請問係咪隱約見到兩條線?

啱啱做完嗰陣仲得一條線 但過左一陣就變左兩條線

喺47分開始驗,呢張相係15:01影

你好, 睇張相你既結果係陰性,即係代表你沒有懷孕,所以你唔洗太擔心嘅。

睇返你上次講同男朋友無插入式性行為,懷孕嘅機會係相對較小,而你係性行為後8天已使用過兩款不同牌子既驗孕棒做測試,結果都係陰性,而今日再驗結果同樣係陰性,即係證明你沒有懷孕,所以唔洗太擔心。因為驗孕棒既可靠性,係一般性行為7日之後進行驗孕會有初步結果, 11日之後就會有準確嘅結果。而你在10月底有性行為後至今超過20天,只要你在期間沒有再有性行為,驗孕結果是準確的。

而你又講過之前經期嚟咗6日,即代表卵子無受精。如果卵子受精後,係會係子宮著床,之後就唔會有月經,所以有月經係代表卵子沒有受精,並且排出。

知道你擔心咗一段時間,但你可以放鬆D,唔洗太擔心,如果太過緊張和壓力大,都會令身體不適架。其實你今日既驗孕結果是準確的,但如果仲係好擔心,你可以選擇去診所或家計會搵醫生再驗多最後一次,就唔洗再擔心喇!俾D有關家計會驗孕服務既收費你參考一下。https://www.famplan.org.hk/zh/our-services/clinic-services/pre-marital-fertility-preparation/early-pregnancy-assessment/fee

最後提醒一下,下次再發生性接觸之前,即使唔係插入式性行為,都可以使用安全套,避免陰道/陰道口同陰莖/精液/尿道球腺液接觸而有懷孕風險。同埋係發生性行為之前,可以考慮一下你及伴侶係咪身心都準備好,包括心理狀況、承擔性行為帶來既風險等,如果身心未有準備好,就唔好發生任何形式嘅性接觸。

希望呢啲資訊幫到係啦,唔好再咁擔心啦~

但係點解係判定嗰一格下邊見到一條隱約嘅灰色線?咁樣係中咗定唔中?

我見佢判定下面有條微微嘅灰線?紅線?我唔清楚但我唔識判定佢係蒸發線定中左

主要係我使用佢嘅過程有蒸氣嗰啲水珠喺入面

你地唔使咁擔心,圖片顯示確係結果陰性,如果係陽性,兩條線都會係紅色,而非灰色的。

但網上見到有啲勁淺色都係中咗,所以先至咁擔心…但驗完之後嘅2分鐘結果都係一條線,隔咗大約10分鐘左右先至變咗依家呢張相咁樣,所以係唔係真係冇事…?

明白你應該好受困擾,可能驗孕棒既結果令你地未能安心,但你宜家都唔使太擔心住,建議你可以盡快去診所或家計會搵醫生進行驗孕,有檢驗結果後醫生或專業人士亦會為你進行解釋,經醫學人士協助下的檢測,準確度會係極高的,相信可以釋除疑慮,咁就唔洗再擔心喇!
剛才都有分享有關家計會驗孕服務,可以在上面參考一下。

主要我未滿 16 歲… 我同男朋友並都已經好後悔…
唔清楚家計會會唔會接受 16 以下嘅案例或者會唔會報警處理呢件事… 我都好唔希望有左BB

但依家至少係唔係可以確定冇中?

