如題
食咗年幾避孕藥，想將今個月嘅經期推遲2-3日先開始，可以點樣做？ thanks
Hello 你好
首先要講解一下，食避孕藥期間嘅月經其實係「撤退性出血」，因為避孕藥含有大量人做荷爾蒙，透過吸收人造荷爾蒙，從而去抑制排卵，增加子宮頸分泌物嘅粘稠度，同改變子宮內膜嘅環境。透過一直服食含有人造荷爾蒙嘅避孕藥丸，就可以維持着穩定嘅荷爾蒙水平；但當身體嘅荷爾蒙水平改變，就會有出血現象。所以，理論上，只要你延遲停止食人造荷爾蒙嘅避孕藥丸，就可以延遲經期。
例如，如果你食緊嘅係21粒裝混合荷爾蒙避孕丸，當你食到第21粒之後，就即刻開新一排繼續食，食到你希望月經出現。
如果你食緊嘅係24粒裝混合荷爾蒙避孕丸，個24粒粉紅色活性藥丸係有荷爾蒙嘅，而嗰4粒白色嘅就係冇荷爾蒙成份嘅非活性藥丸，當你食完嗰24粒粉紅色之後，唔好食白色，繼續食新一排藥嘅粉紅色藥丸，直至到你想月經出現，就食白色藥丸。
不過因為咁做其實唔係一個正常嘅食法，會有機會影響咗之後幾次嘅月經週期，同埋可能帶嚟唔同嘅副作用。所以，都會建議你可以睇醫生諮詢下意見先，睇下點做會適合你嘅情況。
另外都想問吓，你食咗年幾避孕藥，有冇曾經睇過醫生睇吓身體狀況？因為都會建議大約食咗一年左右，都可能考慮見下醫生，睇吓身體狀況，睇吓仲適唔適合食藥，有冇需要轉藥等等。如果冇睇過嘅話，都可以趁呢個機會睇吓，順便諮詢下醫生睇吓點樣延遲經期對你身體狀況係比較好，或者點樣比較容易做到。
多謝你咁詳細嘅資訊。
我今年21歲，食咗年幾避孕藥，未睇過醫生。
近排都有考慮去睇醫生，但係唔知應該去醫院睇婦產科定係其實診所都可以？或者使唔使做啲咩詳細嘅婦科檢查？
Hello
其實見診所普通家庭科醫生都可以嘅，而如果你想做個詳盡嘅檢查，都可以根據需要睇下使唔使搵婦科醫生嘅。
如果你未婚，可以考慮去家計會嘅青少年保健中心，可以打電話或者喺佢地嘅網站預約：https://www.famplan.org.hk/zh/our-services/clinic-services/youth-health-care/fee
如果已婚嘅話就可以去家計會診所，理論上唔需要預約，不過如果想就返自己時間都可以提前打去約個方便你嘅時間。
或者母嬰健康院都有呢啲服務，不過就要睇返網站睇下你想去嗰間健康院嘅開放應診時間，同埋睇下需唔需要提前預約～