Hello 想問吓咁嘅情況大唔大機會有咗
經期都算準，上次月經大嘅係10/10-10/16。一般周期34日左右。今日同男朋友有發生性行為，內射咗，之後已經即刻食咗美國嗰隻plan b 緊急避孕藥。下次月經預計係一星期之後，我呢幾日一路都覺得胸漲痛同下腹有啲漲，但係咁樣大唔大機會懷孕
Hello 你好
明白你食咗緊急避孕藥，即係事後丸，都可能擔心會有懷孕風險。其實如果你係今日發生不安全性行為，然後今日已經即刻有按指示食咗事後丸，而短期內冇嘔吐嘅話，基本上已經會有95%以上嘅避孕效果，所以都唔使特別擔心。不過都唔建議食事後避孕藥作為恆常嘅避孕方式，或者同一月經周期內使用超過一次，因為副作用都比較強烈，甚至可能引致一段較長時間不孕。
而你提到嘅胸漲痛、下腹漲等等，其實都係食事後丸嘅常見副作用之一，通常一般會喺1-2日之內消散。另外呢啲都可能係你本身準備嚟M嘅先兆，因為你本身預計月經都差唔多到，但呢啲都唔會因為咁而影響咗緊急避孕藥嘅成效。
如果唔放心嘅話，都可以喺性行為之後嘅7-11日驗孕。如果想買驗孕棒驗孕嘅話，我哋都建議去返一啲信譽良好藥房或者大型連鎖個人護理商店，買番啲可靠嘅牌子嘅驗孕棒驗孕。一般7日之後嘅話就會有初步結果， 11日之後就會有準確嘅結果。你都可以買多一個牌子，去對比下結果，如果都係陰性嘅話，咁就可以放心係冇懷孕。
但都想問一問，你食嘅呢隻藥係咪有醫生處方開嘅？因為都要注意返，緊急避孕藥係香港係屬於醫生處方藥物，都需要見完醫生，檢查完身體係咪合適之後先可以食嘅。如果係喺其他藥房或者其他地方自己買藥食嘅話，都未必確保得到藥物係咪真係可靠。所以如果係呢啲情況嘅話，我哋都會建議你考慮去睇返醫生，或者去家計會見醫生，講返相關情況，睇吓有冇需要食一粒真係由佢哋醫生開嘅藥。
最後都提醒返，如果本身冇生育計劃嘅話，都會建議做足安全措施先進行性行為，例如用安全套，不但可以有更好嘅避孕效果，仲可以預防性病傳播。呢度都有個簡短嘅IG post，介紹返點樣正確使用安全套嘅：《Stickypedia系列－安全性行為：第一寶》