同男朋友無插入嘅行為，只係有幫大家用口用手，如果只是有試過喺陰唇位磨，精子會唔會都有機會入左去，或者如果男朋友幫我用手嘅時候會唔會都可以經呢個途徑入左去？因為我上一次嚟m滴左好耐先正式嚟，去到12月5號完，但今日我到而家都未嚟，但係我經期係會唔準量少日子少，次次都怪怪地嘅，同埋因為我好驚會比會壓力自己，會唔會因為咁月經愈推愈遲？需唔需要買驗孕棒去試？如果萬一有左係唔係好奇怪？好似好容易就中咁？
1個讚
陰莖喺受到刺激嘅時候會分泌尿道球腺液，當中有機會有少量嘅精子，而如果尿道球腺液同陰道口有接觸，咁精子就有機會會進入體內，導致懷孕嘅只係需要一粒精子。但如果陰莖／尿道球腺液同陰道口冇直接接觸，咁懷孕風險就會好低嘅，因為精子需要靠精液／尿道球腺液提供養份，係唔能夠離開精液／尿道球腺液生存或者移動嘅，如果精液／尿道球腺液離開體外暴露喺空氣入邊，精子都會好快死亡。
如果你真係好擔心嘅，可以考慮驗孕。驗孕其實係檢測身體有冇hCG呢種卵子受精著床之後身體先會產生嘅荷爾蒙，而卵子受精、受精卵著床需要大概6－9日時間，所以性行為7日後驗孕會有初步結果，而11日後驗孕就會有相對準確嘅結果。你可以睇返最後一次發生性接觸嘅日子，計算返日期驗孕。
都想解釋俾你知，月經其實好容易受到其他因素影響，例如荷爾蒙水平、飲食、作息、壓力等等。你呢排會唔會比較夜瞓？或者食嘢有冇唔同咗？甚至你擔心懷孕好大情緒壓力呢啲因素都可能影響到月經嘅。每人每次嘅月經情況都可能會唔同。不過如果你話你嘅月經情況成日好浮動，或者經常有非經期流啡嘅情況，都建議可以睇下醫生，檢查下有冇一啲病理性嘅原因導致，例如荷爾蒙問題／子宮或者卵巢問題。如果有需要可以去家計會診所／母嬰健康院／部分私家診所預約，了解清楚自己嘅身體情況，可能你都會安心啲。
最後建議你哋可以考慮即使唔係發生插入式嘅性行為，都可以使用安全套，避免陰道口意外同陰莖或者分泌物接觸到而有風險。接觸性器官之前記得做好清潔，避免手／指甲污糟導致感染呀。
安全套嘅使用方法可以參考： https://www.instagram.com/p/B4EX0FVFLUf/?utm_source=ig_web_copy_link