打了第二個月避孕針

10月14日打第二枝避孕針當日已流啡,夜晚開始見紅,之後幾日流量很少,斷斷續續直到今天10月26日仍然會流血流啡,量大概一塊護墊左右,而且小腹偶爾會微痛,請問有沒有問題?

另外在準時打避孕針的情況下,月經期間內射都有避孕作用嗎?

Hello多謝你嘅提問

打避孕針其實係將人造荷爾蒙注射入身體,以達到避孕效果。所以身體有機會因為唔適應荷爾蒙改變而有唔同嘅副作用,包括月經混亂、月經流量減少等副作用。持續流啡有機會係副作用之一,因為荷爾蒙變動所導致。而避孕針其實又有分單一荷爾蒙針(三個月一針) 同 混合荷爾蒙針(一個月一針),而單一荷爾蒙針嘅人造荷爾蒙份量更多,所以副作用都有機會更強。

而避孕針副作用因人而異,未必人人一樣。一般嚟講,呢啲副作用都會短時間内會消失,大概一至兩個週期後會穩定返啲。另外都唔可以排除,因為進行性行為時磨擦過於激烈,導致陰道出血,而一直未好返。如果係呢個情況嘅話,都會建議暫時唔好進行性行為住,比陰道恢復下,同埋都要多加注意陰道衛生。

但你流啡流血嘅情況都維持得比較長,都好難清楚會唔會係有其他身體狀況,都會建議睇一睇醫生,同佢講返你嘅情況,尋求返專業意見。

至於避孕作用嗰方面,只要有準時打避孕針,不論係咪月經期間,只要喺有效期期間都係會有避孕效果嘅。如果你打嘅係單一荷爾蒙針嘅話,就會有三個月有效期;如果你打嘅係混合荷爾蒙針嘅話,就會有一個月有效期。