女朋友尋日(19/12) 嚟左m，有少少血同m痛。以往佢第二日 (20/12)會係最多血個日，但今日(20/12)無血而且完全唔痛。 上網睇話呢個情況有機會係啱啱懷孕而做成的岀血。計返今個月1,3,6,9,12都有發生性行為，有全程戴好安全套。照道理應該唔會有事，所以都想知點解會導致月經冇血呢個情況。
你好！睇左你既留言，你所提到懷孕而做成的岀血即所謂嘅著床性出血，係指卵子受精後著床係子宮內壁時有機會導致嘅少量出血，但呢個情況並唔常見，即使真係懷孕嘅人都唔一定會有床性出血。而受精著床既過程大概需要6至9日，但你哋係性行為期間有全程戴好安全套，只要有正確使用，基本上唔會導致懷孕，所以近期少量出血情況未必同著床無關。但為左排除懷孕既可能性，可以係最近性行為發生7日後透過驗孕棒測試得到初步嘅結果，而係第11日後或者預計月經嘅日子驗見過就會更加準確。聽日你可以去買一支驗孕棒測試一下，去到性行為11日後再驗一次去確認結果。同埋都想提醒下，雖然你地性行為時都有全程戴好安全套，但拔出時都要檢查一下安全套有無穿，咁會最穩陣。
唔知你女朋友會唔會都有服食避孕藥，如果有服食，避孕藥係會令經血量有改變，特別係變少，都係好常見嘅。因為避孕藥內嘅荷爾蒙會取代咗身體自然釋放荷爾蒙嘅週期，每個月所見到嘅「出血」其實係叫「撤退性出血」，同未食藥之前自然出現嘅「月經」其實唔係完全一樣嘅。而且藥物亦會令子宮內膜增厚嘅幅度減少，所以有好多人係食藥後會發現經血量變少、經期縮短、以及減少出現血塊。
另外，月經好多時都會受好多因素影響的，例如：生活作息唔定時、心理質素唔穩定、壓力過大、飲食唔均衡、最近有服用藥物（特別係抗生素類），都會令女性月經唔穩定，例如：月經嘅日期、血量、顏色等，特別係如果食過藥，或者飲食好唔均衡的話，係令血量有機會明顯減少嘅常見原因。有時因為以上嘅原因，都會有機會令月經黎之前1-2日，出現一滴一滴（spotting）嘅出血情況。因為暫時如果呢個情況只係出現左1-2日，都無需太擔心。亦有機會係月經前出現流啡既情況，流啡係因為荷爾蒙變化，子宮內膜出現少量脫落或者出血，當時間耐咗，血就會氧化變成啡色/啡黑色，而血量係唔多既。
不過如果驗孕後確認沒有懷孕，可以考慮去睇醫生，檢查一下卵巢或者其他身體部位有無出現問題啦，同埋出現經血量少既原因，咁就唔使成日擔心。
希望可以幫到你。
請問有無可能關呢排天氣凍事？
都有啲中醫會話係天氣寒冷，令到身體虛寒， 容易出現陽氣不足、氣不順、宮寒等等情況，都會影響咗月經，令經前綜合症更加嚴重，但令到月經冇血就未必有關係。但每個人嘅身體都唔同，未必能夠一概而論。不過無論如何，都可以接注重返保暖，特別係腹部保暖，尤其是呢排天氣凍咗，除咗幫助到月經，都可以保暖到身體。
但係，19號嗰次係咪係得好少血？因為都有機會19號個次未係真正係月經，只係流啡，所以只係得少少血。因為我好似上面同事講咁，月經係受好多唔同因素影響，有機會會提早或者延遲，都可能因為咁令你誤會咗19號嗰次就係月經。