同男朋友第一次嘅時候，有帶套+外射，做嘅時候有少少深啡色分泌物，唔係紅色嘅血。
完事後嘅第二日本身朝早都冇事，但一去完廁所，就有少少鮮紅色嘅血，抹嘅時候紙巾都有，但量唔算多，我照塾咗護塾，驚之後仲有血。之後行行吓街feel到有啲嘢流出嚟，去咗洗手間睇吓，有啲鮮紅色嘅血再加啲深啡色嘅分泌物，我就開始好擔心，因為好唔正常，加上我上個月27號嚟m，今個月畀男朋友手指插完，第二日（14號）就嚟m，無啦啦早咗嚟，，驚今次都係咁，好擔心身體有問題。而且每次嚟m之前都會有深啡色嘅分泌物，之後先真正嚟m，唔知正唔正常。
夜晚見到護墊都係啲深啡色嘅分泌物，而且量有少少多…到依家完事第三日都係有血同深啡色嘅分泌物，我唔知點算好
係咪要去睇醫生
另外仲有個問題係，之前我同男朋友試過指插，都係每次插完之後嘅一至二日都有啲深啡色嘅分泌物，唔知咩嚟
好擔心，求解答
依家去廁所都係嚟m嘅血咁
Hello 明白你見到自己進行完性行為之後出血流啡，所以都擔心自己身體有咩問題
其實如果你哋進行性行為嘅時候，全程都有正確咁帶安全套，包括陰莖勃起到射精為止，個安全套又冇破損嘅話，而你哋兩個嘅性器官之間又冇接觸到嘅話，基本上懷孕風險都係極低。
你提到插入式性行為同指交之後都有試過流啡、流血嘅情況，如果你之前都從未進行過性行為嘅話，都有機會係陰道前膜，即係俗稱處女膜，破裂而造成。頭嗰幾次進行性行為都有可能會出現一啲出血嘅情況。而如果係之前已經有進行過性行為嘅話，就好大機會係因為你同你嘅伴侶進行性行為時，摩擦太過激烈，擦傷咗陰道，或者係指交嘅時候整傷咗陰道，造成咗傷口而自己都唔知道。呢啲情況嘅話都好易會造成有流啡流血嘅情況。
如果係咁嘅情況，都建議你暫時唔好再進行性行為住，俾啲時間你嘅陰道傷口復原，因為如果再有異物進入陰道嘅話，包括手指、陰莖等等，都有機會會再整損個傷口令佢復原唔到。呢段時間都可以每日用清水清潔陰部，注意陰部大小陰唇之間嘅清潔，但都唔好過度清潔，亦都唔建議灌洗陰道，或者自行搽藥，因為都有機會造成反效果。呢段時間都可以著棉質底褲或者鬆身嘅下身衣物。一般來講，如果再冇異物進入陰道令佢受傷嘅話，都可以喺幾日內好返。如果流啡流血嘅情況都仲係持續嘅話，甚至如果更加嚴重嘅話，都會建議你睇醫生，同佢講返你嘅情況，從而有合適嘅治療。
如果擔心出現類似情況嘅話，下次進行性行為嘅時候，都可以留意一下陰道嘅潤滑度，因為當陰道潤滑度不足嘅時候都比較容易會擦傷，你哋都可以考慮選購合適嘅潤滑劑，可以提升潤滑度，避免出現以上嘅情況。而其實潤滑劑都有唔同特質同類型，呢度都有個簡短嘅IG post，你可以參考吓睇吓有冇邊個比較適合你哋用： 《Stickypedia系列－安全性行為：第二寶》
下次指交嘅時候，都可以多加留意指甲會唔會太長或者銳利，如果想嘅話都可以考慮購買指交套。咁呢度都俾埋一個有關指交套嘅IG post你，有興趣可以睇吓：《Stickypedia系列－安全性行為：第三寶》- 口交膜 &指套
當然我哋都唔能夠完全排除到你身體係有其他狀況，所以如果狀況持續，或者你都係好擔心的話，都會建議你睇返醫生，諮詢專業醫護人員意見。
唔該哂你
但依家又好似再嚟m咁係咪唔正常因為我10月27嚟一次，11月14嚟一次，依家又再嚟咁
本身月經好容易受唔同身體因素影響，例如荷爾蒙水平、飲食、作息同壓力等等。每人每次嘅月經情況都可能會唔同。
不過如果你近期突然月經週期變短，好似你所講，半個月左右之後又嚟經，都可以考慮去搵醫生檢查下，了解下身體情況。可能會安心啲。
有需要可以去預約睇醫生呀
如果你未够26歲，可以去家計會嘅青少年保健中心，可以打電話或者網上預約：https://www.famplan.org.hk/zh/our-services/clinic-services/youth-health-care/content
另外母嬰健康院同部分私家診所都可以提供呢個服務。