同男朋友有性行為 一直都係帶套 再加外射 但係遲左5日 本身應該29號黎 31號開始個胸好脹痛 1號嗰日用咗兩支驗孕棒一條線 係咪純粹遲黎咋
補充返 月歷顯示 12月10日到16日係排卵期 我地12月3號.4號 10號，17號.18號.25號同27號都有做，全部都係全程用安全套加外射，1號驗左一條線，係咪唔會中
Hello
好開心知道你哋每次性行為都有使用安全措施。 
如果性行為全程都有正確咁使用安全套，過程中安全套冇穿冇漏，咁懷孕風險係好低嘅。
驗孕其實係檢測身體有冇hCG呢種卵子受精著床之後身體先會產生嘅荷爾蒙，而卵子受精、受精卵著床需要大概6－9日時間，所以性行為7日後驗孕會有初步結果，而11日後驗孕就會有相對準確嘅結果。你可以睇返最後一次發生性行為嘅日子，計算返日期驗孕。如果太早驗孕嘅話結果就會唔準確。而胸部脹痛可能係經前常見嘅症狀，唔可以用嚟作為懷孕嘅指標嘅。
排除到懷孕嘅可能，就可以安心等月經嚟啦。
都想解釋俾你知，月經同埋排卵其實好容易受到其他因素影響，例如荷爾蒙水平、飲食、作息、壓力等等。你呢排會唔會比較夜瞓？或者食嘢有冇唔同咗？呢啲因素都可能影響到月經嘅。每人每次嘅月經情況都可能會唔同。至於排卵期，其實係要等月經出現咗之後先可以推算返，除非每日喺醫護人員指導下用排卵試紙測試，否則我哋好難知道究竟幾時排卵。月曆計算或者APP嘅預測只係根據你以往嘅月經資料去估計，唔會考慮到你嘅其他身體因素，所以都未必準確嘅。
最後俾啲關於安全套嘅資料你參考下：
《Stickypedia系列－安全性行為：第一寶 安全套》
10個有機會令安全套失效嘅原因
如果有其他問題，歡迎隨時搵我地呀！ 
我31號有胸脹痛同入面有舊硬物，除此之外冇其他特徵，係咪安全！
其實冇一個所謂嘅「特徵」係可以直接去判斷到有冇懷孕嘅，如果你擔心嘅，與其估估下，不如去驗孕。
胸部有感覺硬物呢樣嘢反而值得留意。胸部的確係會受荷爾蒙變化影響，喺經前或者經期會有脹痛嘅情況。不過如果係覺得有腫塊或者明顯嘅異物感，甚至平時都會覺得痛或者唔舒服，咁都建議諮詢下醫生嘅意見。如果有需要可以去家計會診所／母嬰健康院／部分私家診所預約。
1號驗左2次都係一條線，月經前都會胸脹痛，平時唔會
有冇邊度唔清楚？
1個讚
今日個胸脹痛突然減退，但係仲未黎m,而且白帶多左同比較濃稠，係點解，求解答
Hello~你呢種情況好大機會係暗示就快嚟M，所以現階段可以放鬆心情再等吓先
因為你最後一次性行為係27號，所以如果一直都未嚟M嘅話，你可以選擇喺1月8號嘅時候驗孕，因為中間相隔咗11日，所以個結果會係最準確。
因為月經周期係好唔規律嘅，所以月經提早或者遲嚟一個禮拜都係正常嘅。除非你遲咗三個禮拜都未嚟月經，有確定冇懷孕，咁就需要去睇醫生，等醫生考慮會唔會開催經藥俾你。
希望以上嘅資訊幫到你🫶🏻
1個讚
我地每次性行為都會全程安全套，然後再拔出射入安全套入面，咁樣係咪好安全？
Hello~坊間一直流傳安全套嘅避孕率高達98%，但實際上只有82%。要配合正確嘅使用方法，先可以達致98%。譬如好多人一開頭分唔清安全套嘅正反面，會唔小心將安全套反轉再反轉用。其實陰莖一旦唔小心接觸咗安全套出面，佢就已經被沾污，應該要用過個新嘅。另外，要留意安全套有冇過期，唔好使用過期嘅安全套。而喺撕開包裝之前要檢查包裝有冇漏氣，打開之後要將安全套頂部嘅氣泡擠走先戴上去，留空間畀男性儲存精液，減少破裂嘅情況。並且絕對唔可以做了一半後才戴套。而做完之後，記得要喺陰莖仲勃起嘅時候抽出陰道，撳住頂部再將安全套拔出，避免精液流出。灌水檢查完安全套有冇破裂後，再打結扔掉。就算外射都好，如果本身安全套穿咗嘅話，咁都係有機會導致懷孕嘅。因為陰莖係射精之前已經會分泌尿道球腺液，內含少量精子，會提升懷孕風險。不過，如果做足晒上面所有嘅措施，咁懷孕嘅機率就係好低嘅，唔需要擔心。
1個讚