食左輕樂偶1個月 有1日食多左粒
問左醫生話下一排藥早返開始就可以 亦有照做
新一排已經食到第5粒 但仲未泥M
姐係停藥已經過左7日
宜家再繼續食藥 總共過咗12日
停藥後頭2日有血 但唔似M
平時泥M既感覺都冇
而且血量超少顏色都比M深色 完全唔似M
第1排藥17日後有性行為 冇帶套
宜家好擔心係咪懷孕
Hello多謝你嘅提問啊！
因為避孕藥係高劑量嘅荷爾蒙藥物，抑制卵巢排卵，所以喺第1排藥17日後有性行為，懷孕風險係低嘅！
至於點解岀血情況唔似經期呢？ 其實流啡（即係撤退性出血）都係食避孕藥一個常見嘅副作用嚟，因為食避孕藥會令經期變短，血量血塊減少等，所以可能會同平時經期唔同。喺初服食避孕藥嘅頭3個月，因為身體需要時間適應所以係有機會出現不規則陰道出血(點滴出血或短暫出血)嘅情況嘅，依個情況並唔會影響藥效或者對身體產生負面影響，而一般喺服食避孕藥3個月後不規則陰道出血就會因為身體適應左藥效而停止，所以你依個情況係正常嘅，唔需要太擔心，如果下一次停藥時，依然有不規則陰道出血嘅情況，經期有變化或者血嘅顏色有異常嘅話，就建議去睇醫生了解返身體狀況同埋係唔係適合服用依隻避孕藥，你暫時可以照跟著流程去食先。同埋啱啱開始食嘅時候，因為藥物都要時間係體內適應，所以月經週期都未必可以咁規律嘅，未必真係會係停藥嘅時間嚟月經嘅。
至於懷孕機會方面，如果每日準時食藥、服藥期間無嘔吐同嚴重腹瀉、無因為生病服用過其他藥物等等有機會影響藥效嘅情況嘅話，懷孕嘅機會都係相當低嘅，如果想確實知道有無懷孕嘅話，可以喺性行為嘅11日後進行驗孕，如果結果係呈陰性嘅話咁就應該係無懷孕啦。
另外想提醒翻，避孕藥建議要每日喺相同嘅時間食。如果你擔心唔記得／記錯時間食，你可以設定鬧鐘或者用一啲提醒食藥嘅app，咁就可以避免漏食藥或者記錯時間啦。
最後，雖然避孕藥有避孕嘅功效，但係無辦法減低性病傳播風險。如果想多一重嘅保障，都建議配合番安全套使用，減低性病傳播嘅風險啊！
解釋得好詳細 唔該你
另外仲想問 如果我想改食藥既時間
1日遲5分鐘咁食得唔得？
因為之前醫生有講過要準時食藥先可以維持個藥效
如果想改時間嘅話，可以搵一日直接轉去嗰個時間食。例如平時10點食藥，想遲一個鐘食，就可以搵一日（前後一個星期都冇唔安全性行為會再穩陣啲），直接轉11點食藥，之後都係11點食。唔需要每日遲5分鐘咁轉去想要嘅時間，因為咁樣反而會令身體要更多時間適應，有機會產生更多副作用。
平時係朝早5:45 食藥
岩岩嘔完 02:00補食返粒
但其實我想問 我補食係補食返果日果粒岩唔啱？
比如我食到第13粒 咁我補食 就開1排新既食返第13粒？咁樣岩唔啱？
啱呀，如果嘔咗，就要補食一粒，可以開定一排作補食之用。跟住嚟月經之後開過新一排，咁就唔驚漏食啦！