16日下午有發生性行為，雖然聲稱只係隔住褲磨擦但我覺得係有進入到，宜加好驚有阻。我本身經期都係比較規定，上個月大概9月29號就係第一日黎經，計反數本月應該係16號就會係排卵日即係有性行為當日，我第二日上早9點就去咗診所買事後丸吃，請問仲有冇幫助，會唔會好大機會已經受精阻著床？
Hello
知道你好擔心趕唔切食緊急避孕丸，即事後丸。但都可以放心，根據唔同種類嘅事後丸，只要係性行為後72小時/120小時內食事後丸，而又冇即時嘔吐，一般都係可以達到97-99%避孕作用。所以你嘅情況係完全趕得切干擾受精或着床過程嘅。
而呢幾日都要多加留意同照顧身體，因為食事後丸後可能會出現噁心或不適等副作用，但通常會於1－2日內消散。不過都提醒返，並不建議食事後丸當作恆常避孕工具，或者係同一月經周期內使用超過一次，因為副作用都比較強烈，長期服用會較大機會導致子宮內膜變薄，引致一段較長時間不孕。當然，如果你並唔打算長期服用，都唔會有呢個問題。
另外都提醒返，雖然相比插入式性行為，體外磨擦嘅懷孕風險係比較低，但都唔能夠完全排除到懷孕風險。所以都建議下次進行任何形式嘅性行為都做足安全措施，例如使用安全套，咁就唔洗咁擔心啦。
你好，多謝你既回覆呀，我琴日慌張到係咁打自己個肚 
。診所醫生開俾我吃既係2錠裝Levon呢隻事後丸，但兩次吃都完全冇任何唔舒服同副作用出現，身體同平時一樣，咁既情況藥物有冇正常發揮到佢既作用嫁？
請問我最快幾時可以驗孕，用棒定抽血？好驚
Hello~ 雖然服食事後丸後有機會出現不適，但就好似其他藥物一樣，每個人服飾之後嘅反應都唔同，只要有按醫生嘅指示服用，藥效就會正常發揮架啦
至於驗孕方面，驗孕棒最早可以喺性行為嘅7日後驗出初步結果，想獲取更準確嘅結果可以喺性行為嘅11日或以後再次驗孕。因為使用驗孕棒驗孕相對驗血方便快捷，而且喺有按照說明書嘅指示下使用，結果係相當準確嘅，所以你可以先使用驗孕棒驗孕，可以嘗試買兩個唔同牌子嘅驗孕棒，如果兩個檢測出嚟嘅結果都係陰性嘅話，就應該係冇懷孕啦~
明白你對於懷孕好擔憂，但係打肚並唔係一個有效防止懷孕嘅方法，仲會整親自己添
所以請你停止呢個行為，現階段先待有效嘅日子進行驗孕，知道咗結果後再諗下一步，無論結果係點我哋都會陪住你架
知道，想請問知唔知邊一隻驗孕棒可以係性行為之後七日就可以驗？因為係屈臣氏同埋萬寧見到既牌子寫黎經當日或者係遲過經期日先可以使用亦都有另外一個牌子寫係經期嚟之前四日先可以使用咁係咪即係我唔可以喺性行為七日之後就用呢幾隻牌子嚟驗？我搵唔到到有邊隻係可以性行為七日後用。
另外補充我今個月正常黎經日子係29,30，31月底左右。因為我9月份都係月底黎經。今次10月16號發生性行為，請問我應該邊日驗用邊一個牌子驗。宜加日日都好大壓力，好迷惘。
其實普遍係坊間上比較大嘅連鎖個人護理商店買到嘅驗孕棒都係可靠嘅，最重要都係留意驗孕棒牌子同來源係咪可靠，不過就建議唔好去一啲比較細嘅藥房購買，因為細藥房嘅來源就未必可靠。你係選購嘅時候可能會有疑惑，見到有分電子驗孕棒同一次性驗孕棒，其實兩者都唔會喺準確度上有任何分別，唯一分別只係電子驗孕棒會貴少少。
至於點解會有日期上嘅出入呢？或者我可以詳細啲講解下個原理：
驗孕棒其實係透過尿液測緊hCG嘅水平。咁咩係hCG呢？就係如果真係懷孕，當受精卵著床，身體就會分泌嘅一種荷爾蒙，而hCG嘅分泌會隨著懷孕嘅日子增加。所以你於愈後嘅日子驗孕，就會因為體內嘅hCG會愈多，而愈容易得到準確嘅驗孕結果 。
咁一般驗孕嘅日子可以有兩個選擇：
1）性行為7-11日後：因為一般受精卵著床需要6-9日，所以如果真係懷孕的話，其實性行為11日後，受精卵就已經著床，並分泌出足夠嘅hCG去令驗孕棒測到懷孕嘅情況。
2）預計來經日子：月經出現，係因為卵子無受精，因為無受精卵著床，增厚咗嘅子宮內膜就會脫落，成為月經。如果真係懷孕嘅話，受精卵就會著床於子宮內膜上面，子宮內膜就會逐漸增厚為受精卵提供適合嘅成長環境，就唔會有子宮內膜脫落嘅情況出現，所以就唔會有月經。
至於點解唔同驗孕棒說明書上面會有呢個日期上嘅出入呢？主要因為會有人唔肯定自己對上一次不安全性行為係幾時，而難以計算幾多日之後驗孕會係最好，所以驗孕棒上面先至會用預計來經日子計算。
不過其實市面上所有嘅驗孕棒都可以喺7日之後就有初步結果架啦。你都可以依照驗孕棒嘅說明書，去睇邊日驗孕會得到最準確嘅結果 。如果擔心嘅話，就可以選擇係性行為7-11日後驗一次，然後於預計來經日子再驗孕一次，咁就會更確保到準確。
知道你真係好擔心好緊張，但你嘅懷孕風險其實唔高，而且都有係時限內食咗事後丸，而事後丸嘅成功率都有97-99%，所以都幾乎肯定唔會懷孕，你都唔洗太驚同打自己個肚啊。有任何憂慮就隨便上黎問啦。
多謝你哋咁詳盡耐心回覆我嘅問題。
我之所以咁擔心係因為對方話係隔住內褲磨擦我陰道口冇入都去，同埋淨係擺個手指入去，但我真係唔清楚佢有冇偷偷雞摸完自己陰莖再擺入去個陰道入邊，另外，喺磨擦嘅時候我感覺唔到內褲嘅布料，我感覺到嘅係皮膚嚟嘅。
今個禮拜日會去買驗孕棒驗一驗。真係再一次多謝你哋。希望我唔會有。
我想再請問下，我星期一吃阻事後丸，如果星期六去打第三次疫苗會唔會對身體有影響嫁？
Hello~事後丸係高劑量嘅荷爾蒙藥物，係透過壓制排卵同埋干擾受精嚟達到避孕效果，而因為精子只會喺人體存活2-3日，所以你星期一食咗事後丸，佢就會喺之後嘅三日內發揮效用，副作用亦都只會維持1日。至於疫苗嘅成份係少量嘅病毒，通過刺激人體嘅免疫系統嚟製造抗體，從而達到預防嘅作用。呢一層係唔會影響到身體嘅荷爾蒙水平嘅，所以就算你星期六打第三次疫苗都唔會影響避孕效果，亦唔會對身體造成負擔