第一次食事前藥

第一次食YAZ
依家係食緊白色藥丸第二粒準備食第三粒
食左呢個月都冇覺得有副作用 但係依家仲未黎M
上網見到有人話唔一定會黎M
依家有D擔心會唔會唔黎M

Hello~其實荷爾蒙避孕藥係用人造嘅荷爾蒙係取代本身嘅月經週期,原則上食咗藥係會抑制咗排卵嘅,即係唔會有月經。而本身每個月出現嘅月經係因為卵子冇受精而排出嘅,食咗避孕藥之後就唔會有呢個情況。所以呢度想解釋返畀你聽你等緊嘅「月經」係咩嚟嘅先~

由於藥物嘅設計想比使用者習慣每個月都有月經,感覺上有一個規律性同埋知道自己冇懷孕嘅感覺。所以食到最後嗰幾日冇藥效嘅藥物/停藥期,因為荷爾蒙嘅驟降,都會有少量子宮內膜出血嘅情況,形成咗我哋服藥之後見到嘅嗰啲出血嘅情況。雖然外界一般都會繼續叫佢做月經,但佢正式嘅學名其實係撤退性出血(withdrawal bleeding)。所以有時候喺服用事前避孕藥期間,特別係頭幾個月,見到啡色嘅出血,會好難判斷到佢係副作用嘅出血啊,定係撤退性出血。

一般來講,喺接近或者服食緊冇藥效藥丸期間,如果持續出現分泌物(好似以往嘅月經咁樣),都可以認為呢一個撤退性出血,亦都係你今個月嘅月經。事前避孕藥除咗會改變月經周期,亦會改變撤退性出血/月經時出現嘅血量同顏色,未必會好似以往月經一樣係咁鮮紅色嘅。相反,因為藥物副作用而出現嘅點狀出血,通常量都會比較少,而且唔會好似月經咁連續幾日持續分泌。

因為喺服用喺頭幾個月,身體會需要時間去適應外來嘅人造荷爾蒙,所以「月經」(撤退性出血)出現嘅時間都會比較不穩定,但只要有準時同持續服食事前避孕藥,避孕功效係會喺體內穩定建立,即使係性行為期間冇使用安全套,會因此而導致懷孕嘅機會率都係非常之低。而「月經」嘅規律都會喺3-5個月內穩定落嚟,所以唔洗擔心:relaxed:

說明書話兩個月冇「月經」就要去睇醫生 定係其實確保冇懷孕都可以唔洗睇 定係食幾個月就會有「月經」嘅出現

而且冇月經會唔會令身體有問題 定係話3-5個月子宮內膜一定會自己脫落

唔好意思 仲想問有所謂嘅「月經」就肯定冇懷孕

如果說明書係咁寫嘅話,就跟返說明書嘅指示,因為唔同牌子嘅避孕藥含有嘅荷爾蒙劑量都唔同。如果連續兩個月都唔黎「月經」,咁有機會代表呢隻避孕藥唔啱你,需要去覆診睇吓洗唔洗轉藥。

另外,子宮內膜喺係有排卵嘅前提下先會建立嘅。因為食咗避孕藥就唔會有排卵,所以唔需要擔心子宮內膜嘅問題。

冇錯,有「月經」係代表冇懷孕,但冇撤退性出血都唔代表懷孕,因為有部份人食咗避孕藥係唔會有撤退性出血嘅,而咁樣都係正常嘅。所以即係話,只要冇漏食,藥效有發揮到,咁避孕機率係可以去到98-99%嘅。