事前避孕丸內射一問

10月31大約朝早時間
跟女朋友sex
我趕唔拔不出來
不小心內射了小小
其餘的在外面
現在有點害怕
因為是第一次遇到這個狀況
請問一下現在我該怎麼辦,需要加其他額外的措施去補救嗎?

P.s:女朋友又吃事前避孕丸吃了差不多半年左右

Hello 多謝你嘅提問

明白第一次遇到呢啲事係會好擔心嘅。一般來講,如果你女朋友到現時為止已經連續食咗事前避孕藥差唔多半年左右,期間都係有跟指引,有準時食,而又冇漏食,而且冇短期內嘔吐嘅話,理論上單靠避孕藥已經可以達到99%嘅避孕效果,所以都唔洗太過擔心。

但如果你女朋友喺最近7日之內曾經有漏食過避孕藥,就會有機會發揮唔到避孕藥嘅效果。如果係咁嘅情況,或者如果你哋有其他擔心嘅話,都可以考慮下需唔需要進行緊急避孕,食緊急避孕丸。緊急避孕丸,其實即係事後丸,通常都會被視為一種緊急嘅補救措施。根據唔同種類,就需要喺不安全性行為之後嘅72小時/120小時之內服用事後丸。事後丸喺香港係屬於醫生處方藥物,喺家計會診所、母嬰健康院、公立醫院/診所、或者私家診所都有提供。而我哋都唔建議去其他無需醫生紙嘅藥房或者其他途徑購買,因為呢啲途經都唔可靠。同埋都要注意,食事後丸後可能會出現噁心或不適等副作用,但通常會於1-2日內消散。而我地都唔建議食事後丸當作恆常避孕工具,或者係同一月經周期內使用超過一次,因為副作用都比較強烈,長期服用會較大機會導致子宮內膜變薄,引致一段較長時間不孕。當然,如果你並唔打算長期服用,都唔會有呢個問題。同埋可以提醒女朋友記得同醫生講佢有食緊避孕藥,因為食完某啲種類嘅事後藥同一個月經週期內就唔可以再食避孕藥,女朋友可以問下醫生需唔需要停避孕藥。

如果都仲係唔放心嘅話,都可以選擇去個人護理商店買驗孕棒自行驗孕。一般最快喺性行為嘅7日後已經可以驗出初步結果,喺性行為嘅11日或以後就有更準確嘅結果。坊間上普遍比較大嘅連鎖個人護理商店買到嘅驗孕棒都係可靠嘅,只要有按指示正確使用驗孕棒,結果都係準確而可靠嘅。驚有誤嘅話,可以買兩個唔同牌子嘅驗孕棒,如果兩個都檢測到係陰性嘅話,就可以肯定到係冇懷孕啦。

最後都提醒返,服用避孕藥雖然都有避孕功效,但係係無辦法減低性病傳播風險。所以如果想有更好嘅保障,都建議可以考慮使用安全套,除咗可以避免懷孕風險之外,仲可以減低性病傳染或者其他感染嘅風險,例如尿道炎 、或者念珠菌感染等等。呢度都有個簡短嘅IG post,係講解返點樣正確使用安全套嘅,有興趣都可以留意番:《Stickypedia系列-安全性行為:第一寶》