本人13最近懷疑自己有慢性宮頸炎d分泌物都係濃稠同埋黃黃地咁嚟m嗰度d血唔知係咪因為同d分泌物混合咗一齊所以d血好稠,好擔心自己有慢性宮頸炎 我好多個月前已經係咁
我由小五開始diy係咪太早diy 會慢性宮頸炎?
我唔敢同屋企人講驚尷尬同埋我有有諗過自己睇醫生但係好似好貴我冇乜錢
同埋想請問青少年保健服務有冇睇醫生?
Hello 多謝你信任我哋同我哋分享你嘅煩惱 
首先想了解多少少先，除咗分泌物偏黃色同埋比較黏稠之外，分泌物有冇異味（例如魚腥味）？有冇覺得外陰痕癢或者痛？下腹有冇痛？有冇非經期期間出血或者流啡？ 
有分泌物係好正常同埋自然嘅生理現象，通常分泌物係半透明、冇乜氣味嘅，而隨著月經週期嘅荷爾蒙變化，分泌物嘅狀態都可能會改變，例如排卵期前後分泌物可能相對比較黏稠（好似蛋白咁），經期前分泌物會增多等。如果出汗比較多，或者下身衣物比較緊，可能氣味會比較強，而分泌物喺底褲氧化或者混合咗少少殘留尿液之後都可能會有顏色同埋氣味嘅變化。另外，壓力、飲食、身體水份等身體因素都會影響分泌物嘅狀態。
不過，如果分泌物係黃綠色／類似豆腐渣，有下腹痛／排尿不適／非經期出血／下體痕癢或者痛，可能係因為陰道細菌／病毒／真菌感染，就要盡快體醫生啦。
關於分泌物嘅更多資訊，可以參考：
【白帶】陰道分泌物顏色、份量、味道處處反映你的健康？
同埋 常見的陰道疾病
而如果你唔肯定自己嘅身體情況嘅，都可以去搵醫生檢查下，了解下自己嘅身體情況，令到自己安心啲。你可以去家計會嘅青少年保健中心，佢哋嘅服務收費可以參考： https://www.famplan.org.hk/zh/our-services/clinic-services/youth-health-care/fee
你可以打去你方便去嘅診所，或者上網預約
至於月經呢方面，其實所謂嘅「經血」並唔係血液。月經係因為荷爾蒙變化導致子宮內膜脫落，所以「經血」其實係會有子宮內膜嘅組織、血液、由陰道排出嘅時候亦會混合子宮頸分泌物、陰道分泌物等等。所以你會覺得係黏稠嘅。
而自慰其實都係好正常嘅都，亦可以係青春期探索身體了解身體嘅方式。宮頸炎通常係子宮頸受到感染而發炎。自慰同慢性宮頸炎並冇直接嘅關係。不過記得自慰前後做好清潔。
建議你做好日常清潔護理，每日用清水溫柔溫和咁清洗下體，尤其大小陰唇之間。不過記得唔好灌洗陰道入面，亦唔建議使用清潔劑，灌洗同鹼性嘅清潔劑會破壞陰道同陰道口天然弱酸性嘅環境，破壞酸鹼平衡反而會令陰道健康受影響，容易感染發炎。建議著棉質底褲同鬆身嘅下身衣物。
有問題歡迎隨時搵我地！ 
其實正確d嚟講我d白帶d質感有d似白膠漿有時仲可以用手指搓到粒粒出嚟
因為我哋都好難就咁憑描述去判斷你患有宮頸炎嘅機會，就好似上面個位同事所講，如果你真係擔心，而且分泌物異常嘅情況持續，都建議你去諮詢醫生嘅意見啊