我有嘢想問一下
上網有睇過剛懷孕都會有啡色嘅小量血流出
大概一星期前同男朋友有性行為，嗰次係有套+內射，其餘時間就係無套+外射（因為覺得食左事前藥會安全）
想請問會唔會有懷孕風險
Hello你好
基本上，如果你係有跟足指示，每日準時咁食避孕藥，又連續食咗半年，就已經有95%以上避孕功效，所以都唔使太擔心，即使內射佢嘅懷孕風險都係極微。但如果你曾經喺過去7日有漏食過，或者冇準時服食嘅話，都有可能影響到避孕效果。呢度想問吓，你話有帶套加內射嘅意思，係指射精嘅時候都有帶安全套？因為如果你同伴侶上次進行性行為嘅時候如果全程（由整次性行為開始，有尿道球腺液開始，到射精）都有正確咁帶安全套嘅話，應該都唔會有懷孕風險。但如果係任何一個階段冇帶到，就會影響咗避孕功效。
至於流啡，係可能有唔同嘅原因，唔一定同懷孕有關。而流啡本身就係食避孕藥嘅常見副作用之一，都有可能係最近過去嘅日子曾經冇準時或者漏食避孕藥，或者可能係身體本身唔適合呢款避孕藥等等。另外，都有機會上次進行性行為嘅時候磨擦過於激烈，唔小心整傷左陰道而自己都唔知道。當陰道有破損嘅時候，可能會有類似流啡嘅情況發生。如果係咁嘅話，都建議最近留意返陰道清潔，但又唔好過度清潔，同埋最近都最好減少陰道磨擦同進行性行為，俾啲時間傷口癒合。但如果問題持續嘅話，就建議要去睇醫生了解返身體情況，因為可能係身體出咗啲問題。
雖然如果有正確咁食到事前避孕藥，即使冇帶套進行性行為都唔會有懷孕風險，但呢度都可以提供少少資訊俾你，就係其實尿道球腺液本身係含有少量精子嘅，所以當性器官之間有磨擦，即使冇進入陰道或者最後外射都好，當你冇食避孕藥或者冇做其他安全措施嘅話，就會有懷孕風險㗎啦。
唔該你我補充返少少
避孕藥我日日都準時食的，冇漏服過
同埋男朋友內射時都係全程帶住安全套的
多謝你嘅解答！！