我再補充多少少,希望你地可以更加安心同相信驗孕既結果。

你地由發生性行為到今日應該已用驗孕棒進行過多次檢測,其實結果係好準確的,加上早前有月經,明顯你係沒有懷孕,所以真係唔使再咁擔心。你要知道擔心既過程係好煎熬,情緒同壓力會影響身體狀況,甚至月經周期,萬一搞亂左下一次月經周期,到時又再一次陷入不必要的恐慌。

不過,如果你對於解讀傳統驗孕棒結果唔太安心,或抱有懷疑,你可以選擇電子驗孕棒作檢驗。電子驗孕棒顯示的結果只會是懷孕或沒有懷孕,而並非以一條線或兩條線顯示結果,所以結果會非常清晰。

至於剛才建議亦可到家計會檢驗,到家計會檢測係不記名的,即使16歲以下嘅個案亦不會主動報警處理事情。不過若個案係18以下他們循例亦會了解一下你發生性行為是否自願,或有沒有強逼成份,所以若真係選手到家計會,你亦可放心。

你都可以參考下家計會青少年保健中心既服務同地點資料:青少年保健 - 香港家庭計劃指導會 (famplan.org.hk)

我見旺角呢一間冇驗孕呢個服務,緊急避孕同埋懷孕輔導呢兩個服務,請問呢兩個服務係咪驗孕?

三家家計會青少年保健中心都有提供相關服務的,有需要使用服務,要先行致電預約及查詢。

唉 個一條嘅線真係令我宜家好擔心 都唔知係蒸發線定懷孕… 雖然我有月經之前都驗過 但總係俾呢條嘅線搞到我好困擾

想請問一下點樣先為之蒸發線,因為染完之後嗰2分鐘睇係冇呢條線,但隔左差唔多10分鐘左右先有呢條線

hello! 今日用個儲左幾個鐘嘅尿去驗電子驗孕棒 顯示negative 係咪已經確認冇事?since 有啲人話電子冇咁準 但雖然知道真係唔大機會懷孕但都想求個安心!

你地可以放心。其實如果真係驗到有懷孕嘅話,佢條線係會清晰可見,而唔會係咁好似睇唔到㗎。其實就好似上面講過咁,基本上你嚟咗月經,同埋驗孕棒上嘅線都唔係清晰可見嘅嘅話,其實都可以確保係冇懷孕。而電子驗孕棒,市面上一般可靠牌子嘅,其實都非常準確,如果你第二次驗孕都仲係陰性嘅話,其實基本上都可以好肯定係冇懷孕架啦。

或者我可以講下驗孕棒嘅原理令你更加明白係咩一回事。驗孕棒其實係透過尿液測緊hCG嘅水平。咁咩係hCG呢?就係如果真係懷孕,當受精卵著床,身體就會分泌嘅一種荷爾蒙,而hCG嘅分泌會隨著懷孕嘅日子增加。一般來講,7日已經會有足夠嘅水平可以檢測得到初步結果,11日之後就會有好準確嘅結果,你愈後嘅日子驗孕,就會因為體內嘅hCG會愈多,而愈容易得到準確嘅驗孕結果 。所以其實你驗到兩次唔同驗孕棒都陰性就真係準確。

其實情況就好似而家做嘅嗰啲Covid Test一樣,中咗就兩條線,冇中就一條線。呢到都可以比張圖你睇下,陽性同陰性嘅分別會係點:
圖片
圖片
圖片

同埋其實本身驗孕棒都唔預期驗完孕之後放置咁耐,其實最好都係跟返說明書上面所講嘅時間去睇結果,並唔係話擺得愈耐,個結果愈準,因為一來其實都唔衛生,二來其實個結果都有機會會受其他嘢影響,例如發生氧化反應,而導致咗佢結果有影響。

同埋其實好多網上唔同嘅人嘅其他狀況都未必相同,好難一概而論,所以唔能夠完全作準,我地都難以作出判斷。如果都係唔相信自己驗孕嘅結果,或者就可能考慮吓去診所或者家計會要求驗孕,可以確保結果係非常準確。

知道你地可能第一次面對呢個情況都好驚,所以最後都希望你地會認真睇返之前有關安全措施嘅回覆,認真考慮吓,下次進行性行為嘅時候做返安全措施,例如全程帶返安全套,咁下次就唔洗好似而家咁慌張啦。同埋下次進行性行為嘅時候,都考慮清楚自己身心係咪都準備好,如果未準備好嘅話,或者到考慮吓唔好進行性行為住。