21號淩晨同男朋友發生性行為。係sex之前，bf用自己隻手打咗一陣飛機，之後用咗同一隻手撫摸我陰部同指插咗。我哋之後戴咗套have sex，但途中覺得乾就無再繼續，bf當時亦無射精。bf話除個套個陣睇到無爛。
今日去咗家計會攞事後丸，食咗。
但我都仲係好憂慮，因為一直有用app track住幾時嚟m+排卵，知道呢幾日係排卵期。雖然呢幾個月嚟m日數都好唔一樣。分別係9月17號、10月23號、12月6號嚟m。
請問咁嘅情況下，懷孕嘅機會係咪會好細？另外，點先知事後丸有效成功避孕？聽人講係見到有spotting先係成功？
hello你好啊，見到你喺性交後72小時之內服用事後丸。事後丸嘅效用喺97%-99%，有啲人會喺食完藥後經歷副作用，例如頭暈頭痛、噁心嘔吐、腹痛或者岀血，即係你所講嘅spotting，但唔係所有人都會有副作用，同樣地，無副作用唔代表粒事後丸無用，不過，如果你喺食完藥三個鐘內嘔吐，就可能會影響到藥物發揮作用，有需要再食。因為事後藥都係高劑量嘅荷爾蒙，所以記住一個月經週期內，只可以食一次事後藥，一年內唔可以食多過三次。如果好擔心懷孕嘅，記住全程性接觸都用安全套，或者可以考慮食避孕藥，就會有全面啲嘅保障。
另外，都可以驗孕，因為一般受精卵著床需要6-9日，所以喺性行為11日後進行驗孕，結果係較準確及可靠嘅。
見到你經期都未必每個月一樣，所謂嘅排卵期亦必準確， 好多唔同嘅原因都會影響經期嘅，例如荷爾蒙失調、生活作息、飲食習慣、服用藥物、情緒壓力等，亦可能會喺月經期間亦出現排卵嘅情況，除非每日都係醫生指引下用排卵棒測試體內狀況，否則無辦法準確知道係邊一日排卵。
見到你男朋友喺打飛機後幫你指交。雖然pre-cum即係尿道球腺液係有少量嘅精子，但精子接觸到皮膚後，好快就被吸收，特別你男朋友係打飛機，中間有磨擦嘅行為，所以精子存活量唔高。不過，如果掂到未乾嘅精液，再指交嘅話，懷孕風險就會相對地高啲。
最後都想提翻句，喺接觸對方/自己性器官前，可以洗手先，仲可以可以用指交套，有助避免懷孕及性病傳播嘅風險。
食完事後呢幾日都無副作用，係咪都正常架？我好擔心食咗藥都無用 
事後藥副作用係因人而異嘅，未必個個食完都會有副作用，冇副作用亦唔代表冇藥效。
如果你有喺事後藥嘅時效內（72／120小時），食由醫生處方嘅藥，食完冇嘔吐或者嚴重腹瀉，咁避孕成功率係好高嘅。
如果你擔心嘅話，可以考慮驗孕，最後一次性行為7日後驗孕會有初步結果，而11日後驗孕，會有相對準確嘅結果。
而都想提提你，事後藥可能會影響1－2次月經週期嘅情況，所以可能你嚟緊嘅經期情況會同平時唔同嘅，唔需要太擔心。
我今日下晏，即性行為後7日，用驗孕棒驗孕陰性。 請問會唔會係因為下晏驗 而非用晨尿所以唔準確架
Hello~
建議使用晨尿驗孕嘅講法係因為驗孕棒係透過檢驗尿液中嘅人絨毛膜促性腺激素 (hCG) 水平黎驗出有冇懷孕，而因為晨尿較濃縮，內含嘅hCG較多，所以就比較易驗出結果。但因為每款驗孕棒喺操作上都唔一樣，所以其實要唔要使用晨尿，最準確都係睇返嗰款驗孕棒嘅說明書。
而性行為7日後驗孕，個結果雖然未係最準確，不過都有參考價值，而11日後驗，個結果會再準確啲。如果到時個結果都係陰性，咁就可以確定冇懷孕啦！🫶🏻
係性行為後第13日嘅時候驗咗一次孕，陰性。請問結果可靠嗎？
性行為11日之後驗孕結果已經足夠準確，所以陰性嘅話就代表冇懷孕。