Hello~
想請問一下，我上個月 28/10 開始食第 1 排避孕丸，宜家已食左21日避孕丸，差唔多全部日子都係準時同一個時間食，只有大概兩三日遲左15分鐘至1小時食，上週五 18/11 開始要停藥7日，25/11 先可以開始食第2排避孕丸。我停藥後過左1日，即 19/11 開始黎 M，而我同男友係我停藥期間、黎M後第 2 日，即 20/11 曾經無戴避孕套嘅情況下，性器官互相摩擦過，大概只係陰唇摩擦陰莖，當時佢陰莖已有少少分泌物，但佢陰莖就無對準過我陰道口，亦無插入過陰道，亦無對住我性器官射精，請問懷孕機會係咪唔大？
同埋，我停緊避孕丸嗰7日，其實係咪仲有藥效？
Hello
其實只要冇漏食過避孕藥，每日食藥時間冇相差太遠，同埋冇喺食完藥之後短期內嘔吐過而影響身體吸收藥效嘅話，停藥期個7日都係可以發揮到避孕藥嘅藥效嘅。根據你食避孕藥嘅情況，基本上都係有效嘅，所以唔使太過擔心會懷孕。
呢到都可以講多少少有關避孕藥嘅原理俾你知，等你更加了解。其實食避孕藥係吸收人造荷爾蒙入身體，從而抑制排卵同埋增加子宮頸分泌物嘅粘稠度，同改變子宮內膜嘅環境。透過一直服食含有人造荷爾蒙嘅避孕藥丸，就可以維持着穩定嘅荷爾蒙水平。而食避孕藥期間嘅月經其實係「撤退性出血」，係當身體嘅荷爾蒙水平改變，就會有嘅出血現象，更加係一個證明話俾你聽避孕藥係有發揮到功效。
但係都提醒返，你能夠避免到懷孕嘅原因係因為你有好好咁食咗避孕藥，而唔係因為性器官冇插入陰道。因為你所講嘅陰莖分泌物其實係尿道球腺液（pre-cum），入邊其實都係有少量精子嘅，所以即使係性器官有接觸，唔需要插入，只係磨擦都好，呢啲尿道球腺液都有機會接觸到陰道口，從而有懷孕風險。所以如果他日你停止服用避孕藥，或者出現咗一啲情況，例如漏咗食避孕藥，而你又冇生育計劃嘅話，都想你知道只要性器官有接觸，即使冇插入同最後體外射精，其實都係會有懷孕風險，所以都會建議你到時考慮用返其他安全措施嚟避孕，例如全程用安全套，不但可以避免懷孕，仲可以減低性病感染傳染風險。