你好,請問關於停打混合荷爾蒙避孕針。

你好,我9月10黎經。13號去了打混合荷爾蒙避孕針。期間28號突然有出血,比經期血稍微少啲啲。都有差唔多5黎左日。本身10月13號再打。我唔想打了。只打了一針。 今日10月26號都未有見黎M。同埋我買左排卵試紙測,都唔見有排卵。有啲后悔打呢一針,啲經期亂曬仲出血。請問。大概要幾耐先可以正常排卵。我只打了一針。好想快啲排卵。正常返啲經期。唔該曬。

Hello~多謝你嘅提問:heart:因為避孕針係高劑量嘅荷爾蒙藥物,所以注射初期可能會因為體內荷爾蒙改變而出現月經不規則、月經流量減少、甚至冇月經等副作用,所以有機會你9月28號嗰次出血已經係月經,咁10月26號都未嚟經期係正常嘅。呢種副作用一般會喺幾個月內消失,不過因為避孕針有功效延後嘅作用,所以就算你而家停打,都要3-5個月嘅時間先至可以回復正常排卵同埋嚟經。

可能喺你打針之前,醫生冇好詳細咁同你解釋避孕針嘅副作用,令到你而家會好擔憂同埋驚慌:cry:但係你可以放心,你而家遇到嘅情況都係一般女性打避孕針會遇到嘅情況,建議你查詢咗醫生嘅意見先至停針。你會唔會可以話俾我哋聽點解你會選擇打混合荷爾蒙避孕針嘅?如果覺得打針唔啱你嘅話,我哋都可以介紹其他嘅避孕方法俾你🫶🏻

因為醫生話打呢種一個月的針可以另月經正常。點知28號就出血,依家都冇黎經。醫生冇講太多副作用。只是話有機會月經不正常。只打一針,都要3-5個月先至會排卵嗎?我依家日日測排卵試紙。都係弱陽性,唔知係咪身體受雌激素影響。需要咁耐時間3-5個月先排卵?真係好後悔去打。搞到個人精神緊張。

排卵試紙顯示弱陽性,已經測左10日都係弱陽性。要3-5個月排卵,真係好後悔打呢針。

打混合荷爾蒙避孕針,其實係將雌激素同黃體酮兩種荷爾蒙注射入身體,抑制卵巢排卵、令子宮內膜產生變化,使受精卵難以著床,從而達致避孕嘅效果,所以你提到你唔見自己有排卵,其實係正常嘅事,因為正正係避孕針發揮緊作用。如果你見到自己有排卵,反而其實係代表你會有懷孕風險,咁正正代表避孕針冇發揮到作用。所以你都唔需要每日去測自己有冇排卵。

其實打避孕針,的而且確係會有調經嘅作用,但就會需要身體幾個月去適應,並且建立藥效。如果只係打咗一個月,其實身體係未咁快適應到,經期混亂都係一個好正常嘅情況。其實無論你開始打避孕針定係停咗打避孕針,都係會令身體荷爾蒙有所改變,所以都有機會因為身體未適應而會有荷爾蒙失調嘅情況,而影響咗你嘅月經情況。另外,月經其實都會受情緒壓力、生活作息、飲食習慣等等所影響。見到你睇到自己好緊張好擔心,都有機會因為你太過擔心太過緊張呢回事,而再影響咗經期。

當然以上提到嘅避孕針副作用其實因人而異,未必人人一樣。但始終身體荷爾蒙變化都比較大,所以一般嚟講,都係要幾個月左右時間慢慢回復正常。如果你真係好擔心,都會建議你搵醫生尋求專業意見,同佢講返你嘅情況。

但整體來講,你提到嘅一啲情況其實都係避孕針普遍嘅副作用,其實你嘅身體並無特別受到啲咩傷害而變得異常,所以唔需要太過擔心,都唔需要每日去測自己有冇排卵,相信你嘅月經之後都會慢慢回復平常。

好啊。希望放鬆心情可以慢慢正常返。

2個讚