有關啡色分泌物

上次謝謝你解答我問題啊,我想再問下 我係食開yaz既
如果突然間/黎經前/自慰完高潮會出現既深啡色分泌物其實係咩黎,我以前都試過做完愛會有

唔知關唔關我呢排都遲左半個鐘-2個鐘食事O.O
其實所謂要準時食係咪比如我10點00分食,每日都一定要10點00分食呢?
謝謝你啊 我會捐款去你個FPS到

不過通常都係流一下就完 所以覺得有點奇怪?

Hello 首先好多謝你嘅支持

回答返你啡色分泌物嘅問題先。想問吓你大約食咗避孕藥幾耐?因為流啡、不規律陰道出血、或者非經期的點滴或短暫出血,呢啲都係食避孕藥常見嘅副作用,一般出現係初食避孕藥嘅初期3個月左右,部份人可能適應期會再耐少少。因為食避孕藥其實係吸收人造荷爾蒙入身體,當你身體仲未適應到荷爾蒙改變,就會有機會出現一啲啡色分泌物,即係流啡嘅情況,或者不規律陰道出血。而你提到你呢排冇準時食到避孕藥,都有機會因為咁影響咗荷爾蒙而導致呢個情況出現。

另外你提到自慰完,同進行性行為之後都有類似嘅情況。其實食完避孕藥之後,都有機會會令陰道比較乾,當潤滑度不足嘅時候,或者磨擦過於激烈嘅時候,都有機會唔小心整傷左陰道而自己都唔知道。所以當陰道有破損嘅時候,可能會有類似流啡嘅情況發生。如果係咁嘅話,都可以選考慮選擇用返適當嘅潤滑劑,避免再有陰道破損嘅情況。

至於食藥時間上,其實最好都可以係同一時間服用避孕藥。雖然你服用緊嘅Yaz係屬於混合荷爾蒙避孕藥,食藥時間上相對較單一荷爾蒙避孕藥彈性啲,食嘅時間差少少都算可以接受,但都會建議盡量準時食得到,咁就會比較理想。而最重要係記得每日都要食,同埋唔好每日食嘅時間差太遠。

都想了解吓,喺開始食藥之前有冇曾經睇過醫生檢查過?因為都有機會係你身體本身未必適合食呢隻避孕,而導致相關情況出現。

最後,如果係持續出現呢個情況,或者出現其他問題,例如出血量增加,咁就有機會係你身體唔係咁適合食呢隻避孕藥。同埋都想知,係開始食藥之前有冇都曾經發生過類似嘅情況?如果有嘅話,或者係身體出現咗其他問題。如果係上述呢啲情況,都會建議帶埋食開嘅避孕藥去睇醫生,咁就可以更好咁了解返個問題同身體狀況。