避孕針何時有效?

我11月12日第一打混合性避孕針,而11月25日發生性行為(無套),請問會唔會有懷孕風險?

Hello,如果你打完針之後身體冇特別嘅副作用嘅話,咁25號呢次性行為都唔需要擔心會有懷孕風險。

一般黎講,第一次打荷爾蒙避孕針都係會係月經頭5日內打嘅。如果你都係月經頭5日內打混合荷爾蒙,避孕針,原則上係即時開始係身體內建立避孕功效,佢嘅原理係透過注射人造荷爾蒙入體內,從而抑制卵巢排卵和令子宮內膜產生變化,使受精卵難於著床,並增加子宮頸分泌物的黏稠度,使精子難於穿過黏液進入子宮腔。不過都有時醫生都可能會根據返個別身體狀況,即使唔係月經頭5日都會打荷爾蒙避孕針,如果係呢個情況嘅話,都會建議打針後頭7日避免發生插入式性行為或者用返安全套。另一個原因就係可能副作用比較強烈,因為唔同人對避孕針嘅反應都唔一樣,所以一樣都係頭7日避免發生插入式性行為或者用返安全套。

按照你嘅情況,如果你係冇一啲比較強烈嘅副作用嘅話,你11月25號個次嘅性行為又係距離打針日子有7日以上嘅話,咁其實都係非常安全嘅。

最後都提一提醒返,混合荷爾蒙避孕針有效期係一個月,記得喺有效期完之前預約返打針。如果打完針之後有啲咩特別嘅情況,例如出血或痕癢,都記住盡快同返醫生講。

最後於28/11下午有非經期出血,所以即刻去睇醫生,但醫生建議我食緊急避孕丸(120小時),唔知對於之後打針有冇影響?

避孕針後有機會出現月經不規律、經血量減少或者流啡等副作用。因為唔確定你11月28號嘅出血情況係點,所以去睇醫生諮詢醫生意見都係好好嘅~

緊急避孕藥係用高劑量嘅人造荷爾蒙去緊急避孕,都有機會影響你嘅月經情況。而120小時嘅嗰款事後藥含有黃體激素受體劑,同一月經週期內再使用荷爾蒙避孕可能會降低避孕功效。

所以建議你打針前同醫生講你有服用過緊急避孕藥,睇下需唔需要等月經出現之後再打針,或者可以考慮同醫生傾下用其他避孕措施。