我05年 因為前排食咗事後係9月19號 但之後9月28同10月8都有發生性行為 冇套⋯外射 之後發現有咗 C淺T深 想問去家計會係唔係一定會通知家長 但男朋友20歲 可唔可以做監護人進行相關程序？
Hello 多謝你信任我哋，分享困擾你嘅情況。
首先，無論你係成年定未成年，家計會都唔會喺冇知會你嘅情況下，擅自通知你嘅家長。只有係得到你嘅同意，佢地先可以通知你屋企人。同埋佢地係唔會有你屋企人電話嘅，除非你自己提供俾佢地，所以佢地都係冇辦法係唔通知你嘅情況下通知屋企人。 而且佢地都唔會強逼你提供屋企人嘅聯絡資料比佢地。
但係，終止懷孕係一個醫療程序，所以未滿18歲人士，要進行終止懷孕手術的話，都需要女方嘅家長或法定監護人簽署手術同意書，先可以做到手術。畢竟手術係有風險，甚至身體可能係手術後有咩影響，或者手術過程中發生咩事，家長或者法定監護人都可以知道，並作出緊急手術決定。而你男朋友係唔能夠擔任呢個法定監護人嘅角色嘅。
但都會建議你盡快預約咗佢哋嘅服務。因為家計會診所只會處理懷孕週數10週或以下嘅個案。一般黎講，等醫生確認可以接受手術之後，會再排期2-3星期，等待進行手術。而你嘅排期次序及時間都會受懷孕週期、身體、心理狀況等影響。所以如果你地肯定已經懷孕，而且有共識想終止懷孕，咁就最好盡快預約佢地嘅服務，以免排期時間過長，過咗懷孕10週。
你都可以預約咗初診先，見咗醫護人員同埋輔導員先。第一次到診，醫護人員只係會檢查你嘅基本身體狀況、詢問病史、進行驗孕同評估懷孕週數，同埋都會話比你地知面對懷孕可以有咩選擇，令你地能夠係有足夠資訊下做出選擇。而輔導員亦會進行情緒疏導，幫助你地更加了解自己嘅意願同選擇。咁家計會呢次到診時都會建議你地仔細慎重考慮係咪要進行終止懷孕，之後先會再約醫生評估終止懷孕風險，同埋進行身體檢查。
你可以去家計會網站進行網上預約：
以你現時嘅情況，其實可以用藥物終止懷孕，咁對身體各樣嘅負擔同副作用都會較手術終止懷孕低。但如果拖得比較耐的話，咁就可能需要以手術終止懷孕架啦。
如果你需要專業輔導，或者諮詢相關意見的話，都可以搵母親的抉擇呢個機構，佢哋都有專業嘅服務同意見可以提供到俾你：
最後都會建議你考慮清楚先作決定，同埋考慮清楚會唔會話俾屋企人知，一來屋企人知道咗可能可以為你提供援助，包括金錢或者情緒嘅支援；二來係醫療程序同風險上都可以更加安全，而且都只有家長或者法定監護人先可以簽手術同意書。