每次做嗰陣都好難集中精神，或者話好難放鬆去享受，明明自慰係射到，但一同另一半搞就射唔出，又尷尬又苦惱，其實點解會咁，又有無辦法解決？
同埋身體好唔敏感，無論耳仔、頸，甚至乳頭、龜頭都唔係太大感覺，自己無咁大快感都算，但好怕悶親對方。有試過去情趣用品店問有無方法，佢都只係介紹用嗰陣先有效嘅ky，而無一啲長遠、令我提升返身體敏感度嘅用品。我都好想知有無方法令身體敏感啲X(
Hello你好啊 ，多謝你同我地分享你嘅擔憂，明白你都好擔心會影響到對方嘅感受。
其實喺性行為中，唔一定要射精嘅，最重要係大家都享受，覺得舒服。如果不停諗住進行性行為一定要射精，滿足對方，反而可能會令自己更加大壓力，對有啲人嚟講，前戲比插入更加重要，亦有人覺得同對方親密嘅感覺係最吸引，所以最重要係同對方溝通，揾到令大家都享受嘅方法。如果覺得好難放鬆嘅，可以試下用燈光營造氣氛、利用香薰鬆弛、播啲放鬆嘅音樂，會容易啲放鬆嘅！射精時間受唔同嘅生理同心理因素影響，除咗自慰習慣外，情緒壓力都好大影響㗎，
見到你提到自慰時射到，可能你好清楚知道咩方法同埋邊個位置令自己最舒服，習慣咗之後，就未必習慣咗插入依個動作，都可以俾對方知道你嘅陰莖咩位置最敏感，或者你習慣摩擦嘅頻率等，如果喺自慰時有睇av嘅，可以同對方講你衣服上嘅癖好，喺大家都同意嘅情況下，對方著一啲會令你性興奮嘅衫，例如cosplay，其實依加性用具店都會有一啲咭牌/少少羞恥play嘅board game，可以令你同對方更加了解大家喺性方面嘅喜好，帶嚟其他嘅刺激。除咗插入外，仲有好多唔同嘅性行為，例如可以試下口交、手交等，揾到一啲令你舒服嘅方式。
身體敏感嘅位置因人而異嘅，除咗耳仔、頸、性器官外，仲有嘴唇、背脊、腰部、臀部、手臂、手踭、手指、大腿、小腿、腳背、腳跟、肩膀等等，見到你都好擔心因為咁而悶親對方，依加市面上都有唔同種類嘅性玩具同埋前戲嘅技巧，可以幫到你同對方獲得快感 ，可以睇下我地instagram嘅post，都有介紹㗎！ https://www.instagram.com/p/CGpLUl2jJW-/ 2
最後，兩個人之間嘅性行為唔一定要射精先叫完整，亦都唔需要覺得自己滿足唔到對方而自卑。