話說琴日第一次去咗男朋友（我同佢都係第一次拍拖）屋企，我留到好夜，所以冇走，咁佢攬住我瞓（我當時背向佢），我突然feel到有嘢頂一頂我，可能佢都feel到自己掂到我，即刻縮開咗，我應該估到係咩事
之後我當冇嘢發生，擰轉身攬返佢轉頭
其實嗰一刻我係有少少嚇親，我冇諗過原來勃起係可以咁硬，我嗰陣仲以為佢係放咗啲嘢喺褲袋冇攞出嚟 
，但諗返 冇理由袋住啲硬嘢瞓覺㗎 
我想問嘅問題係 呢啲係咪只係男仔正常嘅生理反應？可能係佢太緊張？
Hello~多謝你嘅提問
男性勃起係因為體內男性荷爾蒙水平嘅變化所引起。生理上嘅角度嚟講，係靠血液由陰莖動脈流入陰莖靜脈之後，鎖住不畀血液流出，令陰莖漲大變硬，等待射精或性刺激意念消退之後，靜脈會再次鬆開等血液流出，完成消軟並恢復原狀。所以男性勃起唔一定代表有性慾，可以係純粹嘅官能刺激，例如當佢哋着嘅衣物比較緊身嘅時候，陰莖同底褲磨擦，都有機會會令到佢勃起。以下係常見陰莖勃起嘅類型同埋原理：
一、晨勃:
又稱夜間勃起，主要原因係起身嘅時候睾丸素水平變化所導致。呢種現象發生喺睡眠嘅快速眼動期(即係發夢嘅時候)，如果發嘅夢有色情，意味，精液庫存又足夠，咁就有機會產生夢遺。
二、感官產生的勃起:
主要有四種，呢啲感官都會令人產生性興奮嘅感覺，令睾丸素上升，導致勃起嘅情況出現：
(一)大腦的想像，如記憶中能引起性慾的影像或性經驗。
(二)視覺(A片、情色、性感影片或人物)。
(三)聽覺(叫床聲或能引起性想像嘅聲音)。
(四)嗅覺、觸覺(連結曾有過美好性經驗嘅伴侶香水味、體味、身體觸感嘅回憶)
三、直接被碰觸:
顧名思義就係陰莖被摸或是按摩嘅情況下，引起嘅勃起現象，不過要留意，有啲男性喺陰莖被觸碰勃起嘅狀況下，都冇性交嘅慾望。正如我一開頭所講，勃起唔代表有性慾，亦都唔代表要發生性關係，只要等刺激消退就會軟返落嚟，呢個過程係可以好快嘅，可以係幾分鐘（甚至幾十秒）內完成。
所以你男朋友呢個情況係正常嘅，唔代表佢對你有邪念，可以放心。亦都有可能係因為佢太緊張，或者比你嘅觸感刺激到（可能太舒服），所以先有呢個反應。甚至可能因為天氣凍，身體想保暖所以勃起咗都未定呢～見到佢都因為驚嚇親你，所以縮開咗，睇嚟佢自己都有啲尷尬。如果你真係想知原因嘅話都可以旁敲側擊咁問吓佢嘅，不過因為呢個都係一個正常嘅生理反應嚟，如果對方好尷尬，唔想講呢個話題嘅話，就唔好難為佢啦！
哦，原來係咁
可能佢係驚我誤會佢諗衰嘢 
所以縮開
但其實我覺得佢好可愛 
平時拖手佢又會，錫佢佢又會
只不過瞓覺係physically好close 真係身貼身，所以我先咁明顯feel到原來係咁硬
咁可能係因為佢對觸覺好敏感，或者呢類型嘅接觸佢係第一次/未習慣，所以有啲「激動」。好多時候，男性勃起都係控制唔到嘅，可能佢自己對於呢個情況都好驚訝。當佢習慣咗呢類接觸之後，勃起嘅情況就會減少㗎啦～不過，咁樣唔代表佢變咗/冇咁鍾意你，純粹係冇咁「激動」啫。當然，一段感情係需要雙方努力嘅，如果單靠新鮮感去維持係唔會長久㗎！