今年9月開始食美意避，準時食，食藥既期間冇咩問題，有時會係食尾個幾粒藥丸既時候已經出血嚟m，嚟七日左右，量比以前少，但十二月食到第十粒開始流啡出血，去到第十三四粒既時候係要用m巾好似平時第一日既量，當時距離上次性行為多過14日，有用驗孕棒結果冇懷孕。
去咗家計會見姑娘，姑娘話可能係太低劑量，建議我下個月轉另一隻藥試下，但而家開咗呢排就食曬佢，等七日再食新藥。
因為一直流血都好困擾，就去咗睇診所醫生開止血藥，醫生話止咗血就可以停，食咗3日變返流啡用護墊就夠既量，但都keep住有流啡，就冇再食止血藥，到12月23號都有啡色分泌。
係一路準時食藥既情況下，係12月16日有性行為，無套外射，20號食埋最後一粒藥丸，正常應該係停藥3日後有月經，但到今日12月25號（停藥第五日）都未有月經，而且24 25號亦冇再流啡。係23號同25號都有用驗孕棒驗孕，結果都係冇懷孕。
請問懷孕的機會大嗎？月經遲咗咁多都未有會唔會係因為之前既增厚已經係流啡既時候流曬？
我另外買多咗幾枝驗孕棒，會係性行為11日 14日同14日之後再驗。謝謝。
Hello~首先，荷爾蒙避孕藥係用人造嘅荷爾蒙係取代本身嘅月經週期，原則上食咗藥係會抑制咗排卵嘅，即係喺你開始咗食避孕藥嘅時候，子宮內膜就唔會再增厚，亦唔會有月經。因為本身每個月出現嘅月經係因為卵子冇受精而排出嘅，食咗避孕藥之後就唔會有呢個情況。所以呢度想解釋返畀你聽你而家嘅「月經」係咩嚟嘅先～
由於藥物嘅設計想比使用者習慣每個月都有月經，感覺上有一個規律性同埋知道自己冇懷孕嘅感覺。所以食到最後嗰幾日冇藥效嘅藥物/停藥期，因為荷爾蒙嘅驟降，都會有少量子宮內膜出血嘅情況，形成咗我哋服藥之後見到嘅嗰啲出血嘅情況。雖然外界一般都會繼續叫佢做月經，但佢正式嘅學名其實係撤退性出血（withdrawal bleeding)。所以有時候喺服用事前避孕藥期間，特別係頭幾個月，見到啡色嘅出血，會好難判斷到佢係副作用嘅出血啊，定係撤退性出血。
所以家計會姑娘話可能因為劑量太低係可信嘅，因為如果劑量唔夠，咁就維持唔到身體嘅荷爾蒙喺食緊藥嘅時候喺一個高嘅水平。因為荷爾蒙藥喺會被人體消化同吸收嘅，唔會喺身體累積，所以當劑量唔夠，有機會喺你食下一粒藥之前，身體內嘅荷爾蒙就已經開始下降，令子宮內膜出血。只要提高返避孕藥嘅劑量，就唔會再出血，可以放心
。
而你呢個情況，食止血藥係唔能夠完全改善嘅。因為止血藥只能夠提升身體嘅凝血功能，短期內令出血減少，但係唔能夠令佢唔出血，所以先會keep住流啡。
其次，你話「正常應該係停藥3日後有月經，但到今日12月25號（停藥第五日）都未有月經」，好有可能係因為荷爾蒙未降到出血嘅水平，亦有可能係因為身體仲有止血藥殘留（雖然可能性比較低）。現階段可以再等吓先，可以跟返姑娘嘅指示，停藥七日之後食新嘅，高啲劑量嘅藥物，應該就會恢復返原本嘅規律。
至於懷孕嘅機率就好微嘅，因為你本身都有食避孕藥，而且係準時服用，冇漏食。就算劑量唔夠高，都已經足夠抑制排卵。你12月中嘅出血就已經代表左子宮內膜冇增厚，即係冇排卵，所以懷孕嘅可能性係好低嘅，唔使擔心。當然，你可以喺性行為11至14日後再驗，見到個結果應該可以再安心啲
🫶🏻。
唔該曬你呀～回覆得好詳細，但有個地方都係唔係幾明白。
“其次，你話「正常應該係停藥3日後有月經，但到今日12月25號（停藥第五日）都未有月經」，好有可能係因為荷爾蒙未降到出血嘅水平，亦有可能係因為身體仲有止血藥殘留（雖然可能性比較低）。現階段可以再等吓先，可以跟返姑娘嘅指示，停藥七日之後食新嘅，高啲劑量嘅藥物，應該就會恢復返原本嘅規律。”
未有撤退性出血既原因係因為荷爾蒙未降到出血嘅水平，但我十二月中已經開始出血流啡，但最近呢一兩日係七日停藥期間流啡既情況又少咗，有時成日都冇。如果係未降到出血水平，我12月中應該唔會出血？
請問有冇機會係因為今個月避孕藥既劑量不足，令我子宮內膜無法增厚同一直脱落（所以出血流啡），去到停藥既時候，子宮內膜已經脱落得七七八八，所以停藥期咁耐都未有撤退性出血？
有冇可能我今次十二月既停藥期係唔會有撤退性出血？又或者十二月中個次已經可以當係撤退性出血？
因為都擔心有懷孕既可能，所以比較多問題唔子意思
唔緊要，明白係會擔心嘅，但好似上面同事講咁，你嘅情況懷孕機率其實都比較微，因為你都食咗避孕藥一段時間，身體已經建立左藥效，都已經抑制左排卵，所以唔洗太擔心。
初初食避孕藥嘅時候可能會有一啲副作用，流啡同埋「月經」同平時相比有比較大嘅分別其實都係比較常見嘅副作用。通常呢啲副作用3個月左右會消退，不過因為每個人身體情況唔同，副作用亦會因人而異，所以有啲人可能需要6個月去適應，而有啲人甚至需要轉藥去睇下身體適合邊隻藥嘅人造荷爾蒙成份同劑量。
未有撤退性出血嘅原因，可能係因為你呢段期間曾經換過避孕藥，有機會會令身體荷爾蒙改變，而身體又未適應習慣，所以先有流啡嘅情況，再加上你之前有食過其他止血藥物，可能都會影響到今次「月經」／撤退性出血嘅情況 。至於幾時先會可以有撤退性出血，都好難可以確切答實到你。如果呢段期間身體有咩唔舒服，或者你都會比較擔心嘅 ，其實都建議睇返醫生，問返醫護人員去尋求返專業意見。