我應該點做好

同女朋友差唔多一齊咗一年,呢幾個月入面我好唔開心。
以前大家都會好sweet咁起碼一個禮拜至少見一次,又會晚晚都call。但係至從9月開學開始,佢同我講話唔想晚晚都call,咁我都明白嘅,所以就慢慢咁接受咗。如是者,佢慢慢變到好冷淡咁樣,多數都係我搵佢多過佢搵我,我想見而佢就冇咩意慾咁。初初我同佢表達返想見,佢會話好似琴日先見完嚟同埋會以好忙嚟拒絕我。咁我都理解嘅因為一開學係多啲嘢做同埋佢要準備日文dse,咁我作為男朋友嘅就緊係等佢忙完先搵佢啦。

到佢完咗日文dse,我以為可以好似之前咁嘅時候,佢個去咗英國嘅女仔fd返咗嚟香港,咁我咪又咗等,期待下一次嘅見面。我有同佢講過「你點玩點盛都好 都要抽時間嚟陪我」而我得到嘅答覆係「盡量啦」「我哋隨時都見到面」「有時習慣咗你喺度 唔使話特登去維持已經過得好好」我其實有啲無言,一段感情點都要相方付出先得以繼續到喇掛?

佢話要私人空間,好,我比。咁之後呢?當我一次又一次嘅期待見面,傾電話最後換嚟嘅都只係失望。我一開頭都會作籍口比佢同自己,佢忙啫,就連阿媽都問我呢排同女朋友發生咩事。但時間越嚟越耐我就喺度諗,即使再忙都好點都會掛住我,諗起我掛?

最近我哋出咗次街,個感覺好奇怪,明明最親近嘅人喺隔離但係好似有層隔膜咁,唔再係以前咁close,我都有問過佢呢個問題,佢就話有咩?我想攬佢好勉強咁攬咗幾吓,我想嚟個goodbye kiss佢唔肯。我又一次帶住失落同傷心返屋企。

其實我好攰,感覺到對方冇以前咁愛咁鍾意我,我呢幾個月以嚟一路都覺得不被重視,真係好傷心,晚晚諗起以前開心嘅時光,同而家根本兩回事嚟。我唔知好唔好唔再搵佢一排,等佢體驗吓我嘅感受。但係做唔落手,講真,邊個想令到自己愛嘅人覺得痛苦,又點忍到唔同佢分享自己嘅生活。

我唔係講到自己有幾偉大,我都有做啲令到佢唔開心嘅事,eg以前會忍唔住噁佢,但係我對自己,對佢應承我唔會再咁做而我真係做得到。我有問佢而家咁冷談係咪因為我之前對佢唔好,佢話唔係。唉,你叫我點算好?

惡*

Hello 首先好多謝你信任我哋,願意同我哋分享你嘅困惑。

明白你同你伴侶拍拖一齊左都一段時間,但最近可能相處模式有啲改變,令你都感覺唔係好開心,可能感覺冇咗你期望戀愛關係應該有嘅親密感。都知你有咁嘅想法同感受,係因為你好愛你嘅伴侶,所以希望對方可以同自己親密啲,或者花多啲時間同注意係自己身上。

首先,每個人每段戀愛關係都係獨特嘅,本身就冇話點樣相處先係最好,每個人喺每段戀愛關係中都係需要同伴侶慢慢咁探索出互相都接受到嘅相處。而好多人係戀愛關係過咗熱戀期之後,都會出現一段摸索嘅階段,其中一個原因係因為一開始嘅熱戀激情過咗,所以就少咗相對親密嘅行為。都有機會係因為身份認知改變咗,已經將對方放咗係舒適圈入面,而展現出唔同嘅表現,所以都有機會因為咁,你伴侶會講「我哋隨時都見到面」、「有時習慣咗你喺度 唔使話特登去維持已經過得好好」呢類型嘅說話。不論係你嘅唔開心,還是你伴侶嘅呢類型想法,呢到當中並冇對與錯,只係大家對戀愛關係嘅想像唔同。可能對你嘅伴侶黎講,佢係對戀愛關係嘅想像就係唔需要親密互動、經常見面等等都冇問題,佢都可以接受得到,但可能對你黎講呢啲都係必要,所以先會出現呢種落差,而令你唔開心。

但都要記住,每個人嘅個人界線都唔同,係會隨著唔同人唔同關係而改變,有啲人即使再親密嘅人都未必接受到咩都可以做,而且唔代表每時每刻都可以做。有機會你同你伴侶嘅個人界線都唔同,所以會出現你講嘅一啲唔肯攬唔肯kiss嘅情況。首先,記住如果對方唔肯嘅話就一定唔可以強迫,都係要得到對方同意。

你都可以試吓搵你伴侶好好咁認真溝通下,每當你有咁嘅感覺嘅時候,你就同你伴侶坦誠咁講你當刻嘅感受,然後講你有呢種感覺嘅原因,你可以同你嘅伴侶講你明白佢嘅想法同苦衷,然後提出一啲替代嘅方案睇下可唔可行。例如你可以同佢講,你見唔到佢所以好唔開心,你明白佢好忙要預備日文dse,或者要抽時間見好難得先見到嘅朋友,但因為都好耐冇見大家,所以都希望可以係見完朋友之後搵日抽空相會。

或者你都可以直接咁講你感覺到最近疏離左,問下對方係咪有啲咩原因會導致咗咁嘅轉變,例如會唔會係因為一齊嘅時間耐咗?定係因為對方係想要一個相對平淡啲嘅關係?定係之前曾經發生過啲咩事?或者大家之間有咩誤會發生咗,但可能你一直唔知道或者對方冇一個好好嘅機會講清楚?

而且你哋到時溝通嘅時候都可以考慮吓唔同嘅溝通方式,甚至可以考慮改變下你哋平時日常嘅溝通方式,例如有啲人係要面對面傾先會比較舒服,有啲人可能係要靠訊息打字,有啲人可能鍾意手寫出嚟,你地都可以考慮吓呢啲唔同嘅方式。

最後,如果做完以上講嘅嗰啲情況之後,你哋之間有共識可以有一個比較舒服嘅相處同個人界線嘅話,固然係非常好。但如果去到最後都未必有一個共識嘅話,可能要考慮吓你哋呢個時間係咪真係合適去繼續呢一段關係,可能要考慮吓改變大家嘅關係,例如做朋友關係,或者可能分開一段時間等大家諗清楚有冇其他方法改變,或者大家係咪真係合適。