因為私人原因，12月10號去家計會食第二次事後，然後上個禮拜五見撞正安全期，所以男朋友無套插左，但係就冇內射，不過懷疑有少少pre cum喺入面，加上唔記得食左事後經期可能會延遲，而且唔知安全期會唔會都會咁而變，不過完事之後用濕紙巾清潔陰道入面同埋沖涼清洗陰道，但係唔知清潔得乾唔乾淨，加上本身應該尋日黎m，不過都係冇咩跡象，淨係間唔中會腹痛同埋容易眼訓/攰，所以好驚會唔會中
另外補充返，想問安全期係點樣計？
我上一次黎m係11月26號，12月7食左第一次事後，某啲原因12月10食第二次，如果冇計食事後而影響經期既話，應該都係12月25/26號正常黎m。我同男朋友喺23號做，冇套但冇內射，但係今日27號都係未黎m，淨係間唔中腹痛，想問如果食事後而令到經期延遲，安全期會唔會都會延遲？好驚如果係咁，23號無套但冇內射既日期仲係處於危險期，最驚就係呢一點，好驚下個禮拜仲未黎m同埋中…
Hello~坊間所講嘅安全期係以一個週期28日去計算，而一個週期係由嚟月經第一日直到下一次嚟月經前一日為止。係一個28日週期之中，安全期嘅計算係假設咗身體會係第14日排卵，所以週期嘅第1－7日以及21－28日，亦即係所謂嘅月經前7後7日會係所謂嘅安全期。
但係安全期並唔可靠，原因係：
1）唔係每個人嘅週期都係28日
2）即使係28日週期嘅人都唔一定係第14日排卵
3）要去到月經出現我哋先可以計算上一個週期係幾長，再大概估算上個周期嘅排卵日同「安全期」係幾時，唔能夠係未出現月經就單憑計算日子準確知道係幾時排卵
而且，有啲週期較短嘅人甚至會係月經期間或月經月結後就排卵，而精子進入體內最長可以生存3－5日，如果咁啱遇上身體排卵，就有機會造成懷孕。
所以使用安全期避孕並唔係一個有效的方法。因為月經週期可以被太多因素影響，變相亦較難準確推算出一個絕對『安全』的日期。加上每個人排嘅時間都不同，而且月經同排卵有機會撞期，所以即使剛剛完結月經亦有機會受孕。最理想是在有使用避孕方法的情況下才進行性行為。
人嘅身體是一個非常複雜的系統（否則，我們嘅生物學家、生理學家都唔能夠保住佢地嘅飯碗了），生理週期、排卵與否實在同太多的因素相關。所以安全期避孕實際上也唔見得係一個非常可靠的避孕手段。而且往往要待經期出現才能推算已發生的排卵期及安全期，無辦法預計下一個月的「安全期」。
如果真係要計算排卵期/安全期，首先你要喺醫生指示底下每日去記錄身體同分泌嘅狀況，同時間亦都需要用基礎體溫計（唔係普通市面嘅體溫計）去記錄同比較每日嘅體溫，再加上要每日都用排卵棒去測試，先可以比較有系統地推斷到幾時排卵期，之後先可以大約知道安全期係幾時。
所以結論就係其實我哋好困難先至有機會知道係咪安全期，而呢個唔確定亦都令到用安全期嚟避孕並不安全。
雖然一般來講排卵後卵子大概只可以存活兩至三日，但精子可以喺子宮存活最長五日，呢啲時間亦會因為雙方嘅身體狀況而有唔同。所以，係唔能夠準確知道其實到底幾時係排卵期嘅情況底下，加上卵子精子嘅存活率都係會受外在因素影響，即使係排卵期之後嘅日子，都唔代表係完全安全。呢個亦係所謂「安全期」唔一定安全嘅其中一個原因。
只要性器官有直接接觸，就會有懷孕風險。如果唔想有BB嘅話，都係做好安全措施最穩陣。如果想唔用安全套嘅話，可以考慮服用事前避孕藥，或者打避孕針。不過都要提一提你，使用安全套唔只能夠避免懷孕，仲可以避免性病嘅傳播，保障雙方嘅健康。所以都希望你做足安全措施之後，先至進行性行為🫶🏻
咁係咪清潔下體都未必有用？
另外想提醒返：
-
唔建議用濕紙巾抹陰道入面或者清洗陰道入邊，因為咁樣有機會破壞陰道嘅酸鹼平衡，影響陰道健康。而且灌洗陰道並唔能夠有效避孕。
-
食完事後藥之後直至月經出現，都唔建議發生性行為，以免同一個週期內多次食事後藥會影響藥效，或者對身體有比較大嘅負擔。
如果你擔心嘅話，可以考慮驗孕，最後一次性行為7日後驗孕會有初步結果，而11日後驗孕，會有相對準確嘅結果。