我係女仔，我大佢4年，一開始我都唔想同細我咁多嘅一齊，但佢追我嗰陣說盡漂亮嘅話，仲做好多我誤以為佢係成熟穩重，就算細過我都無問題，ok，咁就俾個機會大家試下。呢差唔多2年，佢對我好好，對我屋企人好好，係我識過嘅男朋友之中最好，我放晒自己嘅心機同愛俾佢，佢係一齊緊嘅時候都好take care我，咩都會好擔心我，責任感都好重，同我plan左好多人生規劃，個未來係有我。但段感情中間其實有好多小吵小鬧，個問題其實好細，但佢每次都會諗到好大，到後期一嘈，佢就會咩都講分手，每次都會玩冷暴力去精神虐待我，我每次都會挽留，因為我覺得我愛佢，咩都可以包容，離離合合左幾次，我都有少少習慣佢講分手我就挽留，因為我唔想失去呢個人，到左今個月月頭，同佢又有爭吵，但小事到我唔覺得會走到去分手呢個地步。到左月中，佢話再頂唔順我啲脾氣，覺得佢想要番自己嘅時間做自己野，覺得我對段感情連基本嘅信任都無。今次佢好決絕話唔再一齊番，就算我係佢面前點喊點求佢唔好分手都無用，我知自己咁做好肉酸，但我唔想因為顧住自己面子而無左段感情，就算我係wts點樣平心靜氣，點樣同佢傾，佢都話已經無得番轉頭，連愛唔愛我都答唔出。
佢每日都填到自己嘅時間好full，好充實。但我想填滿自己嘅時間都好無心機做每一樣野，每日喊，焦慮，食唔落野，到左琴晚，知道佢出去TST飲酒，但琴晚我都有同佢傾左幾句，但佢話佢決絕唔到，但佢覺得一齊番都唔好。
我以為佢心入面仲有我，直到我個Fd cap左佢ig story俾我睇，佢挨左落條女膊頭影相，我個人即刻崩潰晒，我唔知自己可以點move on，我困死左自己係原地，我知道我地無得再番轉頭，但我內心唔肯接受呢個事實，依加我每日都好辛苦，每日都喊，我究竟可以點做。
Hello～好多謝你願意信任我哋，將一直困擾住你嘅感情問題話畀我哋聽。見到你喺呢段關係裏面有好多嘅留戀，你好欣賞對方對你同你屋企人嘅好，亦好開心佢計劃未來嘅時候會考慮埋你。但係另一方面又會有啲矛盾，唔明白點解大家會因為小事鬧交，仲要承受對方嘅冷暴力，同「分手」嘅威脅。去到今次點挽留都冇用，個心一定好痛，覺得好迷惘，好似搵唔到出路咁
如果係我，我都會唔知點算，停咗喺度，搵唔返生活嘅重心。
呢度都想問你幾個問題：
- 你對於親密關係有啲咩嘅期望？你期望付出啲咩同得到啲咩呢？
- 你期望嘅嘢喺呢段關係裏面有冇達成到？如果冇完全達到你嘅期望，背後嘅原因係咩？
- 你喺呢段關係裏面嘅位置係咩？你想有咩改變？
知道你好想挽救呢段關係，有冇啲咩感受同需要你係好想話畀對方聽呢？有冇啲咩你諗唔通，想對方畀個回覆你嘅呢？
有時候我哋會經歷低谷，好似咩都做唔好咁，個人好down, 好冇自信，不坊畀自己抖下，停低聽下自己嘅諗法，感受下自己嘅內心世界
無論你嘅決定係咩都好，我哋都會支持你
不過你都要記得畀個時限自己，夠鐘就focus返喺自己生活嘅不同部份，去move on
1個讚