17歲，平時都唔戴套…亦都冇食藥。平時黎m前會有肚痛+漲奶。琴日冇任何經期前兆，突然底褲有血，相對於黎m量好少同埋淺色d，陣味亦唔似黎m（黎m係鐵鏽味，但宜家完全冇，同白帶嘅氣味差唔多），宜家好驚
今日只有量少少
平時有用app記錄經期，週期大概45日，個app推測我黎m應該係一個禮拜之後
Hello多謝你嘅提問
其實如果係進行性行為嘅時候，冇用到安全套，而又冇食開避孕藥嘅習慣的話，係會有一定懷孕風險。但如果你擔心會有懷孕風險嘅話，單憑呢到描述嘅身體情況都好難作出任何評估。
見到你好好，會用app記錄經期，但其實經期係會受好多唔同嘅原因所影響，包括生活作息、飲食習慣、情緒壓力等，係有可能比你所認為嘅提早或者推遲嚟M。你提到未有任何「經期前兆」，可能就係因為你嚟M嘅日子推遲左而未出現。而且雖然肚痛同埋漲奶都係一啲比較普遍嘅經前症狀，但唔一定每一次都會係經期前出現，而且其實都未必每次會一樣，有機會有時會比較輕微或者嚴重，又有機會出現嘅時間未必一樣，好難一概而論，好難作為衡量嘅標準。
而你見到嘅底褲有血，其實除咗係白帶之外，都有機會係因為你之前進行性行為磨擦過於激烈，而導致陰道出血。如果係呢個情況，都有機會流啡或者輕微出血嘅情況，但就唔會持續發生。咁就要注意呢段期間唔好再進行任何性行為，避免再令陰道摩擦而無法癒合，甚至可能引發陰道炎。如果陰道口真係有損傷嘅話，呢段時間最好避免摩擦到陰道，避免性行為，盡量着一啲棉質嘅底褲，同鬆身嘅下身衣物。同埋都要多注意日常清潔。但都唔建議直接灌洗陰道入面，只需要用清水溫和地清潔陰唇，尤其是陰唇之間嘅位置就可以。但如果真係仲有持續出血嘅話都建議睇返醫生。
當然，都唔能夠排除係白帶嘅可能性。白帶其實係陰道嘅分泌物，當荷爾蒙增多就可能會變多。你見到嘅，有機會係因為排卵期所引起嘅白帶，所以滲喺你底褲入邊。而都有機會係排卵期間有流啡嘅情況。因為荷爾蒙變化都有機會會少量出血，係會有血量好少但唔係持續出血嘅情況。而荷爾蒙變化嘅原因實在好多，單憑呢點係好難睇到你有冇懷孕。你都可以觀察返自己嘅呢個情況，如果成日都會非經期流啡嘅話，即使係排卵期嘅出血都可以搵醫生檢查返，因為都有機會可能係荷爾蒙唔穩定，或者係身體嘅其他病理性原因而導致。所以搵醫生檢查身體就會最安心。
另外都要留意番，其實白帶一般都係無色無味嘅。但如果佢嘅質地、氣味係有異常，或者你感到陰道痕癢，就有機會係患上陰道炎，或者係其他身體問題，包括可能係子宮頸癌嘅前兆。所以如果你有出現呢啲問題嘅話，都會建議向醫生求診，了解返自己身體狀況。你呢幾日都可以再留意吓自己陰道分泌物嘅情況。
其實如果你擔心有懷孕風險嘅話，最好嘅方法係去驗孕。你可以去大型連鎖個人護理商店或者信譽良好嘅藥房買驗孕棒，喺性行為嘅7至11日後，按照說明書指示進行驗孕。通常7日之後就會有初步結果， 11日之後就會有準確嘅結果。擔心嘅話都可以買兩個唔同嘅牌子，咁就可以更加確保檢測出嚟嘅結果更加準確。
最後都提醒返，其實如果冇生育計劃嘅話，都會建議每次進行性行為之前做足安全措施，例如用返安全套，咁就可以唔使咁擔心有冇懷孕，都可以減低感染到性病嘅風險。呢度我哋都有個簡短嘅post，係講點樣正確使用安全套，你都可以留意番：
https://www.instagram.com/p/B4EX0FVFLUf/?igshid=NzNkNDdiOGI%3D