自己本身經期唔太穩定，但想做好避孕措施。前年都有食過避孕藥為期3-4個月，後期就停咗藥，但本身屋企仲有一盒剩低，雖然佢Exp Date係2025， 都無開盒咁放咗藥櫃一年有多，呢個情況會唔會影響藥效？最好係咪要買盒新？
因為今日係經期嘅第三日，25/10係第一日嚟M，我睇Yaz嘅資料話要頭五日內服用先有效，但應該咩時間食係最恰當？如果完咗經期先食，如31/10先食第一粒，會唔會無避孕嘅效果。
Hello多謝你嘅提問啊！
首先想問下你第一次食避孕藥之前有冇去咨詢下醫生意見呀？因為唔係個個人嘅身體狀況都適合服用避孕藥，例如有心臟問題、糖尿病、高血壓、免疫系統問題、肝臟問題嘅人就通常唔建議食避孕藥；而且市面上有好多唔同牌子／款式嘅避孕藥，每款含有嘅荷爾蒙成份同劑量都唔同。所以建議第一次服用避孕藥之前，要睇下醫生，等醫生幫你檢查下你嘅身體狀況係咪適合食，同埋適合邊一款避孕藥。家計會診所／母嬰健康院／某啲私家診所都有提供呢個服務嘅，你有需要可以去預約㗎。
另外，只要盒藥無放喺朝濕、高温嘅地方，依照藥盒上嘅指示妥善保存，亦都無過期嘅時，藥效都無影響㗎！
一般嚟講，避孕藥嘅第一粒要喺月經期間服用（月經週期第1至第5日），所以你今日（即係經期第三日）都可以食㗎喇！不過記住喺服藥頭7日中，發生性行為嘅時候都建議使用安全套，因為你上一次食藥喺幾年前，身體需要時間去適應避孕藥同埋建立藥效。而如果你第一粒藥係喺月經後先食（即係31號），其實唔知道你係咪已經排卵，所以藥效可能會受到影響，身體需要更長嘅時間去適應。為咗穩陣，會建議頭14日期間發生性行為嘅時候都要用安全套，避免懷孕風險。
避孕藥建議要每日喺相同嘅時間食。如果你擔心唔記得／記錯時間食，你可以設定鬧鐘或者用一啲提醒食藥嘅app，咁就可以避免漏食藥或者記錯時間啦。
最後，雖然避孕藥有避孕嘅功效，但係無辦法減低性病傳播風險。如果想多一重嘅保障，都建議配合番安全套使用，減低性病傳播嘅風險啊！
多謝你嘅回覆啊，之前都有問過醫生，咁都係可以，但就有少少影響情緒咁。
主要係考慮朝早食定臨訓食會好啲
Hello, 我想問 因為我係25/10係第一日嚟M,之後28/10朝早開始食Yaz，之後30/10就停咗嚟M。本身都係大概5-7日咁，但今日又有出血嘅情況，量都唔算多又有啲血塊。到底係避孕藥影響定點？🥹
其實流啡（即係撤退性出血）都係食避孕藥一個常見嘅副作用嚟，因為避孕藥係高劑量嘅荷爾蒙藥物，抑制卵巢排卵，所以會令經期變短，血量血塊減少等，所以可能會同平時經期唔同。喺初服食避孕藥嘅頭3個月，因為身體需要時間適應所以係有機會出現不規則陰道出血(點滴出血或短暫出血)嘅情況嘅，依個情況並唔會影響藥效或者對身體產生負面影響，而一般喺服食避孕藥3個月後不規則陰道出血就會因為身體適應左藥效而停止，所以你依個情況係正常嘅，唔需要太擔心，如果3個月後依然有不規則陰道出血嘅情況，經期有變化或者血嘅顏色有異常嘅話，就建議去睇醫生了解返身體狀況同埋係唔係適合服用依隻避孕藥，你暫時可以照跟著流程去食先。同埋啱啱開始食嘅時候，因為藥物都要時間係體內適應，所以月經週期都未必可以咁規律嘅。