我係12月15嚟m嘅，之後同男朋友係25冇帶套做，然後佢冇係入面射，外射咗，但係我哋都驚出事，所以就去咗睇醫生，嗰日係28號夜晚，個醫生話因為已經過咗72小時，所以就開咗第二款俾我，係艾伊樂嗰款，食完之後都冇咩副作用，但就係好驚都係會有咗，但係係12月31日夜晚準備跨年嘅就發現，係咁尿頻，每次去廁所小便都係得好少，但係就成日好急尿，之後今日就瀨尿添，我上網search 呢啲症狀係尿道炎，但係我想問吓關唔關食事後藥事，定係呢啲係性病特徵？我真係好驚…
如果你係性行為120小時內食由醫生處方嘅時候藥，食完冇嘔吐亦冇嚴重腹瀉，咁懷孕風險都會好低嘅。事後藥係用高劑量嘅人造荷爾蒙去抑制排卵、干擾受精同著床嘅過程，從而達致緊急避孕嘅功效。每個人身體情況唔同，食完事後藥之後嘅身體反應亦會因人而異，有冇副作用同有冇效係冇關係嘅。不過想提提你，事後藥有機會影響1－2次月經嘅情況。
如果你擔心嘅，可以考慮驗孕。驗孕其實係檢測身體有冇hCG呢種卵子受精著床之後身體先會產生嘅荷爾蒙，而卵子受精、受精卵著床需要大概6－9日時間，所以性行為7日後（1月1號）驗孕會有初步結果，而11日後（1月5號）驗孕就會有相對準確嘅結果。
至於你尿頻、經常有急尿嘅感覺，都係尿道感染嘅症狀，建議你可以盡快去睇下醫生，避免延誤咗治療，唔好自己買藥食呀，有機會唔啱食，反而對身體造成負擔。如果性行為前後冇做好清潔，好容易有細菌或者其他致病原進入尿道造成發炎，尤其月經期間、或者荷爾蒙水平有變化，有啲人會相對更加容易感染發炎。
至於性病方面，如果你哋之前有發生過唔安全嘅性行為，如果擔心嘅話，你同男朋友都可以去進行測試，了解自己嘅身體情況，對於自己同對方都有保障。
建議呢段時間你多啲飲水，著棉質底褲同鬆身嘅下身衣物，做好清潔。同埋避免發生性行為。
如果之後再發生性行為，建議你哋全程正確使用安全套（可以參考： https://www.instagram.com/p/B4EX0FVFLUf/?utm_source=ig_web_copy_link），安全套除咗可以避孕之外，都可以預防性病傳播或者其他感染，例如尿道炎或者念珠菌感染。性行為前後可以小便，同埋做好清潔。
有其他問題歡迎隨時搵我地。
咁我想問下如果我今日去睇醫生，醫生會唔會check到我有食過事後藥架，因為上次去睇醫生姐係開咗事後藥嗰一次，係男朋友陪我去睇，但係要睇疑似尿道炎呢一次會係去返平時睇開嗰個家庭醫生，而且今次媽咪都會陪我去睇，但係媽咪唔知我有同男朋友有發生性行為，我好驚會比佢知道，所以有想問下醫生會唔會check到我有食過事後藥架…
Hello~醫生係唔會check到你食過事後丸嘅，因為事後丸係荷爾蒙藥物，食完之後好快就會被身體吸收，係唔會有殘留嘅。所以正常診症嘅情況下係唔會check到嘅，可以放心。
尿道炎嘅話，通常醫生都會要求你瞓低，俾佢望吓陰部，睇吓有冇紅腫，或者撳落去又冇灼痛嘅感覺。雖然男醫生通常都會叫埋護士一齊同你做檢查，不過喺陌生男人前面除褲都可能會尷尬，所以如果睇醫生嘅話，搵返女醫生會好啲。
另外，造成尿道炎嘅原因有好多，例如唔係經常性更換M巾，沖涼毛巾唔乾淨，冇清潔性器官嘅習慣等等，唔一定同你有進行過性行為有關。不過，如果你男朋友冇清潔性器官嘅習慣，咁就有可能令到你細菌感染，導致尿道炎。你都可以提醒吓佢，叫佢每日都要翻開包皮，清潔性器官。下次進行性行為之前，可以一齊沖個涼先，清潔乾淨先做，咁都可以大大減低細菌感染嘅機會。因為有啲感染，例如念珠菌感染，男性係唔會有明顯嘅症狀同埋唔舒服嘅，所以有機會佢已經受感染，但係不自知，直至傳染咗俾你，先至發現到。所以清潔真係好重要！
如果睇完醫生發覺真係尿道炎嘅話，通常醫生會開抗生素畀你，咁喺食緊抗生素嘅呢一個療程裏面，就千祈唔好再做性行為，避免交叉感染。醫生亦都有可能會開塞藥俾你，佢係一粒手指公咁大嘅藥丸，需要塞入去陰道最入面。塞嘅時候可能會有啲唔舒服，塞完之後分泌物可能會增多，所以建議帶一塊護墊，分泌物多嘅時候可以換。
希望以上嘅資訊幫到你
1個讚