已經1個月未黎m，有試過用驗孕棒，係冇事嘅，之後係22/10有一次性行為。想問去醫院驗尿的準確性高嘛？定係要去驗血先會check到？
驗尿同驗血嘅準確度有冇話邊個高啲？仲有會唔會話要係性行為幾多日後再去驗會好啲？
Hello 多謝你嘅提問。
首先可以講解下驗孕棒嘅一啲原理，會方便啲解答你嘅問題。驗孕棒其實係透過尿液測緊hCG嘅水平。hCG是卵子受精著床之後身體會產生的一種荷爾蒙。如果真係懷孕，當受精卵著床，身體就會分泌呢種荷爾蒙，hCG。
所以你問到嘅驗尿同驗血嘅準確性問題，其實都唔會有大分別，因為其實都係驗緊身體入邊嘅hCG。只係如果你去醫院驗血，就可以有更詳細嘅報告了解hCG水平，從而推測懷孕週數。但單單係想睇下自己有冇懷孕，其實用驗孕棒還是去醫院驗血都一樣做到呢個效果嘅。
至於驗孕日子上，你可以喺性行為嘅7日之後驗一次，咁就會有初步結果；喺性行為嘅11日或之後再次驗孕，就可以得到更準確嘅結果。因為hCG嘅分泌會隨著懷孕嘅日子增加。所以你於愈後嘅日子驗孕，就會因為體內嘅hCG會愈多，而愈容易得到準確嘅驗孕結果 。
其實一般喺坊間大型連鎖個人護理商店買到嘅驗孕棒都係非常可靠嘅，只係我哋就未必建議去一啲比較細嘅藥房購買，因為佢哋嘅來源或者賣嘅牌子就未必可靠。而無論你係買電子驗孕棒定係一次性驗孕棒，佢哋嘅準確度都係一樣咁高。只要有按照驗孕棒說明書上嘅指示使用，結果其實係相當準確嘅。如果你真係擔心嘅話，可以買兩個唔同牌子嘅驗孕棒，咁就可以有兩個唔同嘅結果做double check。如果兩個牌子驗孕棒檢測出嚟結果都係陰性嘅話，其實都幾肯定係冇懷孕。
都明白你可能見自己仲未嚟M，所以擔心自己係懷孕。但其實有好多唔同因素會影響經期，例如生活作息、飲食習慣、情緒壓力等等。你對自己有冇懷孕嘅擔憂都可能形成壓力，影響咗經期。
可能你係因為有過不安全性行為之後好擔心自己有懷孕風險。其實如果有正確按指示咁使用可靠嘅驗孕棒驗孕，基本上準確性同可靠性都已經好高。當然如果你都想為求個安心，你都可以去醫院驗尿驗血。都提提你，如果未有生育計劃，下次進行性行為嘅時候，都可以考慮用返安全套，咁就唔使咁擔心會唔會懷孕，而且仲可以避免性病嘅傳染。呢度都有個簡短嘅IG post，係講返點樣正確使用安全套嘅，有興趣都可以睇吓：《Stickypedia系列－安全性行為：第一寶》
明白 唔該曬你
因為1個月未黎m所以好擔心，頭先講到22/10果次性行為後都有即刻吃事後藥，但一直未黎m都好擔心，唔知經期會唔會因為吃左事後藥又延遲…因為本身黎m嘅日子都差唔多
hello 明白你好擔憂同困擾呀
我地之前都有解釋到，月經好容易受唔同身體因素影響，即使平時經期都相對穩定，都唔代表每次月經週期嘅情況一定會一樣嘅。
再加上你有食事後藥，事後藥係用高劑量嘅人造荷爾蒙去進行緊急避孕，其中一種常見嘅副作用就係會影響1~2次月經嘅情況，例如月經週期變長、經血量增多、經痛比較明顯咁。
如果你距離對上一次性行為已經11日，驗孕結果會比較準確。睇到陰性結果就放鬆下心情啦。月經會出現嘅～
咁我想問我最後一次性行為係22/10，跟住我隔左10日，係1/11去左醫院驗尿，想問呢個結果係唔係準確？姐係冇懷孕就一定係冇，因為我驚未到14日驗出黎嘅結果都唔係最準確。
Hello～好似我哋上面同事咁講如果你距離對上一次性行為已經11日，驗孕結果會比較準確。不過10日嘅話個結果應該唔會有好大分別，如果你真係唔放心/月經遲咗一個星期都未黎，可以考慮買驗孕棒驗多一次。