上個月男友無套入咗陰道，但冇射。不過佢當時係有前列線液，我知道入面系含有少量精子 過咗幾個鐘之後有食72小時內服用嘅事後丸 安立婷，過咗6日之後嚟咗m，一共7-8日。
而家仲有幾日就嚟今個月嘅m，但係呢幾日有啲乳漲同痛，分泌物多，小腹痛，全部都係懷孕症狀，之前經前都未試過有，所以好驚會唔會有咗🥲因為見到網上有啲經後仲會懷孕，好驚🥲🥲
。
Hello~多謝你嘅提問
首先想問吓你上個月食嘅事後丸喺邊度購買嘅？因為事後丸喺香港係醫生處方藥物，要通過正規嘅渠道，例如家計會，公立或者私家醫生購買，先至可以保證其質量。如果你係喺以上嘅地方購買嘅話，咁可以保證避孕嘅成功率有97%以上。加上你食完之後已經嚟咗月經，所以係唔需要擔心懷孕嘅。
另外，你講嘅乳漲同痛，分泌物多，小腹痛，其實都係嚟月經之前嘅先兆。你話之前嚟月經嘅時候未試過有，可能係因為之前個感覺冇咁強烈，所以冇意識到。而因為你上個月食咗事後丸，事後丸係高劑量嘅荷爾蒙藥物，所以有機會擾亂你嘅內分泌，令到你經前嘅症狀明顯咗。而家要做嘅就係放鬆心情等待月經嘅到來
喺攞咗牌嘅藥房買的同埋補充番，嗰陣係月經遲嚟嘅第四日🥲，嗰陣時屬於排卵期嗎？🥲再之前係冇試過性行為
如果盒事後丸係喺藥房度買，而唔係醫生處方嘅話，咁我哋未必能夠確認到佢嘅藥效同質量
因為我哋唔可以保證到盒藥係邊度嚟同埋係咪有效。而月經周期係好受其他因素影響嘅，例如壓力大，飲食或者運動習慣改變，都有機會影響月經周期，所以我哋冇辦法判斷你月經嚟嘅第四日同排卵期有冇重疊咗到。而就算你係第一次進行性行為都好，只要冇用到安全套，懷孕嘅機率都係存在嘅。
因為你距離上一次唔安全嘅性行為，已經過咗成個月，所以建議你可以先去萬寧或者屈臣氏購買驗孕棒進行驗孕，基本上驗一次就已經可以得到準確嘅結果。如果結果係陰性嘅話就可以放心啦
1個讚
同埋想問一下，而家隔咗一個月驗孕係咪會較為準確？🥲
同埋本身食咗藥之後過咗幾日已經嚟咗M 所以懷孕嘅機率仲會唔會有？🥲
係咪代表已經唔會懷孕了？
係啊，你而家隔咗成個月，如果你真係有根據指示正確咁進行驗孕的話，咁驗孕結果已經係非常準確㗎啦。因為基本上性行為之後7日驗孕，就會有初步結果，11日之後就會有準確嘅結果，一個月嘅話，結果係極為準確。你而家驗到陰性，所以都唔洗擔心啦。
有關月經個到，其實如果你確保已經嚟咗月經嘅話，其實即係月經出現前所發生嘅性行為都並無導致懷孕。
但如果Touch wood之後又有相類似情況，就唔好再去藥房自己買啦，最好就去返家計會或者私家診所睇醫生，因為事後藥係要有醫生處方，自己去藥房買嘅話，係無辦法確保到個粒藥係咪真係事後藥，同埋確保唔到粒藥嘅效果係咪真係可靠嘅。
同埋最後都提醒返，事後丸其實係極高劑量嘅人造荷爾蒙，對身體會帶來一定嘅副作用，所以都唔建議作為恆常嘅避孕措施。如果下次再發生性行為嘅話，又冇生育嘅打算，都建議做返適當嘅安全措施，例如用返安全套，咁就唔洗事後咁擔心啦。
1個讚
Hello唔好意思，想再問一問
上個月24號嚟m，
但今個月冇嚟，已經成個月，想知係咪因為個人因素所以冇嚟定係？因為我keep住有下腹痛，乳房痛但係又冇嚟再加上自己比較擔心會唔會有機會有咗
Hello 如果你對上一次性行為，就係呢個post之前講緊嘢講一次嘅話，咁就唔需要擔心係有懷孕嘅風險架啦，因為你驗孕時都已經驗到係陰性。
至於你提到嘅個啲症狀其實都係一啲常見嘅月經前症狀，好多人「谷M」時都會有呢啲情況。而仲未嚟M嘅問題，其實都有好多因素會影響經期不規律，令到經期提前或者延遲，例如生活作息、飲食習慣、情緒壓力等等。而且如果你食咗事後藥嘅話，之後果一兩次嘅月經都可能會受影響，呢個都係食事後藥嘅常見副作用之一。另外都有機會因為你一直仲好擔心自己會唔會懷孕，而影響咗情緒，令到經期遲咗。
明白好多時月經前症狀都係同懷孕症狀好相似，會令人好擔心，但都唔能夠單憑呢啲症狀就判斷到有冇懷孕。但而家嘅科學發展都好昌明，可以比到一啲客觀嘅指標同結果，所以都要相信驗孕棒嘅結果，如果係性行為11日後驗孕，又真係有按指示正確使用到驗孕棒，而又驗到係陰性嘅話，其實就唔需要再擔心係有懷孕㗎喇。
希望可以幫到你啦 
多謝你嘅意見呀前日已經嚟咗m啦！
1個讚