有食藥,內射

女朋友30/10開始食事前避孕藥,家計會開的"Nordette";
每日都有食,只係3/11開始食嘅時間由2:00pm改咗做10:00pm,之後每日都係10:00pm食

我哋8/11同20/11都有做,冇用套+內射。
雖然食咗藥+食齊藥,但個心仲係好不安,想問下意外懷孕機會大唔大?

Hello 你好

首先想問一問你,你開始食藥嘅時間係咪係月經嘅頭5日?定係嚟月經之後嘅第6日或之後先開始服用?因為其實就算食咗避孕藥,都需要一般時間比身體建立足夠嘅藥效,從而達至避孕嘅效果。一般來講,如果嚟月經嘅首5日服食,身體係會可以更快地建立到藥效,但服食嘅頭1個星期內進行性行為時都建議使用返安全套。但如果係嚟月經之後嘅第6日或之後先開始服用,就會建議係頭2個星期內進行性行為時都使用返安全套。而且你都曾經有改過食藥時間,所以未必能夠完全發揮到避孕藥嘅避孕功效,再加上唔係好清楚你係嚟月經之後第幾日開始食藥,所以8/11個次性行為嘅懷孕風險就比較難講。

如果你擔心有懷孕嘅話,可以選擇去大型個人護理商店,或者去信譽良好嘅藥房,買一啲可靠牌子嘅驗孕棒,根據返說明書上面嘅指示驗孕。一般而言,7日之後驗孕就會有初步結果, 11日之後就有準確嘅結果。你都可以考慮買多一隻牌子嘅驗孕棒驗孕,如果兩個都係陰性嘅話,就可以確保準確係冇懷孕啦。另外如果你擔心嘅話,都可以考慮去返家計會,諮詢返嗰邊醫護人員嘅意見。

謝謝你的回覆
女朋友26/10 (Day 1)開始嚟M,按家計會姑娘指示「第5日」30/10開始食第一粒。

如果係咁嘅話,去到8/11,已經食咗九粒避孕藥,藥性已經建立好,就算冇用安全套都唔需要擔心懷孕。

不過都想提一提你,一個安全嘅性接觸,除咗係避免懷孕之外,亦都包括避免性病嘅傳播。所以如果選擇唔用安全套嘅話,最好定期檢查身體,同埋記得每日都要清洗性器官,避免性病或者非性病嘅傳播,例如念珠菌感染導致嘅陰道炎同尿道炎等。咁就可以保護返自己同伴侶啦!:relaxed: