是咁的，今日同男朋友一時興起咁冇帶套插左入去幾下大概一分鐘內。佢插入去嗰陣有check過個頭係冇濕的(有keep住用紙巾抹)佢用個頭係咁磨我個陰唇附近嗰啲位，最後我忍吾住咁高潮左，我係全程都keep住好濕嗰隻，想問下咁既情況底下我會吾會有懷孕既機會？同埋我既經期係經常都吾準，個期大概35-51日左右都試過 
咁啱上次經期係12月1日黎m，我到今日都仲未黎，想問下個懷孕機率會吾會大增同咪依家算吾算係安全期？ 
Hello 按照你嘅描述，只能夠講會有懷孕嘅風險。
首先，其實好難確保你男朋友插入你陰道嘅時候，會唔會有精子係大家都唔清楚嘅情況滲出嚟。因為即使就算冇射精都好，當陰莖處於勃起或者性興奮狀態時，都會分泌一啲尿道球腺液。而雖然尿道球腺液本身係冇精子嘅，但當尿道有少量殘餘精子嘅時候，尿道球腺液就可以保存到精子嘅生命，然後從尿道口流出來。所以精子都有可能會透過尿道球腺液喺插入嘅過程途中滲出陰莖，然後留咗喺你嘅陰道入邊。即使有用紙巾抹個龜頭，但係你男朋友插入緊陰道嘅時候，就算只係好短時間，我哋都唔能夠完全排除佢可能已經係陰道入面分泌咗有精子嘅尿道球腺液，所以呢個風險係存在。而有冇高潮，其實就同會否懷孕係冇關係嘅。
至於安全期，其實並唔係一個可靠嘅避孕方法。因為所謂嘅安全期其實係希望喺排卵期以外嘅日子進行性行為，從而避開精子同卵子接觸，以避免懷孕。但其實本身身體排卵就會受到各樣因素影響，所以好多時都要等月經出現咗之後先至可以向前推算返排卵嘅日子，特別係你嘅經期都唔係特別規律，所以只要係冇用安全措施發生過插入式性行為，就算最後冇射精都好，其實都係會有懷孕風險嘅。
如果你衡量過風險之後，認為有需要嘅話，都可以選擇服用事後丸作為緊急避孕措施。而事後丸係有分兩種，一種係要喺發生不安全性行為之後嘅72小時內服用，另一種就要係不安全性行為之後120小時內服用。因為佢喺香港係醫生處方藥物，所以必須要透過睇醫生去獲取相關藥物嘅。如果你地係唔放心嘅話，都可以考慮去家計會或者其他診所，諮詢返相關醫護人員嘅意見，同佢哋講返你嘅情況，交由佢哋去決定是否處方事後丸。
或者你都可以選擇自行驗孕。你可以去一啲信譽良好嘅個人護利商店或者藥房，買可靠牌子嘅驗孕棒，根據驗孕棒說明書嘅指示驗孕。係性行為之後7日驗孕會有初步結果，11日之後就會有準確結果。
最後都提醒返，如果冇生育計劃嘅話，都會建議進行性行為做返安全措施，例如性行為全程正確咁用返安全套，咁就唔使事後咁擔心。
想問一下痾尿會唔會排出到尿道殘留嘅精子？
小便可以沖洗到，不過陰莖受到刺激嘅時候，依然會分泌尿道球腺液，好難確實咁保證到當中一定冇精子。而導致懷孕嘅只係需要一粒精子。
所以建議發生性行為嘅時候，使用返適合嘅安全措施。
睇網上外國forum reddit 話有講到 係會接近高潮 / 射精嘅時候先會產生精子 請問呢個講法正唔正確？
唔正確呀 
精子係喺睪丸製造嘅，由青春期發育成熟開始，睪丸就會不斷製造精子同埋分泌性荷爾蒙。精子會儲存喺附睪入面。所以，並唔係「接近高潮 / 射精嘅時候先會產生精子」。
Reddit類似連登咁，係一個網上平台，用戶可以任意發言，有時講嘅嘢未必係真確嘅。
如果你想了解多啲嘅，可以參考：動畫教室：認識男性生殖器官 - 香港家庭計劃指導會
同埋 https://www.famplan.org.hk/zh/our-services/e-services/sex-qa/index/puberty/ejaculation-and-wet-dreams/detail#45
都想問一下係咪就快到射精個陣precum 裏面先會有精子？定無論點precum 裏面都會有精子？
我哋好難可以好肯定咁知道幾時尿道球腺液（precum）入邊一定有精子／幾時一定冇，，所以如果暫時未有懷孕打算，就要避免尿道球腺液同陰道／陰道口接觸。
你好，謝謝你既耐心解答
🫶🏻明白曬～
補充返，我上星期啱啱黎左m啦，我係黎m既第3日第一次開始服用事前避孕藥，今日啱啱好食緊第8日，想問一下今日全程插住內射左既話係咪都算安全架？因為我見到上網話第一次食事前避孕藥係建議要月經第一天開始服用既？
同咪想問下正常陰部係咪聞落係咪冇味？因為我自己係有酸酸地同咪鹹鹹地既味，如果有腥味又係代表啲咩？定係嗰啲係尿腥味？
Hello~如果係喺月經頭五日開始服用事前避孕藥嘅話，咁服用嘅做頭七日就要配合外用嘅安全措施，等藥效建立左之後先至可以無套內射。見到你話今日啱啱好係第8日，咁只要你之前嗰7日每日都有準時食藥，又冇漏食嘅話，咁係唔需要擔心懷孕嘅。
至於陰部味道嗰方面，因為每個人都有佢自己嘅體味，磨擦都會出汗，所以好難會完全冇味嘅（有鹹味係正常）。加上陰部係偏酸性嘅，所以會有酸酸地嘅味道都係好正常不過嘅事。不過如果係擔心有發炎症狀嘅話，可以留意下自己分泌物嘅情況，例如會唔會有魚腥味，顏色變黃/變綠，或者嗰質地變成蛋白豆腐渣狀等，咁先至係唔正常，需要睇醫生。其他情況下，只要每日有正確咁清潔陰部，係唔會有異味或者痕癢灼痛嘅感覺嘅。當然，我哋都會建議返每次進行性行為嘅之前同埋之後都要好好咁清潔性器官，特別係要提醒伴侶清潔。因為有陣時細菌感染男性係唔會有任何症狀嘅，到傳染咗俾另一半先至知。所以每日嘅清潔唔單只係維持自己身體嘅健康，對於保障另一半嘅安全亦都好重要🫶🏻。