大家好呀，話說我最近岩岩結婚，結左1個月左右啦，結婚前我同太太都無性經驗。
呢個月我地試左4，5次，但係都係無成功進入過，最主要係因為我自己並不能夠完全勃起，硬度與自慰時比較明顯下降，甚至有唔少時間係不能勃起。
另外我覺得自己性慾下降左，雖然30歲未夠，但係同太太互相撫摸既時候並無興奮既感覺，投入唔到，精神都好唔集中，經常有無關痛癢的其他事情浮現於腦海中，自慰既衝動都下降左。
除此之外，太太陰道都比較緊，即使用左潤滑液，單隻手指進入，都會覺得痛。
最後係太太對自己既身體並唔係太了解，都係呢個月我地先開始一齊探索下，而且佢唔理解點先係高潮，即使佢有自慰既習慣，但係佢覺得自己並無高潮過。
問題好多，都幾困擾我地，感謝你地幫手解答
好多謝你信任我哋同我地分享你地嘅經歷，好明白你嘅困擾。
首先，唔使覺得係自己或者係伴侶嘅問題，因為其實好多人都會有呢種困擾，好多人都唔係一次就即刻得，都會有好多因素影響表現，例如緊張、壓力、身體狀況或者年紀等等。你提到大家婚前都冇性經驗，而你地性愛都「無成功進入過」，所以你同你嘅伴侶都有可能緊張、恐懼等等唔同情緒不自覺令身體受到影響，導致會覺得勃起唔到或者陰道覺得好痛。。
另外，有時有機會因為陰道潤滑度不足，所以會令外物比較難進入。都可能因為緊張而令陰道分泌少而減低潤滑，而且其實每個人天生嘅分泌量都唔同，有啲人有機會本身分泌量比較少令到天生陰道冇咁容易變得潤滑，都會令呢種情況出現。明白你地有嘗試使用潤滑劑，可能都可以睇下使用嘅量夠唔夠～
不過，都想你明白，其實性行為唔止得一種，並冇話插入唔到、或者冇高潮，就係「唔成功」嘅情況。如果執着於呢個位嘅話，都可能會令你哋係性相處呢方面有壓力，反而會增加左緊張嘅感覺而令你哋更難做到插入式性行為。而且，生活習慣、作息習慣、體力等等呢啲好多都會影響到陰莖嘅硬度同持久度，所以有時變軟都唔需要沮喪或者怪責自己，因為咁樣都係好正常。
好開心見到你地一齊嘗試同埋探索，去了解自己嘅喜好。你地都可以多啲溝通，傾吓大家鍾意點樣嘅情況，創造一個大家都覺得安全而又舒服嘅環境，甚至可以考慮去下酒店或者其他環境，又或者試下唔同嘅燈光、音樂、香薰氣味等等。多啲著重前戲嘅部分，試吓探索唔同嘅部位或者行為，例如愛撫、親吻、按摩等等，都可能可以俾到更輕鬆放鬆嘅感覺，亦同時可以帶來性歡愉，咁可能都可以幫助到陰莖變軟同陰道太緊嘅情況。
另外，其實性行為有好多唔同形式，一樣可以達到性滿足，並唔需要執着於插入式性行為，而且並唔係個個人都係最喜歡插入式性行為。如果你地都唔係從插入式性行為中得到好大嘅滿足，都可以探索下其他唔同形式嘅性行為，例如口交、手交等等，可能你地會搵到更加合適你哋嘅形式，或者都可以喺呢啲形式嘅性行為上得到更大嘅滿足。同埋對於一啲人嚟講。陰道插入未必會有足夠嘅愉悅感，反而陰蒂會敏感啲、舒服啲。所以都可以建議伴侶可以自己、或者你去刺激佢嘅陰蒂，由溫柔緩和嘅手法開始，睇下會唔會有更加刺激或者舒服嘅感覺。有唔少人都分享過，佢地好少「陰道高潮」，反而會比較多「陰蒂高潮」。而你地都可以傾下「高潮」對於你地嚟講係咩，高潮可能未必要係目的，反而享受咗個過程亦係一種歡愉。
另外，本身比較少插入式性行為經驗嘅人都係需要一定時間先適應到有外物進入陰道，並唔係人人都係「一次就得」，所以你地可以練習下令外物進入陰道，例如可以嘗試先用一隻手指慢慢插入陰道，當覺得OK之後就慢慢增加手指嘅數量，慢慢試下令陰道擴張。你地仲可以慢慢試吓唔同角度或者頻率嘅抽插，去搵出合適自己嘅方法。但記住如果用手指嘅話，就要先剪好指甲，同保持乾淨，如果唔係有機會會整傷陰道。同埋可以考慮用埋指套／用安全套包住手指，避免指甲刮到陰道唔舒服。如果未必鍾意手指嘅感覺嘅話。都可以考慮去性商店買一啲合適尺寸嘅性商品輔助，例如一啲棒狀嘅性玩具，都建議尺寸從小到大，慢慢嚟慢慢試。
有時覺得插入式性行為唔舒服，可能係因為唔太識得控制骨盆底肌呢組肌肉（不過其實我哋平時都會用到，例如小便嘅時候就需要放鬆骨盆底肌），伴侶都可以參考下呢個page嘅內容，可能了解多咗自己嘅身體之後，都會容易啲去進行性行為： https://www.instagram.com/womenshealth_hk/ 6
如果經過嘗試都未必「成功」到，或者呢樣嘢令你好困擾好擔憂，你都可以考慮性治療或者輔導呢啲服務（例如家計會有提供，可以參考：https://www.famplan.org.hk/zh/our-services/clinic-services/sex-therapy/content） 3 ，睇下會唔會幫助到你哋。
有其他問題隨時搵我地啦！