我今年1月開始食Nordette 21包裝，一直都有每日食藥，最多都係遲咗一兩個鐘食
最近呢包係11月23日開，食咗差唔多6日有唔小心內射，一直都有日日食藥。
想問下如果食開藥嘅情況下，頭一個星期唔小心內射咗會唔會好大風險 
啱啱琴日食完最後一粒藥，暫時都未嚟m
Hello，多謝你嘅提問。
其實你嘅情況都唔會有好大風險。因為你一直都有食開避孕藥，只要你最近冇漏食過避孕藥，每日食藥時間冇相差太遠，同埋冇喺食完藥之後短期內嘔吐過而影響身體吸收藥效嘅話，基本上藥物已經喺你身體上建立咗足夠避孕功效，就算係停藥期或者係新一包嘅頭6日都好，避孕功效依然喺你身體上面運作緊，所以都唔使太過擔心會懷孕。通常一般建議話食避孕藥頭7日要配合其他安全措施，係指第一次開始食避孕藥，仲未建立到任何避孕藥功效，所以先至要咁做，如果一直有食開嘅話就已經有足夠功效，就算開新一包避孕藥食都好，都已經建立左足夠嘅功效，所以就唔需要太過擔心。
另外，雖然食藥時間相差一兩小時不至於會好大咁影響到避孕功效，但都會建議最好每日可以準時咁食到，咁樣就可以最好咁發揮到避孕功效，同埋唔會對身體造成其他影響。
最後都提一提醒，服用避孕藥雖然都有避孕功效，但係係無辦法減低性病傳播風險。所以如果想有更好嘅保障，都建議可以考慮使用安全套，減低性病傳播嘅風險。