唔該,我想問去醫院或婦科係咪會check到我曾經有冇比人內射過?好似話會check到精子濃度
Hello~因為精子喺體內只會存活2-3日，所以係唔會一直留喺身體入邊，會自然代謝排出。恆常嘅婦科檢查同埋body check都唔會check到你曾經有俾人內射過。現時嘅任何一項女性檢查都唔會檢驗到精子濃度。
不過都想問吓你嘅concern係咩？同埋都會想關心下你嗰次俾人內射嘅時候有冇使用事前嘅避孕措施？如果唔係可能會有懷孕同埋感染性病嘅風險
明白,其實我嗰時冇記錯應該係上年21年11 12月嘅事,有啲耐唔係好記得清楚～我哋個時係冇做任何安全措施,即係冇帶安全套,都冇食事前藥。
其實我依家並唔驚會大肚因為已經過咗好耐而且都嚟咗好多次M,但我既concern係男朋友話11月左右會帶我去check我以前有冇俾人內射過。而我講咗大話呃佢,因為呢啲都唔係容易開口,佢話如果check到,知道我曾經比人射過或者為過人哋食事後藥佢會同我分手,原因係我呃咗佢我冇比人內射過。
我男朋友係好介意我同過幾多個人做過,摸過,總之任何關於sex方面,佢全部都好介意,我唔明白點解佢要斟酌我過去,仲要係針對呢方面,然而我並唔想同佢揭起我既舊傷疤同過去,所以先選擇喺sex方面一次又一次呃佢,但佢話係一段感情入面,佢最接受唔到對方呃佢,咁樣令我覺得好辛苦,我身邊嘅朋友都就嚟覺得我有情緒病。佢甚至知道我呃咗佢咁多次之後,佢對我越嚟越冷淡,之前更同我講過佢對第二個女仔有心動嘅感覺,仲要話自己同其他男人好唔同，比着其他男人一定唔會同自己另一半講自己對第二個人心動,又不停讚其他女仔好有氣質,唔會好似我咁隨便同埋冇價值。
其實仲有好多好多未講,不過我諗呢度應該淨係提供sex方面嘅建議,所以喺度講好似唔係咁好。我搵唔到人願意花耐性聽我講。好多好多嘢加加埋埋都令我好辛苦,唔知係咪心理影響到生理,我成日一好難受,個心就真係會跳好快,同埋好酸痛,冇人可以幫到我,感到好無力。
Hello~好多謝你願意同我哋分享呢一件困擾左你咁耐，並且令你好難受嘅事明白要一直講大話向男朋友隱瞞過去係一件好辛苦嘅事情，加上對方仲要用分手嚟威脅，係會令人好不知所措，好無助嘅
見到你話男朋友好介意你同其他人喺sex方面嘅接觸，而你因為覺得好難開口，同埋唔想俾佢揭起你嘅舊傷疤，所以選擇咗呃佢，個心其實已經唔好受
仲要知道佢最接受唔到對方喺一段感情裏面呃佢，就更加驚俾佢發現自己講緊大話，聽到要去醫院檢查有冇俾人內射過就仲焦慮。呢種感受真係唔係一般人可以承受得到，長時間落嚟係一定會feel到好攰，同埋有種做咩都改變唔到現況嘅無力感。
見到你話唔明男朋友點解要一直斟酌你嘅過去，唔知道你哋討論呢個話題嘅時候你男朋友係點樣講嘅呢？而你對於佢呢一個執着又有咩諗法呢？有陣時我哋之所以唔明白對方諗緊嘅嘢，有機會係因為我哋對對方嘅認知不足，加上成長背景唔同，重視嘅價值觀又唔一定一樣，所以會覺得對方某一啲嘅要求好似好唔合理，冇辦法理解到咁。你會唔會願意講多少少呢件事係點樣發生嘅呢？我會好想知道多啲你嘅角度同埋諗法
見到你話佢知道咗你曾經呃過佢之後，對你越嚟越冷淡，仲會同你講佢對第二個女仔有心動嘅感覺，甚至攞你同其他女仔比較，話你隨便同埋冇價值，相信你聽到嘅時候一定好心噏
你可唔可以講吓你當時係點樣回應佢嘅？而你又係點樣睇自己嘅呢？喺任何一段關係之中，我哋都好講求尊重同包容，所以我哋好少會直接咁批判一個人，因為唔係希望對方因此而受傷
你個心成日有酸痛嘅感覺，應該就係因為受咗傷，係咪？
你話有好多好多嘢加加埋埋令你好辛苦，仲影響到生理…令我好好奇係啲乜嘢令到你咁辛苦，都要繼續維持呢段關係呢？我哋雖然唔能夠幫你解決問題，但係真係好想可以聽多啲，同你分擔下呢種感受
所以當你ready好，想再分享多啲嘅時候，隨時搵我哋，我哋會一直喺度support你🫶🏻